Әһли Бејт -АБНА- хәбәр аҝентлијинин вердији хәбәрә әсасән: Октјабрын 14-дә Мүсават Партијасынын гәрарҝаһында 2 апрел аксијасы заманы һәбс олунан Азәрбајҹан Халг Ҹәбһәси Партијасынын үзвү Елнур Мәҹидлинин атасы Арзуман Мәҹидли вә Мүсават Партијасынын үзвү Рүфәт Һаҹыбәјлинин атасы Ибраһим Һаҹыбәјли аҹлыг аксијасына башлајыблар.
Мәһбус Аиләләри Комитәсинин сәдри Арзуман Мәҹидли вердији ачыгламада дејиб ки, сәһһәтләри имкан вердији гәдәр аксијаны давам етдирәҹәкләр: “Ән азы үч ҝүн аҹлыг едәҹәјик. Тәләбимиз 2 апрел аксијачылары илә јанашы Руслан Бәширли, Ҹаббар Саваланлы, Бәхтијар Һаҹыјев, һүгуг мүдафиәчиси Видади Исҝәндәрли вә бүтүн сијаси мәһбусларын азад олунмасыдыр. Мәһбус аналарындан да аксијаја гошулмаг истәјәнләр вар. Нөвбәли формада олса да, тәләбләримизә реаксија вериләнәдәк аксијаны давам етдирәҹәјик”.
Аҹлыг аксијасына башлајанлара сијаси партија нүмајәндәләри, иҹтимаи хадимләр баш чәкиб.
Мәһбус Аиләләри Комитәсинин 18 үзвү вар. Комитәјә 2 апрел митингиндә тутуланларла јанашы Руслан Бәширлинин, Ҹаббар Саваланлынын, Бәхтијар Һаҹыјевин, Видади Исҝәндәрлинин аиләләри дахилдир. Апрелин 2-дә мүхалифәтин Бакыда кечирдији аксијаја ҝөрә бири шәрти һәбс ҹәзасы алмагла 14 аксијачы азадлыгдан мәһруметмәјә мәһкум олунуб.
Руслан Бәширли 2005-ҹи илдән һәбсдәдир, Ҹаббар Саваланлы, Бәхтијар Һаҹыјев 2011-ҹи илин мајында, Видади Исҝәндәрли апрел ајында азадлыгдан мәһруметмәјә мәһкум едилиб.
Диггәт: Хәбәрдән истифадә етдикдә мәнбәјә истинад лазымдыр
