Әһли Бејт -АБНА- хәбәр аҝентлијинин вердији хәбәрә әсасән: Президент Администрасијасынын шөбә мүдири Әли Һәсәнов “Јени Мүсават” гәзетинә мүсаһибә вериб. О, илк суала ҹавабында һәлә гангарачылығы кечмәмиш Түркијә баш назири Рәҹәб Тајјиб Әрдоғанын Бакы сәфәрини “бәһ-бәһ”лә тәгдим едиб: “Сәфәри чох мүсбәт дәјәрләндирирәм. Бу сәфәр илк нөвбәдә ону ҝөстәрди ки, Азәрбајҹанла Түркијә арасына ҝирмәк истәјәнләр, бу ики аналогу олмајан, дост, мүттәфиг, гардаш дөвләти бир-биринә салышдырмаг истәјәнләр вар”.
Бу ситаты охујандан сонра бир хејли суаллар вә фикирләр јараныр ки, ону да һөрмәтли охуҹунун диггәтинә чатдырмаг ваҹибдир. Биринҹиси, Түркијә кими Азәрбајҹана әһәмијјәтли олан бир дөвләтин сијаси лидерилә бу мүнасибәт нәдән гајнагланыр? Јохса, Илһам Әлијев Казан ҝөрүшүнүн тәҹрүбәсиндән јарарланыр? Јәни, әввәлҹә разылыг верир, ҝөрүш вахты имтина едир. Белә олмасајды, Әрдоған кими һәр аддымындан фајда ҝөтүрмәји планлашдыран бир сијасәтчи бу бојда јолу Илһам Әлијевлә бирликдә Сәркисјаны һәдәләмәк үчүн ҝәлмәзди.
Ҝөрүндүјү кими, ортада чох ҹидди проблемләр вар. Ејни заманда, Әли Һәсәнов ҝуја, ҹаныјананлыг еләјиб дејир ки, “арамыза ҝирмәк истәјәнләр вар”. Адамдан сорушмазлармы ки, гардаш, араныз нә бојда ачылыб ки, ора Русија вә Иран кими ики нәһәнҝ сығышыр? Бу нә ара вермәкди белә сиздә? Бир гәдәр мәнтигли олмаг, сијаси ишин гајдаларына әмәл етмәк, гоншу вә дост дөвләтләрлә давранмағын јолуну билмәк лазым дејилми? Мәнҹә, лазымды. Јохса, јағла шорун гијмәти бир олан базарда асмаға адам ахтаранда илк ағла ҝәлән “башы јекә, бојну балаҹа”ны едам етмәкдир ки, бу критерија да илк нөвбәдә сизә сәрф еләмир.
Әлагә нә әлагә...
Әли Һәсәнов етмәјиб тәнбәллик, Түркијә илә әмәкдашлығын инкишаф едән саһәләрини садалајыб: “Сөзүн һәгиги мәнасында бүтүн саһәләрдә, демәк олар ки, реҝионал, бејнәлхалг мүнасибәтләрдә, терроризмә гаршы мүбаризә мәсәләләриндә, игтисади, сијаси әлагәләрдә, енержи саһәсиндә әмәкдашлыгда һәр ики дөвләт башчысы ики өлкә арасындакы мүнасибәтләри аналогу олмајан, стратежи мүттәфиглијә әсасланан вә сүрәтлә инкишаф едән әлагәләр кими характеризә етдиләр”.
Башлајаг реҝионал саһәдән; Әли Һәсәновун өзү демирдими ки, Түркијә илә мүнасибәтләримизи бу өлкәни НАТО үзвү кими гәбул едәндән сонра гуруруг? Бу бәјанатдан сонра дуруб да “Реҝионал әмәкдашлығымыз вар” дејәндә адама ҝүлмәзләрми? Јахуд да Әли Һәсәнов өзү билмирми ки, онун да чалышдығы администрасија вар ҝүҹү илә Москваја гошулуб Ҹәнуби Гафгазда Түркијәни сыхышдырыр? Буну Илһам Әлијев АБШ дипломатларына шәхсән демәјибми? Нә еһтијаҹ вар иди, инди бунлары хатырладыб өз рәһбәрини јенидән ифша етмәјә?
Енержи саһәсиндәки әмәкдашлығы да ҝөрдүк. Елә үрәклә дејир ки, ҝуја, газ сазиши имзаланыб вә биз бундан хәбәрсизик. Илһам Әлијевин реҝионун енержи мәркәзинә чеврилмәсини истәмәдији өлкә Түркијә дејилми, һөрмәтли сијасәт узманы? Ахы белә ҝүнаһлары олан адамлар ҝәрәк башгаларынын әсәбләринә тохунан һәрәкәтләр етмәсинләр...
Сима итирмәк горхусу...
Бир ҝүндә өзүнү ән чох тәкзиб едән мәмур кими јадда галан Әли Һәсәнов мүхалифәтин үнванына да иттиһамлар сәсләндириб. Мүхбир, АХҸП сәдри Әли Кәримлинин “мүһарибә башласа, һакимијјәт мүхалифәтин дәстәјинә үмид едә биләр” фикирләринә Әли Һәсәновдан мүнасибәт өјрәнәркән ПА-нын шөбә мүдири белә ҹаваб вериб: “Гарабағ мәсәләсиндә онлар игтидара дәстәк вермәјә мәҹбурдулар. Чүнки әкс тәгдирдә олуб-галан сималарыны да итирәрләр вә халгын ичәрисинә чыхмаға үзләри галмаз. Гој онлар тәк Дағлыг Гарабағ мәсәләсиндә игтидарын јүрүтдүјү сијасәти дәстәкләмәсин, Азәрбајҹан халгынын мараглары үзәриндә гурулмуш диҝәр мәсәләләри дә дәстәкләсинләр. Мәлумдур ки, Гарабағ мәсәләсиндә игтидарын јүрүтдүјү сијасәт онсуз да оппонентә еһтијаҹ олмајан сијасәтдир. Белә сијасәтдә игтидары дәстәкләмәјә нә вар ки?”
Биринҹиси, Әли Һәсәнов чох да севинҹәк олмасын. Азәрбајҹан мүхалифәти Илһам Әлијевин Гарабағ сијасәтини дәстәкләмир. Гарабағы мүдафиә едир. Дөвләтин дәјишмәз марагларыны мүдафиә едир. О марагларын ичәрисиндә исә Илһам Әлијевин мүзакирәјә чыхармағы гәбул етдији вә кечирилмәсинә разылыг вердији референдум мәсәләси јохдур. Сөһбәт Гарабағы Азәрбајҹандан ајырмаг үчүн нәзәрдә тутулан референдумдан ҝедир. Бу сијасәти ким дәстәкләјәр ки? Јалныз бу халга гәним кәсилмиш, шәхси мараглары наминә дөвләти талајанлар вә бир дә бу таланчылыгдан гарныны дојурмағы уманлар...
Илһам Әлијевин сијасәти нәтиҹәсиндә Азәрбајҹан дүнјада фактики мүттәфигсиз галмајыбмы? Бүтүн бејнәлхалг тәһлүкәсизлик чәтирләриндән бу һакимијјәтин сијасәти нәтиҹәсиндә мәһрум олмамышыгмы? Илһам Әлијев Азәрбајҹан Ордусуну 60-ҹы илләрин совет силаһлары илә силаһландырмаға “Гарабағ сијасәти” дејирсә, биз дә дејирик ки, инди Т-72 илә Русијада донуз отарырлар, мүһарибә еләмирләр. Биз исә чохдан колхоз сијасәтинә “јох” демишик. Бизим бир халг олараг, торпагларымызы мүһарибә јолу илә ҝери алмаг һаггымыз вар. Биз халгымызын бу һаггыны дәстәкләјирик. Јохса ки, мүһарибә бәјанатларыны ҝүлүш објектинә чевирән һакимијјәтин гејри-ҹидди аддымларынын гајғысыны чәкмәк кими бир фикримиз јохдур. Биз садәҹә, халгымызы дәстәкләјир вә ону хәбәрдар едирик ки, әҝәр бу ҹүр јарытмаз бир һөкумәт мүһарибә етсә, биз она гаршы јени ҹәбһә ачмарыг, торпагларымыз наминә мүһарибәјә дәстәк верәрик, силаһа сарыларыг. Јохса, бизи өз сијасәтини дәстәкләјирик кими тәгдим едиб, сонра да миннәт гојмаг... Әли Һәсәнов үчүн чох тезди.
Иштаһ диш алтындајмыш...
Әли Һәсәновун фикринҹә, Гәрб, о ҹүмләдән АБШ Азәрбајҹан һөкумәтини тәнгид едәндә биз һакимијјәтә дәстәк вермәлијик. Ај сағ ол, бу зәкаја ҝөрә. Биздән Гүдрәт Һәсәнгулијев олмағы истәјирсиз? АБШ нә вахт милли марагларымызы тапдајан бәјанат вериб, аддым атыб ки? Хәзәрдә Русија силаһланыр, бизә јардым тәклиф едир, Иран силаһланыр, онун кими. Русија тәпәгапаз едиб Казанда Гарабағы әлиниздән алаҹагды, буну да о Гәрб әнҝәлләмәдими? Брүссел ҝөрүшү олмасајды, Илһам Әлијев әввәлҹәдән вердији сөзү поза биләҹәкдими? Бәлкә ҝәләк, Илһам Әлијев лент кәсәндә әл чалаг? Өзүнүзә јахшы бахын.
Сејмур Һәзи
Диггәт:
