Әһли Бејт -АБНА- хәбәр аҝентлијинин вердији хәбәрә әсасән: Һәлә Советләр дурумунда Комунистләрин Азәрбајҹанын милли минталитетинә вура билмәдији зәрбәләри әлијевләр өз гурдуглары режиминдә чох асанлыгла вура билмишләр. Мәсәлә орасындадыр ки, сон ачыгланан рәсми стастикада адәт әнәнәмизә зидд олан бир реаллығы ортаја гојуб. Алты ај әрзиндә 40 минә јахын вәтәндаш ниҝаһ бағлајыбса, бу мүддәтдә 6000-ә јахын ҹүтлүк ниҝаһы позуб. Садә диллә десәк, инди јени евләнән һәр 10 аиләдән бири бошаныр. Чәтин гурулан аиләләр, асан дағылыр. Бүтүн бу нараһатлыглар фонунда “АНС”әмәкдашы садә бир суала ҹаваб тапмаға чалышыб. Биз нијә бошанырыг ?
Әзијјәтлә гурулан ики нәфәрин иттифагынын тез дағылмасынын сәбәбләрини мүтәхәссисләр мүхтәлиф ҹүр изаһ едир. Онларын фикринҹә техналоҝијанын сүрәтлә инкишаф етдији бир дөврдә инди әр вә арвад бир-бирининин истәк вә арзуларына даһа аз дөзүм нүмајиш етдирирләр. Јәни гысасы онлар мүәјјән мәсәләләрдә компромисә ҝетмирләр.
“Мәнә елә ҝәлир ки, аиләләрин бошанмасынын сәбәби статус проблемидир. Тәссүфләр олсун ки, ҹәмијјәтдә психолоҝија деградасијаја уғрајыб. Чүнки инсанлар даһа јахшы, даһа ҝөзәли истәјирләр, амма гаршы тәрәфин марагларын нәзәрә алмырлар. Вә мүнаисбәтләр мүәјјән мүддәтдән сонра ҝәтириб конфиликтләрә чыхарыр” – дејә психолог Мурад Исајев билдириб.
Сосиолог Рафиг Тәмразов исә һесаб едир ки, бу проблем тәминатын мүхтәлифлијинә ҝөрә, өзүнү фәргли шәкилләрдә ҝөстәрир: “Даһа чох аз тәминатлы аиләләрдә бу һал мадијјәтлә бағлы олур. Мәнзил-сосиал-игтисади шәраитләр вә с. Амма нисбәтән имканлы аиләләрдә психоложи факторлар, мәнәви факторлар вә ујғунсузлуг вә хәјанәт мәсәләләри олур ки, бунунла бағлы бошанма һаллары баш верир”.
Мүтәхәссисләр тәзә гурулан аиләләрин бирлијинин узун мүддәт давам етмәмәсинин бир сәбәбини дә бир араја ҝәлән гызла оғланын бир-бирини јахшы танымамасында ҝөрүр. Онларын гәнаәтинҹә, ҹүтлүкләр сечим едәркән һәтта бир-бириләринин характерләри барәсиндә јетәринҹә мәлумат топламадан ниҝаһа ҝирмәјә тәләсирләр .
“Вахтилә аилә гураркән инсанлар бир-бирини таныјырды вә бир-бири барәсиндә мәлуматлыјды. Кимин нәслиндә һансы хәстәлик вар, кимин нәслиндә һансы проблмли инсан вар вә бу һагда да мәлуматлары олурду. Бу мәсәләләрә чох диггәт јетирилирди. Һәтта мүәјјнләшдирилирди ки, бунун нәслиндә, ҝениндә ирси хәстәлик вармы. Амма бу ҝүн мүнасибәтләр неҹәдир. Биз садәҹә тәләсирик аилә гурмаға, биз тәләсирик оғлумузу евләндирмәјә, биз тәләсирик гызымызы әрә вермәјә” – дејә аилә вә гадин мәсәләләри үзрә мүтәхәссис Меһрибан Зејналова билдириб.
Тәзә гурулан аиләләрин ишләринә бәзән валидејнләрин мүдахиләси, сонсузлуг промлеми, һәтта Азәрбајҹан телевизијаларында мәнәвијјата зидд олан сериалларын нүмајишинин дә аиләнин дағылмасыны сүрәтләндирән сәбәбләр сырасында ҝөстәрилир. Експертләр һәјәҹан тәбили чалыр ки, әҝәр вәзијјәт белә давам етсә Азәрбајҹанда бошанма артыг ади һала чевриләҹәк. Бу исә бизим милли мәнәвијатымыза бөјүк бир зәрбәдир.
Диггәт: Хәбәрдән истифадә етдикдә мәнбәјә истинад лазымдыр
