Әһли Бејт -АБНА- хәбәр аҝентлијинин вердији хәбәрә әсасән: Академик Зија Бүнјадовун гәтлилә бағлы “Азадлыг”ын өтән сајларынын бириндә сабиг полис забити Салман Әлијевин ачыгламасы дәрҹ едилмишди. Һәмин ачыгламада сабиг полис ишчиси Зија Бүнјадовун да Дахили Ишләр Назирлијинин әмәкдашлары тәрәфиндән гәтлә јетирилдијини билдирмишди. Лакин Салман Әлијев олајла бағлы тәфәррүатлары ачыгламаг истәмәмишди. Буна бахмајараг сабиг полис забити илә нөвбәти дәфә әлагә сахлајараг бәзи деталлары диггәтимизә чатдырмасыны хаһиш етдик. О, бәзи тәфәррүатлары ачыглајаҹағына разылыг верди.
Гәтллә бағлы илк мәлумат
Салман Әлијев дејир ки, Зија Бүнјадов гәтлә јетириләндә о, Бәрдә рајон полис шөбәсиндә әмәлијјат мүвәккили ишләјиб. Әјаләтдә әмәлијјатчы олмасына бахмајараг, академикин гәтлилә бағлы ДИН-ә илк мәлумат верән шәхсләрдән олуб: “Һәмин мәлумат исә Зија Бүнјадовун дахили ишләр органларында көк салмыш бир дәстә тәрәфиндән гәтлә јетирилмәси барәдә иди. Мәһз бундан сонра мәни сабиг баш прокурор Елдар Һәсәновун мәктубу әсасында Зија Бүнјадовун гәтлилә бағлы јарадылан әмәлијјат-истинтаг групуна дахил етдиләр”. Салман Әлијев дејир ки, академикин гәтли илә бағлы ики әмәлијјат-истинтаг групу јарадылыб. О, биринҹи әмәлијјат-истинтаг групунун тәркибиндә фәалијјәт ҝөстәриб. Гәтллә бағлы арашдырмалар заманы кифајәт гәдәр фәаллыг ҝөстәриб. ДИН-дәки дәстә барәдә тутарлы фактлар әлдә едәрәк истинтага тәгдим едиб: “Сүбутлар, дәлилләр, мәлуматлар демәјә әсас верирди ки, Зија Бүнјадов ДИН-ин бир груп әмәкдашы тәрәфиндән гәтлә јетирилиб. Лакин иши сона чатдырмаға имкан вермәдиләр. Әмәлијјат-истинтаг групунун үзвләринә, хүсусилә мәнә гаршы ҹидди тәзјигләр башлады. Бу тәзјигләрин архасында ДИН рәһбәрлији ҝөрүнсә дә, мәнә бәлли иди ки, сифариш даһа јухары сәвијјәләрдән ҝәлиб”.
Ики әмәлијјат - истинтаг групу
Салман Әлијевин сөзләринә ҝөрә, Зија Бүнјадовун гәтлиндә әсл ҝүнаһкарлары мәсулијјәтдән кәнарда сахламаг үчүн әмәлијјат-истинтаг групу јениси илә әвәзләнди: “Биринҹи групун үзвү олан баш прокурорлуғун мүһүм ишләр үзрә ики баш мүстәнтиги ҝуја истинтагы башга сәмтә јөнәлтдикләринә ҝөрә ҹинајәт мәсулијјәтинә ҹәлб олунду. Онлардан бири һәбс едилди, диҝәри исә ахтарыша верилди. Мәним дә һәбсимә һазырлыг ҝедирди. Лакин мән һәмин әрәфәдә Рамил Усубова мүраҹиәт едәрәк иш јеримин дәјишдирилмәсини хаһиш етдим. Инсафән, Рамил Усубов хаһишими рәдд етмәди. Вә мән Нахчыван Мухтар Республикасына ҝөндәрилдим. Гыса мүддәт әрзиндә орадакы фәалијјәтимлә Мухтар Республика рәһбәрлијинин диггәтини ҹәлб етдим. Һәтта онларын тәгдиматы илә 2002-ҹи илдә ”Иҝидлијә ҝөрә” медалы илә тәлтиф олундум. Лакин бурада олдуғум мүддәтдә дә Зија Бүнјадовун гәтли илә бағлы изинә дүшдүјүм дахили ишләр органларындакы дәстә барәдә мәлуматлар алырдым. Ҝөрүнүр, кимләрсә дә мәним фәалијјәтими ҹидди изләјирди. Она ҝөрә дә бир мүддәтдән сонра Нахчыванда да тәзјиг вә тәгибләрә мәруз галдым”.
Салман Әлијевин сөзләринә ҝөрә, икинҹи әмәлијјат-истинтаг групу сифаришлә ҹинајәти “Һизбуллаһ” тәшкилатынын үзәринә јөнәлтди. Бунунла да академикин гатилләри мәсулијјәтдән кәнарда галды.
МТН Зија Бүнјадовун гәтлә јетирилдији силаһы нә едиб?
Сабиг полис забити иддиа едир ки, Зија Бүнјадовун гәтлинин ДИН әмәкдашлары тәрәфиндән төрәдилмәсилә бағлы чохсајлы шаһид ифадәләри олуб: “Бу шаһидләрин бир чохуну мән мүәјјән етмишдим. Ҹинајәт демәк олар ки, ачылмышды. ДИН рәһбәрлијинин дә бундан хәбәри вар иди. Һәтта һакимијјәтин јухары сәвијјәләриндә дә билирдиләр ки, Зија Бүнјадову кимин сифариши илә кимләр гәтлә јетириб. Лакин бизә имкан вермәдиләр. Бәзи мәгамлар вар, мән ачыглаја билмирәм. Чүнки бу мәгамлары инди ачыгламағым һәмин ишин ҝәләҹәкдә објектив арашдырылмасына мәнфи тәсир ҝөстәрә биләр. Заманы ҝәләндә иҹтимаијјәт һәр шеји биләҹәк”.
Салман Әлијевин сөзләринә ҝөрә, Зија Бүнјадовун гәтлинин ачылмасында ҝөстәрдији фәаллыға ҝөрә мәруз галдығы тәзјигләрин пик нөгтәси һәбс едилмәси олуб: “Доғрудур, мән бир мүддәт сонра һәбс олундум. Лакин һәбсимин әсас сәбәби мәһз бу мәсәлә илә бағлы иди. Билирдиләр ки, мән артыг ДИН-дәки ҹинајәткар дәстә илә бағлы чох мәлуматлыјам. Вә ара-сыра бу барәдә чәкинмәдән, горхмадан данышырам. Она ҝөрә дә мәни сусдурмаг үчүн гондарма иттиһамларла һәбсә атдылар. Һәбсдә олдуғум мүддәтдә амансыз ишҝәнҹәләрә мәруз галдым. Бу ишҝәнҹәләр өлүмә бәрабәр иди. Фактики олараг мәни ҹисмани мәһв етмәк истәјирдиләр. Бунунла јанашы мәнәви террора да мәруз галмышдым. Елә бир шәр, бөһтан олмады ки, үзәримә атмасынлар”.
Сабиг полис ишчиси билдирир ки, МТН-нин “Гара кәмәр” әмәлијјаты јарымчыг һәјата кечирилиб. МТН рәһбәрлији бу мәсәләдә ҹинајәтин там ачылмасында дејил, рәгибинин зәрәрсизләшдирилмәсиндә мараглы олуб: “Конкрет бир факты хатырладым. Јадыныздадырса, әмәлијјатдан дәрһал сонра МТН-нин јајдығы ачыгламада Зија Бүнјадовун да гәтлилә бағлы мәгамлар өз әксини тапмышды. Лакин сонрадан бунун үзәриндән сүкутла кечилди. Бир чохлары МТН-нин ачыгламасындакы Зија Бүнјадовла бағлы мәгамларын јанлыш олдуғуну дүшүнсә дә, сәһв едир. Әслиндә, МТН әсассыз мәлумат јајмамышды. Әлдә етдијим мәлумата ҝөрә, Һаҹы Мәммәдовун дәстәси зәрәрсизләшдириләндә онларын үзәриндән Зија Бүнјадовун гәтлә јетирилдији силаһ тапылмышды. Һесаб едирәм ки, бу мәсәләнин сонрадан кәнара атылмасы, Һаҹы Мәммәдовун бәзи шок ачыгламалар верә биләҹәји нараһатлығындан доғуб. Һәмчинин ајдын олаҹагды ки, бу ишлә бағлы башга шәхсләр әсассыз олараг мәһкум олунуб”.
Закир Нәсиров, һәтта Рамил Усубов сусмаға мәҹбур олуб
Онун сөзләринә ҝөрә, Һаҹы Мәммәдов вә бандасынын чохсајлы ҹинајәтләринин үстү ачылмајыб. Ејни заманда бу банда илә әлагәли олан башга дәстәләр дә азадлыгда галыб: “Тәсадүфи дејил ки, Һаҹы Мәммәдов да мәһкәмәдә башга дәстәләрин мөвҹудлуғуна ишарә вурмушду. О, бунунла дәстә башчысы олмадығыны, бу ҹинајәтләри өз ирадәсилә төрәтмәдијинә ејһам вурурду. Закир Нәсировун исә, үмумијјәтлә, бу дәстәјә аидијјәти јохдур. Ону таныјанлар билир ки, о, истәсә белә, бу дәстәјә һимајәдарлыг едә билмәзди. Бундан башга, Закир Нәсировун дөвләтимиз вә милләтимиз гаршысында мүһүм хидмәтләри олуб. Буну данмаг олмаз.
Закир Нәсиров башгасынын тәгсири үзүндән мәһбәсдә јатыр. Әҝәр о, Һаҹы Мәммәдовла әлагәли олубса, онун дәстәсини һимајә едибсә, демәли, Рамил Усубовун да бундан хәбәри олуб. Ола биләр ки, Закир Нәсиров ДИН-дә белә бир дәстәнин мөвҹудлуғуну билиб. Әҝәр мәним кими ади әмәлијјатчы буну билибсә, шүбһәсиз, узун илләр Баш Ҹинајәт Ахтарыш Идарәсинин рәиси олмуш шәхс дә Һаҹы Мәммәдов вә онун бандасы барәдә мәлуматлы олуб. Һәтта мән билдијимә ҝөрә, бу дәстәнин ифша олунмасына чалышыб. Елә бу сәбәбдән дә бу ҝүн мәһбәсдәдир. Јери ҝәлмишкән, сабиг полис забити кими диггәтинизә бир мараглы мәгамы да чатдырым. Ҝенерал Закир Нәсировун ҝүнаһсыз јерә һәбс едилмәси полис ишчиләринин әһәмијјәтли һиссәсиндә һөкумәтә гаршы бөјүк инамсызлыг јаратды”.
Видади
Диггәт: Хәбәрдән истифадә етдикдә мәнбәјә истинад лазымдыр
