Әһли Бејт -АБНА- хәбәр аҝентлијинин вердији хәбәрә әсасән: Үч ҝүн өнҹә Хәтаи рајонунда Гафгаз Мүсәлманлары Идарәсинин(ГМИ) шөбә мүдири, Бакы Ислам Университетинин шәриәт факүлтәсинин деканы, әслән Ҝүрҹүстанын Болиниси рајонундан олан 1961-ҹи ил тәвәллүдлү Фирудин Мәммәдов досту Малик Мәммәдова мәхсус “Ниссан Х-Траил” маркалы автомобилиндә дамарларыны үлҝүҹлә доғрајыб. Бу барәдә вести.аз сајты мәлумат јајыб. Сајт јазыр ки, Ф.Мәммәдов Нефтчиләр Хәстәханасына апарылыб вә һәкимләрин сәјләринә бахмајараг, орада дүнјасыны дәјишиб.
Хәтаи Рајон Полис Идарәсинин 37-ҹи полис бөлмәсиндән сајтын әмәкдашына факты тәсдиг едәрәк билдирибләр ки, һадисә Хоҹалы просректиндә олуб. Ф.Мәммәдов ҝеҹә 23:45 радәләринәдәк тәләбәләри илә шәһәрдә олуб. Тәләбәләрини Хоҹалы проспектиндә машындан дүшүрәндән сонра онун гол дамарларыны кәсдији ҝүман олунур.
Гафгаз Мүсәлманлары Идарәсинин мәтбуат хидмәтинин рәһбәри Рәһимә Дадашова гәзетимизә ачыгламасында Ф.Мәммәдовун ГМИ-нин шөбә мүдири олдуғуну тәсдигләди. О билдирди ки, Ф.Мәммәдов интиһар етмәјиб: “3 әмәкдашымыздан хәбәр алдым, дедиләр ки, Фирудин Мәммәдов үрәк тутмасындан дүнјасыны дәјишиб”.
Мәтбуат хидмәтинин рәһбәри Ф.Мәммәдовун аиләли олдуғуну, әввәлләр онун сәһһәтиндә проблемләрин олдуғу барәдә нәсә ешитмәдикләрини сөјләди.
Баш Прокурорлуғун мәтбуат хидмәтиндән исә әмәкдашымыза билдирдиләр ки, Ф.Мәммәдовун интиһар факты илә бағлы Хәтаи Рајон Прокурорлуғунда Ҹинајәт Мәҹәлләсинин өзүнү өлдүрмә һәддинә чатдырма (125-ҹи) маддәси илә ҹинајәт иши башланыб. Бу исә Ф.Мәммәдовун үрәк тутмасындан дүнјасыны дәјишмәси барәдә мәлуматларын әсассыз олмасыны тәсдиг едир. Исламда интиһарын бөјүк ҝүнаһ олмасыны нәзәрә алдыгда Ф.Мәммәдовун өзүнә гәсдинин архасында ҹидди олајларын дајанмасыны дүшүнмәјә әсас верир.
Диггәт: Хәбәрдән истифадә етдикдә мәнбәјә истинад лазымдыр
