Әһли Бејт -АБНА- хәбәр аҝентлијинин вердији хәбәрә әсасән: Ислам Ингилабынын Али Мәгамлы Рәһбәри Һәзрәт Ајәтуллаһ Хаменеинин иштиракы илә Полис Академијасынын тәләбәләринин бурахылыш мәрасими кечирилди.
Полис Академијасынын һәјәтинә дахил олан Һәзрәт Ајәтуллаһ Хаменеи әввәлҹә шәһидләрин јад олундуғу мәкана ҝәлди, “Фатиһә” охујараг Уҹа Аллаһдан Полис Гүввәләри сыраларындан шәһид олмуш инсанлара ән али дәрәҹәләри нәсиб етмәсини диләди.
Даһа сонра Али Баш Командан мејдандакы полис, јол полиси вә сәрһәд хидмәти бирләшмәләринин тәнтәнәли дүзүлүшүнү гәбул етди.
Мәрасим заманы чыхыш едән Имам Хамнеји Полис Гүввәләри сыраларында хидмәт едән сырави вә јүксәк рүтбәли кадрлары “халгын тәһлүкәсизлијинин, асајиш вә сакитлијинин кешикчиләри”, “Аллаһ јолунда чалышыб-вурушан әсл мүҹаһидләр” адландырды. О вурғулады: “Полис Гүввәләри ҹәмијјәтдә даим һәм ҝүҹ вә низам-интизамын, һәм дә меһрибанлыг вә мәрһәмәтин тәҹәссүмү олмалыдыр”.
Һәзрәт Ајәтуллаһ Хаменеи гејд етди ки, истәр иҹтимаи, истәрсә дә әхлаги-психоложи тәһлүкәсизлик өлкәнин тәрәгги вә башуҹалығынын башлыҹа дајагларындандыр. О деди: “Империализмин мүстәгил халгларын әлејһинә ишләтдији методлардан бири дә ҹәмијјәтин иҹтимаи, һәмчинин әхлаги-психоложи тәһлүкәсизлијини позмагдыр”.
Дүнја Мүсәлманларынын Али Мәгамлы Рәһбәри империализмин сијасәтини мүәјјән едән гүввәләрин наркотик маддәләри јајмаг, ҹәмијјәтдә әхлаги бахымдан өзбашыналыг атмосфери јаратмаг, мәнәви-әхлаги дәјәрләри сарсытмаг кими ҝизли планларын һәјата кечирдијинә тохунараг ашағыдакылары вурғулады: “Бу ҝүн Полис Гүввәләринин өһдәсинә чох бөјүк бир вәзифә дүшүр. Бу вәзифәни дүзҝүн вә дәгиг јеринә јетирмәк үчүн һәтта еһтимал олунан хәтәр вә тәһлүкәләри дә арадан галдырмаға еһтијаҹ вар”.
“Полис Гүввәләри ҹәмијјәтдә паралел олараг ҝүҹ вә мәрһәмәт һиссинә малик олмалыдыр” – дејә вурғулајан Һәзрәт Ајәтуллаһ Хаменеи әлавә етди: “Бу мәсәләјә тәһсил просесиндә, мүхтәлиф фәнләрин тәдрисиндә ҹидди диггәт јетирилмәлидир. Ҝүҹ вә мәрһәмәт һиссинин јанашы олмасы Полис Гүввәләриндә мүтләг бир тәшкилати мәдәнијјәтә чеврилмәлидир”.
Полис Гүввәләринин наил олдуғу ирәлиләјишә тохунан Ајәтуллаһ Хамнеји јени-јени наилијјәтләр үчүн зәминин һазыр олдуғуну билдирди. О деди: “Јени ирәлиләјиш сфераларына јалныз билик, тәҹрүбә, тәдгигат, дүшүнҹә, бүтүн имкан вә потенсиалларын сәфәрбәр едилмәси сајәсиндә наил олмаг мүмкүндүр”.
Имам Хамнеји һәмчинин вурғулады: “Әзиз Иранымызын нүфуз вә башуҹалығы өлкәмизин ҝәнҹләринин вә габагҹыл инсанларынын мөһкәм әзминдән асылыдыр. Аллаһын лүтфү сајәсиндә, бу әзм ҝүн-ҝүндән әввәлкиндән дә артыг мүшаһидә олунур”.
Али Мәгамлы Рәһбәрин чыхышындан сонра Полис Гүввәләринин команданы, бригада ҝенералы Әһмәди Могәддәм чыхыш едәрәк билдирди ки, команданлыг етдији структурун башлыҹа мәгсәди Полис Гүввәләриндә дахили, һабелә хариҹи ҝүҹ вә игтидарын формалашдырылмасы, диндар, ҝөзүачыг, пешәкар, шүҹаәтли, сәмәрәли вә јениләнмиш кадрларын јетишдирилмәси јолу илә ҹәмијјәтдә тәһлүкәсизлик, низам-интизам вә асајишин бәргәрар едилмәсидир. О деди: “Полис Гүввәләринин сон илләр әрзиндә әлдә етдији наилијјәтләр сырасында наркотикләрә гаршы мүбаризә үзрә ихтисаслашмыш полис алајынын јарадылмасыны вә өлкәјә кечирилән наркотик маддәләрин һәҹминин азалмасыны, сәрһәд хидмәти бирләшмәләринин тәшкилини вә нәтиҹәдә мүхтәлиф малларын, јанаҹағын, позуҹу мәдәнијјәт мәһсулларынын гачагмалчылығынын азалмасыны, асајиш вә тәһлүкәсизлијин позулмасы вә фитнә-фәсад әлејһинә гәтијјәтли шәкилдә мүбаризә апарылмасыны, ҹинајәтин ашкарланмасында мүшаһидә олунан сүрәт артымыны вә криминалистикада елми-техники методларын тәтбигини, ҹәмијјәтдә мәнәви-әхлаги тәһлүкәсизлијин ҝенишләндирилмәсини, вәтәндашлара ҝөстәрилән електрон хидмәтин мигјасынын 20 фаиз артырылмасыны, јол гәзаларынын вә бунун нәтиҹәсиндә үз верән хәсарәтләрин азалмасыны гејд етмәк олар”.
Полис Академијасынын команданы, икинҹи бригада ҝенералы Әссар да чыхыш едәрәк академијанын башлыҹа стратеҝијаларынын мүәјјән едилмәси вә рәсмиләшдирилмәсинә тохунараг деди: “Ихтисаслашмыш кафедраларын јарадылмасы, тәлимин сәмәрәли вә пешәкар сәвијјәјә чатдырылмасы, елми биликләрә әсасланма идејасынын институтлашдырылмасы Полис Академијасынын бакалавр вә маҝистр пилләләриндә рәһбәр тутдуғу башлыҹа јанашма принсипләридир”.
Мәрасим әснасында Полис Академијасынын нүмунәви тәләбә, мәзун, мүәллим вә ишчи кадрларындан бир нечәси, һәмчинин Полис Гүввәләри сыраларындан шәһид олмуш инсанларын аилә үзвләри Имам Хамнеји тәрәфиндән һәдијјәләр, һәрби рүтбә вә погонларла тәлтиф олундулар.
Полис Академијасында кечирилән бурахылыш мәрасими әлбәјаха дөјүш вә десант һәрәкәтләринин нүмајиши илә давам етди.
Мәрасимин сонунда мејданда дүзүлмүш бирләшмәләр Али Баш Команданын өнүндән тәнтәнәли парадла өтүб кечдиләр.
Диггәт: Хәбәрдән истифадә етдикдә мәнбәјә истинад лазымдыр
