Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасы Хариҹи Ишләр Назирлији бир бәјанат јајараг, Сербренитсада јашанан сојгырымы фаҹиәсини писләди.
Иранын Хариҹи Ишләр Назирлији 11 ијул, Сербренитса сојгырымы фаҹиәсинин илдөнүмү әрәфәсиндә јајдығы бәјанатда билдириб: 1995-ҹи ил 11 ијул тарихиндә Боснија вә Һерсеговинада, Сербренитса шәһәри Авропада 20-ҹи әсрин ән бөјүк инсан фаҹиәләриндән биринә шаһид олду. Бу инсан фаҹиәси 8 мин сивилин амансыз шәкилдә сербләр тәрәфиндән гырғын едилмәси илә јадда галды.
Бу бәјанатда һәмчинин дејилир: Бу инсан фаҹиәси елә бир шәраитдә баш верди ки, Сербренитса БМТ тәрәфиндән тәһлүкәсиз мәнтәгә елан олунмушду вә һолландијалы сүлһү мүһафизә гүввәләри онун тәһлүкәсизлијинә тәминат вермәли идиләр.
Иранын Хариҹи Ишләр Назирлији өз бәјанатында һәмчинин билдириб: Бу фаҹиәдән 15 илин кечмәсинә вә онун амилләринин ҹәзаландырылмасы истигамәтиндә мүәјјән ишләрин ҝөрүлмәсинә, о ҹүмләдән серб гүввәләрин команданы Радко Младичин һәбс олунмасына бахмајараг, һәлә дә бу ҹинајәтлә бағлы гаранлыг мәгамлар вар ки, Авропада бәзи ҹәрәјанлар бу мәгамларын ачыгланмасына мане олурлар. Онлар бу јолла јашанан фаҹиәнин пәрдә архасынын ифша олунмасыны истәмирләр вә бу јолла да һүгуги вә сијаси бахымдан өзләрини тәмизә чыхартмаға чалышырлар.
Бәјанатын сонунда тәкид олунуб ки, бу ҹинајәтин мүхтәлиф ҹәһәтләринә ајдынлыг ҝәтирмәк вә ҝизли галмыш амилләри үзә чыхартмаг зәруридир. Белә оларса дүнјада диҝәр мүтәшәккил гырғынларын баш вермәсинин гаршысыны алмаға көмәк етмиш олар. Ејни заманда һадисә гурбанларынын һәјатда галан јахынлары үчүн бир нөв тәсәлли ола биләр. Вә ҹинајәти төрәдән амилләрдән вә онларын һимајәчиләриндән зәрәрчәкәнләрин хејринә компенсасијаларын алынмасына көмәк едәр.
