Әһли Бејт -АБНА- хәбәр аҝентлијинин вердији хәбәрә әсасән: Ијулун 19-да Сүлһ вә Демократија Институту шар бајрамы тәшкил едиб.
Институтун рәһбәри Лејла Јунус дејир ки, мәгсәд президент Илһам Әлијевин коррупсијаја гаршы мүбаризә кампанијасына дәстәк вермәкдир. Һәлә тәдбирдән өнҹә институтун әмәкдашлары офисләринин гаршысында ағаҹа шарлар бәркидибләр, диварлара плакатлар јапышдырыблар. Полис әразијә ҝәләрәк шарлары партладыб, плакатлары ҹырыб.
Лејла Јунус: «Биз президентин коррупсијаја гаршы мүбаризәси уғрунда вурушуруг. Полис дә буна гаршы чыхыр. Үзәриндә «Гануна һә, коррупсијаја јох!» јаздығымыз шарлары партладыблар. Полис гануну позур, чүнки бизим һаггымыз вар ки, евимизин гаршысына үзәриндә «Гануна һә, коррупсијаја јох!» јаздығымыз шарлары гојаг».
Тәдбирин кечирилдији јерә ҝәлән Нәсими рајон Полис Идарәсинин шөбә рәиси Мухтар Мухтаров исә чох анлашылмаз сүрәтдә дејир ки, Сүлһ вә Демократија Институту инсанлары бура топламагла иҹтимаи асајиши позур:
«Лејла Јунус шарлары ораја асмагла ҹамаатын диггәтини чәкир. Иҹтимаи асајиш позулур бурда. Өз гануни һүгугларыны ганун јолу илә горусунлар. Һансыса гурумдан шикајәтчидирләрсә, мәһкәмәјә, иҹра һакимијјәтинә мүраҹиәт етсинләр».
Полис әразидән ҝедәндән сонра Сүлһ вә Демократија Институтунун әмәкдашлары бајрамларыны кечирмәјә мүвәффәг олублар, әлләриндә шарлар, «Гануна һә, коррупсијаја јох!» шүарлары тутублар.
Диггәт: Хәбәрдән истифадә етдикдә мәнбәјә истинад лазымдыр
