Әһли Бејт -АБНА- хәбәр аҝентлијинин вердији хәбәрә әсасән: Бир мүддәт әввәл “Wikilеаks” (Викиликс) сајты јајдығы мәлуматларла дүнјаны силкәләјәндә Азәрбајҹан һакимијјәти бу барәдә сусмаға үстүнлүк верирди. Лакин сон дөврләрдә мәлуматларын сәнҝимәси рәсмиләрин дилини ачыб. Президент Администрасијасы иҹтимаи-сијаси мәсәләләр шөбәсинин мүдири Әли Һәсәнов сајтда дәрҹ олунан мәлуматларын иҹтимаи резонанс ҝүҹүнүн ашағы дүшдүјүнү вә “Wikilеаks”ин сары мәтбуат сәвијјәсиндә мүзакирә олундуғуну дејиб. Онун сөзләринә ҝөрә, “Wikilеаks” сајтына әһәмијјәт вермәјә еһтијаҹ јохдур, орада дәрҹ олунанлар бош сөһбәтләр, мәнасыз вә әсассыз јазылардыр.
Гејд етмәк лазымдыр ки, “Wikilеаks” сајтынын ҹиддилијини дүнјанын әксәр өлкәләри вә бејнәлхалг тәшкилатлар етираф едиб. Бу сајтда дәрҹ едилән материалларын вердији нәтиҹә исә ҝөз габағындадыр. Һөкумәтләрин истефаја ҝетмәсинә, әрәб өлкәләриндә ингилабларын баш галдырмасына сәбәб олан сајтын ҹиддилијини шүбһә алтына алмаг нәјә һесабланыб?
Политолог Рази Нуруллајев мәһз “Wikilеаks”ин мәлуматларындан сонра әрәб өлкәләриндә ингилаб далғасынын баш галдырдығыны дејир.
Експерт мәлуматларын јајылмасынын АБШ дөвләтинин сијасәти олдуғуну, бунунла Вашингтонун авторитар режимләрдә чашгынлыг, ејни заманда демократик аб-һава јаратмаг истәјиндә олдуғуну гејд етди.
Р.Нуруллајевин сөзләринә ҝөрә, Азәрбајҹан һакимијјәти әрәб ингилаблары далғасынын “Wikilеаks” мәлуматлары илә бағлылығыны етираф етмәк истәмир. Лакин сајтын мәлуматлары давам етдикҹә, јени далғалар әмәлә ҝәлә биләр. Өлкә вәтәндашларынын бу мәлуматлара инанмасы рәсмиләри нараһат едир: “Wikilеаks” дә Азәрбајҹанла бағлы һәлә чох ҹидди мәгамлар вар. О мәгамлар ачыгланмыр. Ола билсин онлар ачыгланандан сонра Азәрбајҹанда сијаси просесләрин мүстәвиси тамамилә дәјишсин”.
Диггәт: Хәбәрдән истифадә етдикдә мәнбәјә истинад лазымдыр
