Әһли Бејт -АБНА- хәбәр аҝентлијинин вердији хәбәрә әсасән: “Wikileaks” сајтынын ачыгладығы америкалы дипломатларын јени сәнәдләриндә рәсми Бакынын дахили вә хариҹи сијасәти һагда мараглы мәлуматлар вар. Белә ки, сәнәдләрин бир һиссәси Президент Администрасијасынын рәһбәри Рамиз Меһдијевин етирафларына аиддир. Одур ки, тәсадүфү дејил ки, бу ҝүн о, “Wikileaks”ин материалларынын һәгигәтә ујғун олмадығыны билдириб. Сәфир Енн Дерсинин 15 ијун 2007-ҹи ил тарихли телеграмы бир ҝүн әввәл Рамиз Меһдијевин она вердији мәхфи сәнәддән бәһс едир. Фарс дилиндә јазылан сәнәд наразылығы гызышдырмаг үчүн Иранын хүсуси хидмәтинин дини групларла иш үзрә тәлиматлары олуб.
Меһдијев Азәрбајҹан һакимијјәтинин бу сәнәди һарадан вә неҹә әлдә етдијини ачыгламајыб.
“Там мәхфи” олан вә Ислам Ингилабы Корпусунун нәшр етдији сәнәд-тәлиматы Шәрги Азәрбајҹан Бәсиҹ команданы ҝенерал Мәһәммәд Јусеф Шакери имзалајыб. “Иранда пан-түркчү һәрәкаты ҝүҹләнир, азәрбајҹанлылар ҹәлб олунмадан ингилабчылардан вә сырави вәтәндашлардан истифадә етмәклә өлкәнин шимал-гәрбиндә тәдбирләр ҝөрмәк лазымдыр. Өз милли идентификасијасына тәрәфдар оланлары хариҹи аҝентләр кими тәгдим етмәк лазымдыр", - сәнәддә дејилир.
Сонра гејд олунур ки, Нахчыван сакинләрини гәзетләрдә Мәһәммәд пејғәмбәрин тәһгир олунмасынын әлејһинә чыхмаға ҹәлб етмәк лазымдыр. Бу мәгсәдлә истифадә олунан адамларын малијјә вә физики тәһлүкәсизлијини тәмин етмәк ваҹибдир.
Сәнәдин сурәти Информасија Кәшфијјат Назирлијинә, Иранын Бакыдакы сәфирлијинә вә с. ҝөндәрилиб.
АБШ сәфирлијинин шәрһиндә сәнәдин дүзҝүнлүјүнү јохламаг имканларынын олмадығы билдирилир.
Енн Дерсинин һәмин ил 19 ијул тарихли диҝәр телеграмы онун Рамиз Меһдијевлә Иран тәһлүкәси мөвзусунда ҝөрүшүндән бәһс едир. “Иран Азәрбајҹана тәзјиг кими радикал исламдан вә наркотиҹарәтдән истифадә едир”, - дејә сәфир Меһдијевдән ситат ҝәтирир. Президент Администрасијасынын бәзи шөбәләринин рәһбәрләринин дә иштирак етдији ҝөрүшдә Меһдијев билдириб ки, Иран Азәрбајҹанда Ислам Партијасынын рәһбәрлијинә “ән радикал лидери” (ијулун 15-дән партијаја рәһбәрлик едән Мөвсүм Сәмәдову нәзәрдә тутур) тәјин едиб.
О һәмчинин дејиб ки, Бакыдакы Иран Мәдәнијјәт Мәркәзи бу сијасәтин аләтидир. Белә ки, мәркәз јүзләрлә ҝәнҹи сечәрәк дини мүәссисәләрдә тәһсил алмаға ҝөндәрир. Һәмин адамлар гајытдыгдан сонра бешинҹи колона чеврилир вә Азәрбајҹанда радикаллашмаја хидмәт едир.
О, һиҹаб тахан гадынларын сајынын чохалмасыны да Иранын тәсиринин артмасынын нәтиҹәси һесаб едир. Онун сөзләринә ҝөрә, Азәрбајҹан һөкумәти бу тенденсијанын гаршысыны алмалыдыр, чүнки ҝәләҹәкдә буну етмәк мүмкүн олмајаҹаг. Бу истигамәтдә аддымлардан бири али вә орта мәктәбләрдә һиҹаба гадағанын гојулмасы олаҹаг.
Диггәт: Хәбәрдән истифадә етдикдә мәнбәјә истинад лазымдыр
