Исламда кәмијјәт, чохлуг һеч заман һагг-әдаләт вә ҝүҹ мејары олмајыб. Бир исламчы дөврүн ахынында өзүнү итириб мејдандакы чохлуғу дилә ҝәтирәрәк өјүнсә, Гурани-Кәримин бу мөвзуда бәјанатларыны вә Кәрбәла вагиәсини јада салса јетәр. Јетәр ки, бир груп ашиги нәһәнҝ орду гаршысында, бир әдаләт ҹарчысыны дөвләт апараты өнүндә аҹиз ҝөрмәсин. Исламчы чохлугла өјүнмүр, чохлугдан горхмур. Белә дүшүнмәјән мүсәлман өз әгидәсини јенидән нәзәрдән кечирмәли, шәһадәт дәрәҹәсинин ән јүксәк дәрәҹә кими дәјәрләндирилмәсинин сиррини анламаға чалышмалыдыр. Әкрәм Әјлисли адлы мөвҹуд Азәрбајҹан мәканында диндарларын бир Аллаһу-әкбәрлә мејданы долдурдуғуну һөкумәт вә мүхалифәтин ҝөзүнә чәкиб, диндарларын һакимијјәтә ҝәлмәк шансыны милли фаҹиә кими дәјәрләндирди. Ислам дүнјаҝөрүшүнә саһиб олмајанларын сајы, боју, чәкиси, бир сөзлә физики параметрләри һәр шејдән өндә ҝөрмәси тәәҹүблү дејил, неҹә Әкрәм Әјлислинин компартија үзвү олмаг арзусу ади сајылыр. Бу јазынын мөвзусу нә Әјлислидир, нә дә компартија тәфәккүрү. Азәрбајҹанымызы һәдәләјән тәһлүкәли тенденсија јашанмагдадыр: мүхалифәтлә исламчылар гаршы-гаршыја гојулур. Мүхалифәтчи вә исламчылардан башгаларынын бу арада гују газмасы тәбиидир. Чүнки милли бирлик јаранса, супер ҝүҹләр вә онлара бағлы кәшфијјат идарәләринин Азәрбајҹан һакимијјәтинә тәсир механизмләри әлдән чыхыр. Һазырда мүхалифәт гәрбә, исламчылар Иран, Түркијә, Әрәбистана бағлылыгда гараланыр. Дәјәрләрә бағлылыг ҹасуслуг, вәтән хаинлији кими тәгдим олунур. Мүхалифәтин гәрбин демократик дәјәрләринә, исламчыларын шәргин дини дәјәрләринә бағлылығында тәәҹҹүблү һеч нә јохдур. Амма демократик вә ислами дәјәрләри өз күбар һәјатына әнҝәл ҝөрәнләр биләрәкдән хәјанәт мөвзусуну ортаја чәкир, ејни заманда мүхалифәтлә исламчылар арасында јахынлашма, иттифага гаршы ҹидди манеәләр јарадыр.
Бир сүрү арасында һәмишә ајыглығыны итирәнләр овланыр. Истәр мүхалифәт, истәр исламчылар арасында тора дүшәнләр аз дејил. Онлар һәгиги мүхалифәт, һәгиги исламчы олмадығы кими һәгиги мүхалифәт-исламчы иттифагынын да фајдаларыны ҝөрә билмирләр. Бир груп исламчы мүхалифәти, бир груп мүхалифәтчи исламчылары јад дәјәрләрин дашыјыҹысы сајыр. Белә бир факт вар. Амма бу әксәријјәт тәшкил етмир вә идеоложи хәтдән јајынманын тәзаһүрүдүр. Өзүнү Гәрб дөвләтләринә тәслим етмиш мүхалифәтчиләр олдуғу кими, өзүнү Шәргә тәслим етмиш исламчылар да вар. Беләләри әгидәнин дөвләтләрә јох, дәјәрләрә бағлы олдуғуну унудурлар.
Азәрбајҹанда клан һакимијјәтидир. Бир гарын рузи үчүн јашамаг мәҹбуријјәтиндә галан халг фәаллығыны итириб. Һәтта әрәб ингилабларындан сонра Азәрбајҹанда давам едән “ҝөл сүкуту” сүбут етди ки, диктатор, коррупсионер һакимијјәтдән гуртулушун јени јоллары дүшүнүлмәлидир. Јол чохдур. Онлардан һәр бири мүхалифәт-исламчы иттифагыны зәрури едир.
Азәрбајҹанда ән гыса мүддәтдә бу иттифагын јаранмасы үчүн данышыглар башламалыдыр. Чүнки буну һакимијјәт, Азәрбајҹанын варлығына јем кими баханлар истәмир. Чүнки биз һәмишә ағлымызын јох, истәкләримизин әсири олмушуг. Бир исламчы, бир мүхалифәтчи истәмәсә белә данышыглара старт верилмәлидир!
Мүхалифәт һакимијјәтә ҝәлмәк истәјир. Бурада исламчы үчүн горхулу нә вар? Горхулу одур ки, һакимијјәтә ҝәләнләр дә әлијевләр кими Ислам дәјәрләринә јер вермәјәләр. Бу горхунун јери вар. Бу мүнасибәт бир дәфә јашаныб. Исламчылар илк дәфә МТН-нин гапысыны мүхалифәт һакимијјәтдә оланда таныјыб. Һансы ки азадлыг һәрәкатынын өнүндә диндарлар ҝедирди.
Исламчылар, хүсусилә әксәријјәт тәшкил едән шиә мәктәбинин фәаллары, руһаниләр, Ислам партијасы һакимијјәт јох, дәјәрләрә јер истәјир. Бурада мүхалифәт үчүн горхулу нә вар? Мүхалифәт горха биләр ки, ҝүҹләнән исламчылар сабаһ өлкәдә шәриәт ганунларыны тәтбиг едәр вә бу демократик аб-һаваны көлҝәдә гојар. Горхмаға дәјәр, чүнки дүнјада нүмунәләри вар. Амма иттифаг өлчү-бичили механизмләр әсасында давам етсә, нә исламчылар, нә дә мүхалифәтчиләр үчүн горху јери галмыр. Гаршыја гојулан мәгсәд Әлијев режиминдән јаха гуртармаг вә сонракы јолда халгын истәкләри илә һесаблашмагдыр. Халг өз сәрвәтләрини бир овуҹ гулдура једиртмәк истәјирми? Халг милли-мәнәви дәјәрләрин ајаг алтына алынмасыны истәјирми? Халг диндар ја динсиз сојдашын наркотика вә силаһла шәрләнмәсинә разыдырмы? Бүтүн тәфәррүат вә ја принсипләр мүхалифәт-исламчы иттифагынын тәмәлидир. Әҝәр арада сәдагәт олса, һәр тәрәф нә истәдијини сонадәк ачыг ортаја гојса, сонрасы үчүн горху јохдур. Исламчылар јалныз халг тәләб етсә һакимијјәтә саһиб дурмагда мәсулијјәт дашыјыр. Халг демократик гурулуш истәјирсә дини дәјәрләрә јер верилмәси исламчыны гане едир. Исламчы президент күрсүсүнә отуранда садә сојдашдан дәбдәбәли јашамаг истәјиндәдирсә нә исламчыдыр, нә вәтәнпәрвәр. Әҝәр вәзифәјә ҝәләндә садә халг кими јашајаҹағамса нә үчүн креслоја хатир вурушмалыјам?!
Бу иттифаг нә заман һәјата кечәҹәк? Үмумијјәтлә һәјата кечәҹәкми? Ағыллы мүхалифәтчи дә, исламчы да билмәлидир ки, буну нә һакимијјәт истәјир, нә дә һакимијјәтлә әмәкдашлыг едән дөвләтләр. Демәк биз буну истәмәлијик. Бу һакимијјәтин гејри-гануни олдуғуну дүнјаја гәбул етдирәси јеҝанә гүввә бизим истәјимиздир. Јалныз бу иттифаг апараҹы дөвләтләри коррупсионер режимлә әмәкдашлыға сон гојмаға вадар едә биләр. Әкс-тәгдирдә исламчы да, мүхалифәтчи дә истәмәдән вә билмәдән һакимијјәтин мәнафеләринә хидмәтдә дурасыдыр.
Бабәк Тәбризли
