Ҝеҹә намазыны ҝеҹәнин сон үчдә бириндә сүбһ азанына јахын гылмаг төвсијә олунур. Беләки, Һәзрәти Рәсули-Әкрәм(с) бир кишинин "елә бир вахт вардырмы ки, мөмин бәндә дуа етдикдә дуасы гәбул олунсун" суалына ҹаваб олараг бујурур ки, бәли вар вә һәмин вахт ҝеҹә јарысынын сүбһә јахын галан үчдә бир һиссәсидир.
Ҝеҹә намазы барәдә мәсумлардан(ә) сајы-һесабы олмајан фәзиләтләр бујрулуб. Бујрулмушдур ки, һәм дүнја һәм дә ахирәтин абадлығы ҝеҹә намазынын әда олунмасында гәрарлашмышдыр.
Һәзрәти Рәсули-Әкрәм(с) ҝеҹә намазы барәдә бујурмушудур ки, Ҹәбрајыл(ә) ибадәт үчүн ҝеҹәни ојаг галмағы мәнә о гәдәр төвсијә етди ки, үммәтимин ән јахшы шәхсләринин һеч вахт јатмајаҹағыны ҝүман етдим.
Һәзрәти Имам Садиг(ә) ҝеҹә намазы барәдә бујурур ки, ҝеҹә намазы инсаны хош әтирли едиб, үзүнү ағ вә нурани едәр вә рузи ҝәтирәр.
Арифләр вә алимләр һәмишә халга ҝеҹә намазына диггәт етмәји төвсијә едибләр. Әлламә Тәбатәбаи(р) нәгл едир ки, ҹаванлыг вахтларымда устадым Әлламә Гази(р) мәнә бујурду ки, "Өвладым, әҝәр бу дүнјаны истәјирсәнсә, ҝеҹә намазы гыл. Вә әҝәр ахирәти истәјирсәнсә, јенә дә ҝеҹә намазы гыл!"
Ҝеҹә намазынын гылынма гајдасы:
Ҝеҹә намазы 11 рикәтдир. Онун 8 рикәти ҝеҹә намазынын нафиләси нијјәтилә сүбһ намазы кими ики рикәт гылыныр. Јәни 4 дәфә ејнилә сүбһ намазы кими 2 рикәтли намаз гылыныр. Даһа сонра ејнилә сүбһ намазы кими амма гунутсуз 2 рикәтли Шәфи намазы гылыныр. Сонда исә 1 рикәтли гунуту олан Витр намазы әда едилир.
Нафилә намазларын гылынма гајдасы:
Нијјәт: "Ҝеҹә намазынын нафиләсины гылырам гүрбәтән иләллаһ"+Тәкбир
1-ҹи рикәт: Фатиһә+Ихлас(Гул һувәллаһ)+Руку+Сәҹдәләр
2-ҹи рикәт: Фатиһә+Ихлас+Руку+Сәҹдәләр+Тәшәһһүд+Саламлар(Гејд етдијимиз кими нафилә намазлары 8 рикәтдир. Јәни ејни намазы 4 дәфә тәкрар етмәк лазымдыр ки, ҹәмдә 8 рикәт едир).
Шәфи намазынын гылынма гајдасы:
Шәфи намазында мүстәһәбдир ки, инсан 1-ҹи рикәтдә Һәмд вә Сурәдән сонра Нас сурәсини, икинҹи рикәтдә исә Һәмд вә Сурәдән сонра Фәләг сурәсини охусун. Амма охумаса да һеч бир ејби јохдур.
Шәфи намазы гылырам гүрбәтән иләллаһ+Тәкбир
1-ҹи рикәт: Фатиһә+Ихлас+Нас+Руку+Сәҹдәләр
2-ҹи рикәт: Фатиһә+Ихлас+Фәләг+ Руку+Сәҹдәләр+Тәшәһһүд+Саламлар(Бир даһа гејд едәк ки, Шәфи намазынын гунуту јохдур).
Витр намазынын гылынма гајдасы:
Витр намазында мүстәһәбдир ки, инсан Фатиһә сурәсини охудугдан сонра 3 дәфә Ихлас сурәсини, 1 дәфә Фәләг вә бир дәфә дә Нас сурәсини охусун. Һәмчинин мүстәһәбдир ки, намазын гунутунда 70 дәфә "Әстәғфируллаһә рабби вә әтубу илејһ", 70 дәфә "Һәзә мәгамул-`аизи бикә минән-нар", 300 дәфә "әл-Әфв", 40 дәфә "Аллаһуммәғфирлил-мумининә вәл-муминат" вә 40 дәфә "Аллаһуммәғфирли филанкәс(филанкәсин әвәзинә мөмин(ә)ин адыны чәкмәк) дејилсин. Амма бунларын бир һиссәсини јахуд бирини јасхуд һеч һеч бирини етмәјиб гунут тутмаг шәртилә јалныз 1 рикәт намаз гымагла да кифајәтләнмәк олар. Амма јахшы олар ки, 70 дәфә "Әстәғфируллаһә рабби вә әтубу илејһ" дејилсин вә Аллаһда 40 нәфәр мөминин бағышланмасы истәнилсин.
Витр намазы гылырам гүрбәтән иләллаһ+Тәкбир
Фатиһә+3 дәфә Ихлас+ 1 дәфә Фәләг+1 дәфә Нас+Гунут+Руку+Сәҹдәләр+Тәшәһһүд+Саламлар.
Гејд: Ҝеҹә намазынын нафиләләрини гылмадан да јалныз Шәфи вә Витр намазларыны әда етмәк олар. Һәтта вахт аз оларса, јалныз Витр намазыны гылмаг мүмкүндүр.
