Әһли Бејт -АБНА- хәбәр аҝентлијинин вердији хәбәрә әсасән: Сурија Президенти Бәшшар Әсәд Түркијәнин мүхалиф Ҹүмһуријјәт Халг Партијасынын (ҸҺП) сәдринин көмәкчиси Фарук Лоғоғлу илә ҝөрүшүндә билдириб: “Түркијә үсјанчылара силаһ сатыр”.
Әсәд ону да бәјан едиб ки, АБШ Түркијә вә Суријанын тәрәфдашлығына гаршы чыхдығындан, Түркијә сон вахтлар Вашингтонун марагларынын тәмсилчиси ролуну ојнајыр.
Онун сөзләринә ҝөрә, сон 30 ил әрзиндә Конститусијасына дәјишиклик етмәјән Түркијә Суријадан үч ај әрзиндә ҝенишмигјаслы ислаһатларын апарылмасыны тәләб едир.
Түркијәнин Силаһлы Гүввәләри 5-15 октјабрда Сурија илә сәрһәддә јерләшән Хатај адланан әразидә тәлим кечирәҹәк. Бу барәдә СГ-нин Баш гәрарҝаһы мәлумат вериб. Тәлимләрә 730 һәрби гуллугчу вә гуру гошунларындан 40 әдәд техника ҹәлб едиләҹәк.
Тәлимләрин ҝедишиндә, октјабрын 9-да өлкәнин Баш назири Рәҹәб Тајјиб Әрдоған суријалы гачгын иғтишашчыларын Хатајдакы дүшәрҝәсинә баш чәкәҹәк. Орада Әрдоғанын Суријадакы һадисәләрлә бағлы кәскин бәјанатла чыхыш едәҹәји ҝөзләнилир.
Сурија һакимијјәти өлкәдә чахнашмалар башландыгдан сонра иғтишашчыларын күтләви гачышы илә әлагәдар дәфәләрлә өз тәһлүкәсизлик гүввәләрини Түркијә илә сәрһәд реҝионлара ҹәмләшдириб. Суријанын танклар да дахил олмагла, гошун һиссәләри сәрһәд хәттинә 500 метрәдәк јахынлашыб.
Бу арада Түркијәјә гачан Сурија иғтишашчыларынын сајы 7 мин 605 нәфәрә чатыб. Онлар Түркијәнин Гырмызы Ајпара Ҹәмијјәтинин идарәчилији алтында олан 5 дүшәрҝәдә јерләшдирилибләр.
Түркијәнин Баш назири Рәҹәб Тајиб Әрдоған чәршәнбә ҝүнү Ҹәнуби Африка Республикасына сәфәри заманы бәјан едиб ки, Түркијә Президент Бәшшар әл-Әсәдә гаршы өз санксијалар пакетини һазырлајаҹаг.
Бундан әввәл Түркијә һөкумәти санксијалар чәрчивәсиндә Сурија Президенти вә онун аиләсинин бүтүн активләрини дондурмағы гәрара алыб.Бу барәдә өтән шәнбә ҝүнү ҸНН Турк телеканалы мәлумат вериб.
Бунунла јанашы, Бәшшар Әсәдә јахын олан бир сыра шәхсләрин Түркијәјә ҝиришинә иҹазә верилмәјәҹәк.
Диггәт: Хәбәрдән истифадә етдикдә мәнбәјә истинад лазымдыр
