Әһли Бејт -АБНА- хәбәр аҝентлијинин вердији хәбәрә әсасән: Бу ҝүн "Һиҹаба азадлыг!" аксијасы илә бағлы һәбс едилән илаһијјатчы Һаҹы Тале Бағыров вә Елшән Аббасовун мәһкәмә просеси кечирилиб.
Мәһкәмә истинтаг мүддәтинин артырылмасы үчүн кечирилиб.
Просесдә иттиһамчынын 2 ај истинтаг мүддәтинин артырылмасы истәји тәмин олунуб.
Һаҹы Тале Бағыров Азәрбајҹан Республикасынын Ҹинајәт Мәҹәлләсинин 233-ҹү маддәси илә (Иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә), (3 илә гәдәр һәбс) иттиһам олунур.
Һәбс едилдикдән сонра Һаҹы Тале барәсиндә әввәлҹә 15 сутка, даһа сонра исә 2 ајлыг һәбс гәтимкан тәдбири сечилиб вә Күрдәханы тәҹридханасына ҝөнрәрилиб.
Хатырладаг ки, “Һиҹаб Азадлыг” аксијасы мајын 6-да Тәһсил Назирлији гаршысында кечирилиб. Аксија илә бағлы Бакы Шәһәр Прокурорлуғунда иш ачылыб. Истинтаг групунун рәһбәри Бакы Шәһәр Баш Полис Идарәсинин истинтаг вә тәһгигат идарәсинин рәиси Назим Исмајыловдур.
Һаҹы Таленин вәкили Интигам Һаҹыјев мәһкәмәдән сонра билдириб ки, просес заманы һаким вәкилә Һаҹы Таленин ајаға дурмамасыјла бағлы дејиб: "Сән она арада тәлим кеч". Вәкил исә һакимә: "Мән өзүм руһани олан Һаҹы Таледән чох шеј өјрәнирәм. Сәнә дә мәсләһәт ҝөрүрәм бу ҹүр едәсән".
Гејд едәк ки, Һаҹы Тале мәһкәмәдән чыхаркән "Мүбаризә давам едир. Зилләт биздән узагдыр!" дејиб.
Диггәт: Хәбәрдән истифадә етдикдә мәнбәјә истинад лазымдыр
