Әһли Бејт -АБНА- хәбәр аҝентлијинин вердији хәбәрә әсасән: Бөјүк Британијада јашајан Ислам давамчыларынын тәшәббүсү илә артыг 2012 Сүлһ Бәјаннамәси үчүн онлине имзатоплама кампанијасы башланылыб. Мәшһур Уембли стадионунда кечирилән аксијаја Пакистанлы Ислам алими Муһаммад Таһир-ул-Гадри рәһбәрлик едиб. О, өтән ил террора гаршы әтрафлы фәтва һазырламасы илә мәшһурлашыб.
Британија мәтбуатынын вердији хәбәрә ҝөрә, Таһир-ул-Гадри дејиб ки, бу ҝүн әсл мүсәлманларын, сүлһсевәр Ислам давамчыларынын сәси ешидилмир, екстремистләрин сәси сүлһсевәр мүсәлманларын сәсини батырыр: “Мән ҹиһад һагда дүзҝүн тәсәввүрү олмајанлара сәсләнирәм – етдикләриниз тамамилә Ислама гаршыдыр. Исламын һеч бир террор актына аидијјәти јохдур. Биз гејд-шәртсиз олараг һәр бир екстремизм вә террор актыны писләјирик”. Таһир-ул-Гадри бу месажы “артыг бејни зәһәрләнән” инсанлара дејил, радикаллашмаг сәрһәдиндә олан мүсәлманлара үнванладығыны билдириб. Бу јүрүшүн тәшкилинә бир илә јахын вахт сәрф олунуб.
Аксијаја Инҝитәрәнин һәр нөгтәсиндән мүсәлманлар топлашыблар. Тәхминән 12 мин инсан баш верәнләри изләјиб. Аксија заманы баш назир Девид Камерон, баш назирин мүавини Ник Клегг, БМТ-нин баш катиби Бан Ки-Моон, јерли архијепископ вә танынмыш сијасәтчиләрин месажлары сәсләндирилиб. Аксија заманы Сүлһ Бәјаннамәси үчүн имза топлама кампанијасы башланылмасы да елан едилиб. Бәјаннамәдә мүсәлман аләминдә демократија, инсан һагларына һөрмәт, бүтүн дүнјада касыблыға сон гојулмасына даир месажлар јер алаҹаг. Ҝәлән ил јанварын 1-нә гәдәр 1 милјон инсанын имзасыны топламаг гаршыја мәгсәд гојулуб.
Диггәт: Хәбәрдән истифадә етдикдә мәнбәјә истинад лазымдыр
