“Азәрбајҹанда 1969-ҹу илдән һакимијјәтдә Әлијевләр сүлаләсидир - јәни, Гәззафи кими, дүз 42 ил! Бурада Әлијевин 1970-1987-ҹи илләрдә апардығы сијасәт нәтиҹәсиндә (1982-ҹи илдән 1988-ҹи илә гәдәр МК-нын биринҹи катиби зәиф характерли Камран Бағыров олса да) өлкә дахилиндә республиканы идарә етмәјә бир нәфәр дә потенсиалы олан кадрын тапылмамасы сәбәбиндән Пакистанда сәфир ишләјән вә халг арасында “бамбылы”, “гозәкән”, “һамамтикән” адландырылан Әбдүррәһман Вәзировун 1988-90, өз “јарашығы”нын вурғуну олдуғундан, һәтта кечирдији иҹласын ортасында да ҝедиб ҝүзҝүјә бахыб, дараныб гајыдан Ајаз Мүтәллибовун 1990-91-ҹи илләрдәки һакимијјәтләрини бир кәнара гојаг. Чүнки Әлијевин әввәлләр апардығы сијасәтин лабүд нәтиҹәси елә мәһз белә һакимијјәтләрин төрәмәси илә јекунлашмалыјды. 1992-ҹи ил ијунундан 1993-ҹү илин ијунунадәк олан тәҹрүбәсиз Халг Ҹәбһәси һакимијјәтини дә бир гыраға гојмаг лазымдыр. Халг Ҹәбһәси, һәтта бүтөвлүклә “дүшмәнләрдән” ибарәт олсајды белә, онларын бир илдә бурахдығы сәһвләри 18 ил әрзиндә чејнәмәк, бу сәһвләрин Азәрбајҹанын тарихиндә һәлледиҹи рол ојнадығыны, демократикләшмәнин гаршысыны кәсдијини иддиа етмәк, јумшаг десәк, әбләһликдир. Фактики олараг, 1993-дән бу јана олан сон 18 илдәсә нәинки Халг Ҹәбһәсинин јол вердији јанлышлыглары, һәтта Азәрбајҹанын 1969-ҹу илдән 1993-ҹү иләдәк олан дөврдә јол верилән бүтүн сәһвләри, јанлышлыглары да арадан галдырмаг вә өлкәни демократик бир дөвләтә чевирмәк мүмкүн иди.
Беләликлә, өтәри бир анализ тәсдигләјир ки, Азәрбајҹанын сон 42 иллик тарихинин негативләри, ән гаранлыг вә фаҹиәли анлары, һәмчинин өлкәнин демократикләшмәмәси вә бу јолда јарадылан әнҝәлләр бирбаша вә долајысыјла даһа чох Әлијевләрин адыјла бағлыдыр. Бу ҝүн өлкәдә мөвҹуд олан аб-һава да ингилабларын баш вердији әрәб өлкәләриндән гәтијјән фәргли дејил. Әксинә, бир чох параметрләрә ҝөрә, Азәрбајҹан даһа бәрбад вәзијјәтдәдир. Ынди “әрәб өлкәләриндә ингилаблара сәбәб олан шәраитдән һансы Азәрбајҹанда јохдур?” суалына, гој, тәк садә азәрбајҹанлылар јох, даһа чох һакимијјәтин јухары ешалонунда әјләшәнләр, һөкумәтә рәһбәрлик едәнләр ҹаваб ахтарсынлар! Мәсәлән, елә биринҹи коррупсија вә рүшвәтә гаршы компромиссиз мүбаризә апардыгларындан ағзы көпүкләнә-көпүкләнә данышан, реаллыгда исә шәр-бөһтанла сајсыз-һесабсыз ҝүнаһсыз инсанлары тутдурмагла минләрлә дүшмән газанан Баш прокурор вә ја Дахили Ышләр назири чыхыб десин ҝөрәк, өзләринә, јахынларына јаратдыглары бу ҹаһ-ҹәлалы нечә иллик маашларыјла әлдә едибләр? Дејә биләрләрми?! Јох! Чүнки бу ҹаһ-ҹәлалы јаратмаг үчүн буҝүнкү маашлары илә азы 10 мин ил ишләмәлидирләр! Баш прокурор 1000 илә 20 милјон маната јахын мааш алмалыдыр. Бу, һеч онун бир евинин гијмәти дејилдир, ај әзиз азәрбајҹанлылар! Беләләри һәләлик халгын өз талејинә саһиб чыха билмәмәсинин јаратдығы архајынлыг һиссинин тәсири алтындадылар. Анҹаг тарих сүбут едиб ки, өз халгына јухарыдан ашағы баханларын бу архајынчылыг һисси гәфилдән вә бир ҝүнүн ичәрисиндә дармадағын едилир!”
Тәәссүф! Тәәссүф ки, бу сөзләри Рәсул Гулијев јазыр. Һамынын, һамынын… партократ, мафиоз, каррупсионер, фырылдагчы кими таныдығы Рәсул Гулијев! Өвлијаларын төвсијәси будур ки, шәхсә јох, онун дедији сөзә бахын. Амма бурада “ онлар ҝетсин, мән ҝәлим” иддиасы вар. “Сөзләрә сөз јох!” Рәсул Гулијев мөвҹуд режими ҝөзәл таныјыр. Чүнки онун пәрдәархасы ојунларында әсас роллардан бирини ојнајыб. Һәгигәти исә о заман дејир ки, гујруғу тапданыб. Азәрбајҹан халгынын, хүсусилә мүхалифәтчиләрин Гулијевдән өјрәнәҹәји бир шеј вар, ҹәми бир шеј: арадан чыхмаг баҹарығы! О буну баҹарыр вә кимсә онун сүрүшмәк истедадына шүбһә етмир. Амма һәдәфимиз Гулијев дејил. Бизим үчүн бүтүн бу мөвзулар Азәрбајҹан халгынын сәадәти јолунда һәрәкәт бахымындан мараглыдыр.
Өзү зибил, ҝүнаһ, гәбаһәт ичиндә боғулан инсан халга нә верә биләр? Халгымызын сәадәт јолу бу һәгигәтин дәркиндән кечир. Халг јалныз тәмиз, саф, виҹданлы, иманлы инсанлары һакимијјәт күрсүсүндә отуртмалыдыр.
Халгын сечмәдији, халгын сәсини зорла алан бири һакимијјәтә лајигдирми?
Варлыг аләминин Јараданы вә Рәббинин ганунларыны позан бири халгы хошбәхт едә биләрми?
Милли сәрвәти ата малы кими аиләсинә хәрҹләјән, гулдур әтрафы арасында бөлүшдүрән инсан башчы олмаг ләјагәтинә маликдирми?
Торпаглары ишғал олмуш халг Еуровисион кими бајағы, әхлагсыз тәдбирләрә гатыла биләрми?
Јеҝанә мәгсәди ејш-ишрәт, раһат јашајыш, вар-дөвләт олан инсан гачгын, јохсул ағрыларыны дәрк едәрми?
Нәһајәт, бирҹә ҝүн һакимијјәтдә олуб халга јанмамыш, јалныз өзүнү дүшүнмүш инсанлар һагг-әдаләтдән јох, ҹинајәтләриндән данышмалы, мәһкәмә гаршысында дајанмалыдыр, неҹә ки, Һүсни Мүбарәк дајаныб – зорла! Онлар нијјәтләриндән данышан ҝөзләрини ејнәк алтында ҝизләдирләр. Амма бир ҝүн өз ҹинајәтләринә ејнәксиз бахмалы олаҹаглар, һөкмән!
Бабәк Тәбризли
