Әһли Бејт -АБНА- хәбәр аҝентлијинин вердији хәбәрә әсасән:
Ислам Партијасынын сәдри Мөвсүм Сәмәдов вә партијанын бир нечә функсионеринин
һәбс олунмасы илә бағлы мәлумат вермишдик. Ҹинајәт Мәҹәлләсинин 28, 214.2.1, 214.2.3, 228.3 вә 278-ҹи маддәләри илә һәбс иттиһам олунан М.Сәмәдовун истинтаг материалларында диҝәр иттиһама да раст ҝәлинир. Ҝуја Мөвсүм Сәмәдов Губада јашајан јәһуди вәтәндашлара гаршы террор һазырлајырмыш. Бу иттаһамы кәскин тәнгид едән Милли Мәҹлисин Губа рајонундан сечилмиш јәһуди әсилли депутаты Јевда Абрамов Хәбәр.Инфо хәбәр порталына билдирди ки, Мөвсүм Сәмәдов чох јахшы инсандыр: “Онун бүтүн гоһум-әгрәбалары гәсәбәјә илләрлә ҝәлиб бизимлә ҝөрүшүбләр. Мөвсүм Сәмәдов јәһудиләрә гаршы неҹә терор едә биләр? Ким бу иттиһамы она гаршы сүрүб? Мөвсүм Сәмодовун јахынлары мәнимлә ән јахын адамлардыр. Онлар һәмишә вә инди дә гәсәбәдә јашајан јәһудиләрин һүзүр вә шәнлик мәҹлисләриндә иштирак едиб вә едирләр. Онун јахын гоһуму, Губанын ахунду һәр заман бүтүн бајрамларда гәсәбәдә олуб. Мән чох тәәҹҹүб едирәм, бунлар нә олан шејләрди. Баша дүшә билмирәм, сөһбәт һансы террордан ҝедир?”
Ијирми ҝүнә јахын бөлҝәдә олдуғуну дејән Ј.Абрамов әлавә етди: “Мән ијирми ҝүндүр ки, бөлҝәдәјәм. Кәндбәкәнд ҝәзирәм, јәһудиләр һамысы шад-хүррәм јашајырлар. Сөһбәт һансы террордан ҝедир, мән билмирәм. Әҝәр дедикләримә инанмырсынызса, Губа илә Бакынын арасы 165 км-дир. Һәлә мән дә бурдајам, ҝәлин ҹамааты сорғу-суал един. Сәһәрә гәдәр оғлан јенијетмәләр машын сүрүб ҝәзирләр бурда. Чох ҝөзәл дә горунурлар, саһә мүвәккили јериндә, сержантлар јериндә. Ҹамаатын тојлары ҝедир, хејир ишләри башланыб 29 ја да 30-да учуб ҝедирләр Москваја, дәрсләр башлајыр. Бу динҹ сакинләрин һәјатыны нијә позурлар. Ахы Азәрбајҹан дөвләтинин адына, имиҹинә хәләл ҝәтирир, бу ҹүр әсассыз вә мәнтигсиз иттиһамлар”.
Ј.Абрамов Мөвсүм Сәмәдовун террорла һеч бир әлагәсинин олмадығы гәнаәтдәдир: “...Онун бүтүн Губалы гоһумлары, гардашлары гәсәбәдә јахын инсанларла отуруб дурурлар, узун иллләрдир достлуг едирләр. Өзү дә ҝөзәл бир аиләдәндир. Диҝәр тәрәфдән бу иттиһам Исраилин Бакыдакы сәфирлији тәрәфиндән јајылыбса, буну билмирәм. Оранын тәһлүкәсизлик органлары бәлкә мүәјјән әмәлијјат материаллары әлә кечирибләр. Һәр һалда чох гәрибә иттиһамдыр”.
Диггәт: Хәбәрдән истифадә етдикдә мәнбәјә истинад лазымдыр
