Әһли Бејт -АБНА- хәбәр аҝентлијинин вердији хәбәрә әсасән: Ијулун 8-дә Бакы Ағыр Ҹинајәтләр Мәһкәмәсиндә Азәрбајҹан Ислам Партијасынын лидери Мөвсүм Сәмәдов, партија сәдринин мүавини Вагиф Абдуллајев, партијанын Астара рајон комитәсинин сәдри Руфулла Ахундзадә, Масаллы руһаниси Һаҹы Фәрамиз Аббасов, Мөвсүм Сәмәдовун гајыны Фирдовси Мәммәдрзајев, әмиси оғлу Дәјанәт Сәмәдов вә илаһијјатчы алим Зүлфүгар Микајылзадәнин иши үзрә һазырлыг иҹласы кечирилиб.
Һазырлыг иҹласы мәһкәмә салонунда әјләшмиш диндарларын уҹадан сәсләндирилән тәкбирләри илә башлајыб.
Һаким әввәлҹә АИП сәдри Мөвсүм Сәмәдова мүраҹиәт едиб:
- Сәмәдов, галхын.
- Бисмиллаһиррәһманиррәһим.
- Сәмәдов, ҹинајәт ишинин материаллары илә таныш олмусунуз?
- Бәли. Вәкилимдән хаһиш едирәм ки, мәһкәмә просеси әсассыз олдуғуна ҝөрә, әсаслы дәлилләр ҝәтирилмәдијинә ҝөрә, бизим азадлыға бурахылмағымыз, ишә хитам верилмәси илә әлагәдар вәсатәт галдырсын.
Һаким Мөвсүм Сәмәдовун анкет мәлуматларыны елан етдикдән сонра диҝәр мүттәһимләрә кечди:
- Абдуллајев Вагиф, галхын.
Вагиф Абдуллајев:
- Һал һазырда Азәрбајҹан Ислам Партијасынын сәдр мүавинијәм.
Һаким:
- Ајдындыр. Гејдијјатдан кечмәјән партијанын.
Вагиф Абдуллајев:
- Гејдијјатдан кечмәјән дејәндә ки, бу дәгигә бизим сәнәдләр Әдлијјә Назирлијиндәдир, тутулмағыма бир һәфтә галмыш да ҝетмишәм...
«ИСЛАМ ПАРТИЈАСЫ ХАЛГЫН ГӘЛБИНДӘ ГЕЈДИЈЈАТДАДЫ»
Мөвсүм Сәмәдов мүдахилә едир:
- Гејдә алынмасына еһтијаҹ јохдур, Азәрбајҹан Ислам Партијасы көкүндән гејдијјатдадыр бу халгын гәлбиндә.
Һаким:
- Сәмәдов, јериниздән данышмајын, сакит олун.
Вагиф Абдуллајев:
- Биз бир јердәјдик, јолда ҝедәндә машыны сахладылар ки, ҝуја ГАИ рејд кечирир, рејд адыјла апардылар бизи...
Һаким:
- Ајын нечәси?
Вагиф Абдуллајев:
- Јанварын 7-дә. Тутуб апардылар ки, бизә гаршы мүгавимәт ҝөстәрмисиниз. Мән дә демишәм ки, бизим һеч бир тәгсиримиз јохдур, мәнә инзибати гајдада 10 сутка вердиләр. Ҹәзаны битирмәјә 1 саат галмыш ҝәлдиләр апардылар Нәсими Мәһкәмәсинә. Мән дә Һаҹы Мөвсүм кими тәләб едирәм ки, бизим һеч бир тәгсиримиз олмадығына ҝөрә ишимизә хитам версинләр.
Һаким:
- Аббасов Фәрамиз, галхын ајаға.
Фәрамиз Аббасов:
- Мән јанварын 24-дә саат 12-дә Масаллынын Горадили гәсәбәсиндә јас мәҹлиси апарырдым, полисләр ҝәлиб мәни мәҹлисдән чыхардыб гандаллајыб ҝәтирдиләр. Мән һеч бир ҹинајәт етмәмишәм, Мән о ҹинајәтләри мәнә охујанлары ҹани билирәм. Мөһтәрәм һаким, сизи демирәм.
ПАРТИЈА СӘДРИ ДӘМИР БАРМАГЛЫГДАН ЧЫХМАГ ИСТӘМӘДИ
Руфулла Ахундзадәнин, Дәјанәт Сәмәдовун, Фирдовси Мәммәдрзајевин, Зүлфүгар Микајыловун да анкет мәлуматлары елан олундугдан сонра Мөвсүм Сәмәдовун вәкили Анар Гасымов вәсатәт галдырды ки, тәгсирләндириләнләр дәмир бармаглыглардан кәнарда отурдулсунлар. Анҹаг Мөвсүм Сәмәдов вә даһа бир нечә дустаг вәсатәтә етираз етдијинә ҝөрә вәсатәт тәмин олунмады.
Сонра вәкил икинҹи вәсатәтини елан етмәјә башлады. О, деди ки, Мөвсүм Сәмәдов бу ил јанварын 2-дә партијанын мәнзил-гәрарҝаһында кечирилән топлантыда һиҹаб гадағасы илә бағлы чыхышына ҝөрә һәбс олунуб. Мүдафиә етдији Сәмәдов барәсиндә ачылан ҹинајәт ишиндә һеч бир сүбут јохдур. Анҹаг мәһкәмә вәсатәтә мүнасибәт билдирә билмәди. Чүнки заминдә олан Зүлфүгар Микајыловун дөвләт тәјинатлы вәкили Ҝүлшән Салманова иш материаллары илә таныш олмадығыны билдирди. Һаким вәкилин иш материаллары илә таныш олмасы үчүн һазырлыг иҹласыны ијулун 14-дәк тәхирә салды.
Бундан сонра мәһкәмә салонунда олан диндарлар јенә дә уҹадан «Аллаһу Әкбәр» вә мүхтәлиф тәкбирләр (САЛАВАТ) сәсләндирмәјә башладылар.
ШӘРЛӘНМИШ МҮТТӘҺИМЛӘР ӨЗЛӘРИНИ ТӘГСИРСИЗ БИЛИР
Бу иш үзрә Ибтидаи Истинтагы Баш Прокурорлуғун Ағыр Ҹинајәтләрә Даир Ишләр үзрә Истинтаг Идарәси апарыб. Иттиһама ҝөрә, ҝүја Мөвсүм Сәмәдов Ислам Партијасы ады алтында гурума дахил олан бир нечә нәфәрлә өлкәдә террора һазырлыг ишләри апарыб. Ҹиһада чағырыша, мөвҹуд һакимијјәти дәјишмәјә јөнәлән һәрәкәтләр едиб. Истинтаг органы ҹинајәт ишинин башланмасына әсас кими Мөвсүм Сәмәдовун јанварын 2-дә һиҹабла бағлы чыхышыны ҝөстәриб. Иттиһам актында гејд олунур ки, партијанын һазырда һәбсдә олан үзвләри, о ҹүмләдән Сәмәдовун һәбсдә олан гоһумлары әтрафында апарылан әмәлијјатлар заманы ҝүја онлардан силаһлар ашкар едилиб, бу силаһларын террор мәгсәдилә истифадә үчүн әлдә олундуғу сүбута јетирилиб.
Анҹаг Мөвсүм Сәмәдов вә онунла бирликдә һәбс олунанлар ибтидаи истинтага вердикләри ифадәләриндә өзләрини тәгсирли билмәдикләрини дејибләр. Онлар силаһларын јашадыглары мәнзилә кәнардан атылдығыны билдирибләр (“Азадлыг” радиосу).
Диггәт: Хәбәрдән истифадә етдикдә мәнбәјә истинад лазымдыр
