Әһли Бејт -АБНА- хәбәр аҝентлијинин вердији хәбәрә әсасән:
Просеc башлајан кими Вагиф Абдуллајевин вә Руфулла Ахундзадәнин вәкилләри вәсатәтлә чыхыш етдиләр. В.Абдуллајевин вәкили билдириб ки, һүгугларыны мүдафиә етдији шәхс барәдә чыхарылмыш һәбс гәтимкан тәдбиринин мүддәти 17 ијулда битсә дә, о, һәлә дә һәбсдә сахланылыр. Вәкил вәсатәтиндә Вагиф Абдуллајевин дәрһал азад едилмәсини вә онун ганунсуз олараг һәбсдә сахланылмасында тәгсири оланларын ҹәзаландырылмасыны тәләб едиб. Аналожи вәсатәтлә Руфулла Ахундзадәнин дә вәкили чыхыш едиб.
Мөвсүм Сәмәдовун вәкили Анар Гасымов вәсатәти мүдафиә едәрәк бидириб ки, белә вәсатәтләрин тәмин олунмамасынын ҝәләҹәкдә Авропа Мәһкәмәсиндә Азәрбајҹана гаршы хошаҝәлмәз гәрарларын чыхарылмасына сәбәб ола биләр. Дөвләт иттиһамчысы исә вәсатәтин әсассыз олдуғуну билдириб, онун рәдд едилмәсини хаһиш едиб. Мүшавирәдән сонра һаким вәсатәтин рәдд дилмәси илә бағлы гәрар гәбул олунуб.
Бундан сонра Вагиф Абдуллајевин ифадәси динләнилиб. О, 6 ајда мүстәнтигләрин ишин маһијјәтинә ујғун суаллар вермәдијини билдириб: “Онлар мәндән сорушмајыблар ки, бу силаһлар һардандыр вә нә мәгсәдлә әлдә етмисән? Әҝәр доғурдан да мәним евимдән силаһ чыхыбса, онлар мәнә бу суаллары вермәлијдиләр. Мәни терроризмдә тәгсирли билирләр. Амма сорушмајыблар ки, террор актыны кимә гаршы вә киминлә һазырлајырдын? Мән баша дүшә билмирәм ки, Губада дини тәригәт дејәндә һансы тәригәт нәзәрдә тутулур? Азәрбајҹан диндарлары һәмишә террора гаршы чыхыблар, чүнки террорчунун миллијәти, дини олмур. Мәним партијанын иҹласларына адам дәвәт етмәјимә ҝәлинҹә, бу, Вагиф Абдуллајевин шәхси иши јох, тутдуғу вәзифә сәлаһијјәтләри иди. Мән инсанлары шәхси истәјимә ҝөрә чағырмамышам, бу мәним вәзифә борҹум иди. Мәним һәбс мүддәтим артырыланда үзләшмә кечириләҹәји илә әсасландырылды. Анҹаг 6 ај кечиб, анҹаг һеч бир үзләшмә апарылмајыб. Дүнјада елә бир дөвләт танымырам ки, ләјагәтли оғланларына террорчу ады версин. Мәним бир дүшмәним вар о да ермәнидир. 60 јашым олмасына бахмајараг, сәнҝәрдә дүшмәнлә вурушмаға һазырам”.
Ифадә вердикдән сонра В.Абдуллајевин прокурорун суалларына ҹаваб верәрәк билдириб ки, 2003-ҹү илдән партијанын үзвүдүр вә Мөвсүм Сәмәдову 2007-ҹи илдән таныјыр. Ислам Партијасынын мәрамынын нәдән ибарәт олмасы суалына ҹаваб верән тәгсирләндирилән шәхс “Азәрбајҹан ганунларындан кәнара чыхмадан Азәрбајҹанын марагларына гуллуг етмәк” дејә ҹаваб вериб.
Азәрбајҹанда шәриәт дөвләтинин гурулмасы илә бағлы һансыса бир чыхышлар олуб-олмамасы барәдә суала ҹаваб верән В.Абдуллајев дејиб ки, партијанын белә мәгсәди олмајыб. “Азәрбајҹан ганунларына ҝөрә, һәр бир вәтәндашын дини етигад азадлығы вар вә партијанын иҹласларында белә чыхышлар олмајыб. Партијанын 2 јанвар иҹласында Мөвсүм Сәмәдовун чыхышына ҝәлдикдә исә һәмин иҹласда өлкәдәки ҹари вәзијјәт мүзакирә олунуб. Мөвсүм Сәмәдов даим гануна һөрмәт етмәјә чағырыб вә онун чыхышлары ганундан кәнар олмајыб”.
Бундан сонра вәкил Анар Гасымов В.Абдуллајевә партијанын фәалијјәти илә бағлы суаллар вериб. Ҹавабында Вагиф Абдуллајев билдириб ки, партијанын фәалијјәти илә бағлы Әдлијјә Назирлијиндән һәр һансы гадағанедиҹи мәктуб вә ја сәнәд дахил олмајыб, буна ҝөрә дә партијанын фәалијјәти гејри-гануни сајыла билмәз. “Азәрбајҹанда диҝәр партијалар да вар ки, гејдијјатсыз фәалијјәт ҝөстәрир. Чүнки гејдијјатдан кечмәк үчүн мүәјјән фәалијјәт олмалыдыр”.
Сөзүҝедән иҹласын нә үчүн мәһз бајрам ҝүнү кечирилдијинә ајдынлыг ҝәтирән Вагиф Абдуллајев сөјләјиб ки, бәзи үзвләр дөвләт ишиндә ишләдијиндән башга вахт ҝәлә билмәдији үчүн иҹлас гејри-иш ҝүнүндә кечирилиб.
Һакимин “Мөвсүм Сәмәдовун чыхышыны ешитмисинизми, орада ҹиһада чағырышлар олубму” суалына ҹавабында дејиб: “Мән Мөвсүм Сәмәдовун белә бир чыхышыны ешитмәмишәм ки, орада ҹиһада чағырыш олсун”.
Суаллара ҹаваблар динләнилдикдән сонра һаким Вагиф Абдуллајевин илкин ифадәләринин мәһкәмәдә вердији ифадәләрә зиддијјәт тәшкил етдијини она ирад тутуб.
Бундан сонра сөз Фәрамиз Аббасова верилди. О ифадәсиндә гејд етди ки, һаггында ирәли сүрүлән иттиһамлары өзүнә тәһгир билир: “Мән бу суаллары ҹавабландырмағы да тәһгир һесаб едирәм. Мән дини тәблиғатла мәшғул олмушам. Һеч вахт сијасәтлә мәшғул олмамышам. Инсанлары да динә, пис әмәлләрдән узаг олмаға чағырмышам. Мән Гурандан вә сүннәтдән гыраға чыхмамышам. Рүшвәтхорлуг, наркоманија, әхлагсызлыға гаршы амансыз мүбаризә апармышам. Һиҹаб гадағасына етираз етмишәм. Чүнки бу бизим конститусион һүгугумуздур. Һәлә 1828-ҹи илдә Ирәванда јашајанларын 73 фаизи мүсәлманлар иди вә бурада әввәлҹә дини сырадан чыхартдылар. Беләликлә дә 100 ил кечмәмиш Ирәваны итирдик.
Прокурорун “нә илә доланырсан” суалына Фәрамиз Аббасова белә ҹаваб верди: “Мән сејид-пејғәмбәр өвладыјам. Үрәји истәјәнләр нәзир верир, онун һесабына доланырам”.
Ф.Аббасов иттиһам актында “јанлыш дини тәблиғат” апармасы илә бағлы билдириләнләрә етираз етди вә гурандан ситат ҝәтирмәклә изаһат тәләб етди: “Мәнә елә бир сүбут ҝәтирин ки, һәгигәтән дә мәним јанлыш тәблиғат апардығымы сүбут олунсун”.
Ф.Аббасовун ифадәси динләнилдикдән сонра просесдә фасилә елан олунду. Фасиләдән сонра ики вәкилин просесдә иштирак етмәдијинә ҝөрә һаким мәһкәмә иҹласыны августун 19-да саат 10:00 тәјин едиб.
Хатырладаг ки, Мөвсүм Сәмәдов бу ил јанварын 7–дә сахланылараг барәсиндә 13 суткалыг инзибати һәбс сечилиб. Нәсими рајон мәһкәмәси тәрәфиндән јанварын 20-дә М.Сәмәдов барәсиндә 3 ајлыг һәбс гәтимкан тәдбири сечылыб вә Азәрбаҹан Республикасы Баш Прокуролуғунун ағыр ҹинајәтләрә даир ишләр идарәсиндә истинтага башланылыб. АИП сәдри һакимијјәти зорла әлә кечирмә ҹәһдиндә вә ја ону зорла сахлама, ганунсуз олараг одлу силаһдан вә ја силаһ гисминдә истифадә олунан васитәләрдән истифадә етмәклә ҹинајәтә һазырлыгда иттиһам олунур.
