Салам Мүбариз!
Ҹаным иҝид гәһрәманым! Билирәм биздән чох ниҝарансан. Һәрчәнд мәктубунда сәндән ниҝаран галмамағы јазмышдын. Биз сәнин сөзүнә “әмәл етдик.” Унутдуг сәни. Гарабағы ишғал ҝүнләриндә хатырладығымыз кими сәни дә анҹаг доғум вә өлүм ҝүнүндә хатырлајаҹағыг. Инҹимә гардаш бу бизим ганымыздадыр. Инди сән дә дөнүб олдун бизләр үчүн 100 ил бундан габагкы адам. Һај-һүј салдыг, адына мәктәб гојдуг, күчә филан ки сәни әбәдиләшдирәҹәјик. Амма… Сән демә бүтүн бунлар садәҹә бир ҝөстәриш имиш. Сәнин гәһрәманлығын бизләрә өрнәк олаҹаг јеринә биз сәни унутмаға гәрар вердик. Гынама бизи гардашым. Бах сән тәк дејилсән. Сәндән әввәл шәһид олан нечә-нечә оғланларымыз вар. Онлар да јаддан чыхыб. Дүздүр һеч кәс вә һеч нә унудулмур дејирик. Амма бу сөздәдир. Сабир демиш иш ҝөрәҹәк јердә сөз әзбәрләмәји баҹарырыг.
Јахын ҝүнләрдә зијарәтинә ҝәлмишдим. Сәссизлик вә тәнһалыг тәк сәнин дејил орда јатан бүтүн шәһидләрин гисмәтидир. Бу артыг нечәнҹи зијарәтимдир ки, сизи тәнһа ҝөрүрәм. Нә демәк олар. Халгымыз дәјәрләринә, идеалларына јадлашыр. Чүнки халгымызын јени "еуровисион"-у вар. Даһа Гарабағыда хатырламыр. Сән елә бир иш ҝөрдүн ки, әҝәр бу дүшмәнләрдә олсајды сәни һеч вахт унутмаздылар.
Ермәниләрин бир ганичән террорчу аволары вар. Ону да ки, бир Азәрбајҹан оғулу ит кими ҝәбәрдиб. Өзү дә тәкбәтәк дөјүшдә. Ермәниләрин аз гала адыны белә чәкәндә горхдуглары авону Ибад адлы бир оғлан өзү дә ҹәми 22 јашы оланда башыны кәсиб. Амма ермәниләр онун башсыз бәдәни басдырылан јери бу ҝүн зијарәтҝаһа чевирибләр. Амма сәнин мәзарына…Еһ гардаш биләсән ки, һәлә дә Гарабағы ала билмәмишик. Һәлә үмидимизи дикмишик бир-ики ҝәдә-ҝүдәјә ки, ҝәлиб торпағымызы алыб бизә верәҹәкләр. Ермәни исә Гарабағда сечкиләр кечирир, артыг өзүнү оралы һесаб едир.
Әзизим Мүбариз! Мәктубунда ибадәтимизә диггәт етмәји тапшырмышдын. Амма буна да имкан вермирләр. Ибадәтин бизи олан намазы гылмаг үчүн һәбсханада арајыш истәјирләр. Ҝәрәк јашадығын јердән, мәсҹиддән ахундун имзасы, мөһүрү илә арајыш ола ки, намаз гыла биләк. Һә бир дә һиҹаб ҝејинмәјә гојмурлар. Балаҹа гызларымыз ҝәрәк сојунсунлар. Сән исә бизә ибадәтимиздә мөһкәм олмағы тапшырмышдын. Ибадәтиндә мөһкәм олуб, зүлмә гаршы чыхан 7 нәфәри исә бу јахында мәһкәмәдә һөкм охудулар. Онлара террорчу, адам өлдүрән дамғасы вуруб һәрәсинә 12 ил һәбс вердиләр. Билмирәм хәбәрин олду ја јох? Дедим ки, буну да биләсән.
Саламат гал Мүбариз. Биз сәни унутдуг, һеч олмаса сән бизи унутма!
P.S: Һә бир дә лап јадымдан чыхмышды. Әһмәдә дә Фәридә дә салам де. Онлар дејәсән елә мәним дә јадымдан чыхыб…
Турал Әлијев
