Әһли Бејт -АБНА- хәбәр аҝентлијинин вердији хәбәрә әсасән: Инсан һаглары вә демократијаны позмасына ҝөрә Азәрбајҹан һакимијјәтинин үнванына бејнәлхалг аләмдән ҝәлән тәнгидләрә сон заманлар јени чалар әлавә олунуб. Сөһбәт артыг Нахчыван Али Мәҹлисинин сәдри Васиф Талыбовун адынын јарлыгда бејнәлхалг һесабатлара дүшмәсиндән ҝедир. Артыг бир мүддәтдир ки, В.Талыбовун Нахчывандакы фәалијјәтини дүнјанын бүтүн танынмыш бејнәлхалг тәшкилатлары ҹидди тәнгид едир.
Һүгуг мүдафиәчиси Лејла Јунусун фикринҹә, В.Талыбовун һесабатларда адынын ајрыҹа ҝөстәрилмәси Нахчывандакы вәзијјәти чылпаглығы илә ҝөстәрир. Нахчываны Азәрбајҹанын Түркмәнистаны сајан Л.Јунус ону да әлавә етди ки, бир гајда олараг Нахчыванда сынагдан кечирилән демократијанын боғулмасы истигамәтиндәки “пројектләр” даһа сонра бүтүн Азәрбајҹанда тәтбиг олунур: “Әввәлҹә Нахчыванда инсанларын сәрбәст шәкилдә топлашмасы ҹидди шәкилдә мәһдудлашдырылырды. Даһа сонра бу, бүтүн Азәрбајҹана сирајәт етди. Әввәлләр хариҹи журналистләрин, дипломатларын јалныз Нахчывана ҝәлиши проблемли идисә, инди Азәрбајҹана бејнәлхалг тәшкилатларын тәмсилчиләринин ҝәлмәсинә имкан јарадылмыр. Бу, бир даһа ҝөстәрир ки, Азәрбајҹан һакимијјәти өнҹә Нахчыванда өзүнүн антидемократик аддымларыны сынагдан чыхартдыгдан сонра бүтүн Азәрбајҹана јајыр. Мәһз бу бахымдан Васиф Талыбовун адынын ајрыҹа бејнәлхалг һесабатлара дүшмәси тәәҹҹүблү дејил”.
Диггәт: Хәбәрдән истифадә етдикдә мәнбәјә истинад лазымдыр
