Һөрмәтли һәмкарымыз Севинҹ Телмангызы бу ҝүнләрдә јадпланетлиләр һагда мараглы арашдырма јазмышды. Јәгин һамыныз һачанса бу һагда охумусунуз, ја да телевизорда ҝөрмүсүнүз: белә миф вар ки, ҝуја 20-ҹи әсрин орталарында америкалылар јадпланетлиләрин космик ҝәмисини ракетлә вурублар, сонра онларын мејитләрини әлә кечирибләр. АБШ ордусу јадпланетлиләрин технолоҝијасындан јарарланыб, о үздән һадисә ҝизли сахланылыб вә саирә. Анҹаг инди президент Обама рәсми шәкилдә халга билдириб ки, белә һадисә ујдурмадыр.
Дүзү, УНО-лар (Учан Намәлум Објектләр) һагда сөһбәтләри һәмишә мараглы нағыллар һесаб еләмишәм, о үздән даһа белә шејләр диггәтими чәкмир. Һәмин јазыда исә марағымы башга мәсәлә ојатды. Сән демә АБШ һакимијјәти бу илин сентјабрында халгла үнсијјәти даһа јахын еләмәк үчүн бир сајт јарадыбдыр. Ҹамаат орда президентин ҹаваб вермәјини арзуладығы суаллары јазыр, әҝәр 1 ај әрзиндә 5000 адам һәмин суалы имзаласа президент буна ҹаваб верир.
Дөвләтә бахын... Бир-ики ај габаг биздә мәктәблиләрин һиҹаб өртмәси гадағасына етираз едән 150 мин нәфәрин имзасы илә Илһам Әлијевә мүраҹиәт ҝөндәрилди. Һәлә дә президент бу 150 мин мүсәлмана ҹаваб вермәји дүшүнмүр. Обама исә 5 мин адамын истәнилән суалына ҹаваб верир.
Севинҹ ханымын јазысында јадпланетлиләрин адамлары оғурлајыб башга планетләрә апармасы, үзәриндә ҹәрраһијјә әмәлијјатлары апармасы һагда әфсанәләрдән дә бәһс едилмишди. Буну да өлкәмизлә мүгајисә еләјәндә ҝөрүрсән мараглы бир јенилик јохдур. Биздә полисләр адам оғурлајыр, о ҹүмләдән орган көчүрмәләри илә мәшғул бејнәлхалг ҹинајәткар шәбәкәнин Бакы клиникаларында апардығы әмәлијјатлар дәфәләрлә јазылыб. Һеч нә дәјишмәјиб. Инди биз нә һагла марсианчикләрә иддиа едә биләрик ки, сиз бизим ҹамааты нөшүн оғурлајыб гарныны јарырсыныз? Марсианчик басыб адамын ҝөзүнү чыхардар, буна һаггы да чатар.
Ики ҝүн габаг јенә бизим гәзетдә шимал рајонларымыздан бириндә иткин дүшән гадын һагда елан верилмишди. Еланын тәхмини мәзмуну белә иди: “Әјниндә гара свитер, онун алтындан гара көјнәк ҝејиниб, шалвары гара рәнҝдә олуб. Ајаггабылары да гара имиш”. Башдан ајаға гара ҝејинмиш бу гарабәхт инсан итмәсин нејләсин? Гара өлкәдә гара ҝејинмиш адамы неҹә тапасан? Истәсән бурда лап гәдим Чин фәлсәфәсиндән хырдаламаг да олар: “Гаранлыг отагда гара пишији тапмаг чәтиндир, хүсусән дә пишик орда јохдурса”.
УНО-лар һагда јазыда башга “тәкзибедилмәз факт” да јазылмышды. Ҝуја 1915-ҹи илдә Түркијә лиманларындан бириндә Британија ордусунун 70-80 нәфәрлик бөлүјүнү јадпланетлиләр оғурлајыблар. Булуда охшар ҝәми ҝәлиб, бөлүјү ҝөтүрүб јох олуб. Анҹаг биз нијә белә узаға ҝедирик? Илин әввәлиндән Азәрбајҹан ордусунун бундан да чох - 90 әсҝәри намәлум шәраитләрдә һәлак олуб. Ҝенераллар исә бу мәсулијјәтсизлијин ҹәзасыны чәкмәк јеринә белә фактлары ишыгландыран гәзетләри мәһкәмәјә верирләр. Инди биз нејләјәк, Сәфәр Әбијеви дә ҝөјдән ҝәлмиш УНО булуду һесаб едәкми?
Үмумијјәтлә, биздә иҹтимаи лексикон елә УНО-ларла сых бағлыдыр. Башга әмәкдашымыз Фәраһим Илгароғлу Бакы күчәләринин газыг-гузуг едилмәсиндән фоторепортаж һазырлајыб, орда бир сүрүҹү дејир: “Бир ај бундан өнҹә јолу бағладылар ки, канализасија борулары дәјишдирилир. Екскаваторлар јолу үч метрлик газандан сонра јоха чыхдылар. Инди дә күчәнин һәр ики истигамәтиндә ҝедиш-ҝәлиши гадаған едән јол нишанлары гојублар. Зија Мәммәдов вә Һаҹыбала Абуталыбов бизә ҹаваб версин ҝөрәк биз евимизә уча-уча ҝедәк?”
Баҹарырсынызса - учун. Белә һакимијјәти олан ҹамаат учмағы да өјрәнмәлидир. О заман аналогу олмајан халг кими, Учан Мәлум Објектләр ады илә тарихә дүшәрик. Һәлә гәбаһәтдир ки, 18 илдир јапократија бу халга “бурдан учарсыныз” дејир, анҹаг халг һәлә учмағы өјрәнмәјибдир.
Замин ҺАҸЫ
Диггәт: Хәбәрдән истифадә етдикдә мәнбәјә истинад лазымдыр
