Әһли Бејт -АБНА- хәбәр аҝентлијинин вердији хәбәрә әсасән: Бир мүддәт бундан өнҹә Азәрбајҹан Ислам Партијасынын Баш Мәҹлиси президент Илһам Әлијевлә ҝөрүш барәдә гәрар гәбул етмишди. Үстүндән бир ајдан да чох вахт кечмәсинә бахмајараг, бу ҝөрүшүн баш тутмамасы мараг доғурду. Мәсәләнин зәрурилијини нәзәрә алыб бәзи нүанслара ајдынлыг ҝәтирмәк үчүн ”Faktxeber.com” АИП сәдринин мүавини Акиф Һејдәрли илә әлагә сахлады.
- Азәрбајҹан Ислам Партијасынын президентлә ҝөрүш зәруриәти нәдән доғду?
- Илк нөвбәдә биздән буну Азәрбајҹанда јаранмыш иҹтимаи-сијаси вәзијјәт тәләб едирди. Мөвҹуд ситуасијанын һәртәрәфли, објектив гијмәтләндирилмәси ҹәмијјәтин үмуми нараһатлығындан вә бу тенденсијанын ҝетдикчә даһа дәрин зиддијәтләр јаратмасындан хәбәр верир. Азәрбајҹанын бејнәлхалг ҝүҹләр тәрәфиндән күнҹә сыхышдырылмасы, өлкәмизин ән мүһүм проблеминин һәллини узадыр вә ја халгымызын мараглары нәзәрә алынмыр.
- Ҝөрүшүн нәзәрдә тутдуғунуз мүзакирәнин әсас деталлары барәдә конкрет нә дејә биләрсиниз?
- Азәрбајҹанын талејүклү мәсәләси вә ән јаралы јери олан Дағлыг Гарабағ проблемидир. Халгымызы бу проблемин һәллиндә ҹидди тәләбкар вә вәһдәтдә ҝөрмәјән христиан тәәссүбкешләри мәсәләјә икили стандартларла јанашыр, һакимијјәти ҝүзәштли шәртләрә мәҹбур едирләр. Бу мәсәләдә халгын ирадәсинин орталыға гојулмасы вахты артыг чатмышдыр. Мәһз бу ҝүн вәтән уғрунда шүҹаәт ҝөстәрмәк вахтыдыр. Милли-мәнәви, ислами дәјәрләрин јаратдығы дујғулара гијмәт верилмәлидир. Ҹәмијјәтдә сағлам мүнасибәтләр јарадылмасы, амбисијалар, виҹданлы инсанларын ләкәләндирилмәси тенденсијаларына сон гојулмалы, дөвләтин вә дөвләтчилијин зәифләдилмәсинә хидмәт едән сүни проблемләрин, гаршыдурмаларын сәбәбләри вә сәбәбкарлары арашдырылмалы, ҹәмијјәтә зәрәрли әмәлләринин гаршысы алынмалыдыр.
- Тәклифләриниз нә ола биләрди?
- Илк нөвбәдә, өлкәдахили бу кими глобал проблемләрә, халгын истәк вә арзуларына диггәт, вә мөвҹуд вәзијјәтин дүзҝүн гијмәтләндирилмәси. Һәр бир проблемә дөвләт башчысынын нәзәрләринин биз тәрәфдән өјрәнилмәси вә она објектив мәлуматларын чатдырылмасы. Дахили вә хариҹи сијасәтдә приоритетләри халгын инам вә етимады үзәриндә гурмаг. Гарабағ проблеминин һәллиндә ҹәмијјәтин тәкидли тәләбләрини нүмајиш етдирмәклә буну дүнја чапында габартмаг.
Икинҹиси вә һәм дә мәсәләнин әсасы зиддијјәти ондан ибарәтдир ки, Азәрбајҹан халгынын 97 фаизи мүсәлман олдуғу һалда өлкәмиздә ҝүҹлү Исламафобија тәзаһүрләри мөвҹуддур. Хариҹи гүввәләрин мәгсәдли тәсири нәтиҹәсиндә дини атрибутлара гадағалар гојулур. Мәһз ҹәмијјәтдә баша дүшүлмәјән ән дәрин зиддијәти белә амилләр јарадыр ки, бу да ҝәләҹәјин бөјүк фаҹиәси вә сәрт етимадсызлығы демәкдир ки, хариҹи тәзјигләрин гаршысына ҝүҹлү милли гуввә чыхмасын. Әслиндә сијаси вә виҹдан мәһбуслары амили бу учурумун вә зиддијәтләрин даһа да дәринләшмәсинә хидмәт едир ки, чох ҝүман, дөвләт башчысына тәмиз инсанларын шәр вә бөһтанла ләкәләнәрәк һәбсини реаллыг кими тәгдим едирләр.
- Сизҹә бәс нијә ҝөрүшә шәраит јарадылмады?
- Буну ики аспектдән изаһ етмәк олар. Ја Президентин мәсәләләрә мүнасибәти јалан мәлуматларла тәнзимләнир. Дахили, сатылмыш гүввәләр үчүн дә белә вәзијјәт сәрфәлидир ки, халгла дөвләт башчысы арасында ҹидди вә узаг мәсафә јаратмагла истәдикләрини һәјата кечирсинләр. Ја да ҹәмијјәтдә президентин бу мәсәләләрин һәллини истәмәмәси шүбһәси јараныр. Бизә бу амилләр там шәффафлығы илә ајдын олмадығы үчүн мәһз сөзүмүзү Коститусијамызын бизә вердији һүгуглардан истифадә едәрәк вә ганунларымыза истинадән мејданларда күтләви динҹ акситјалар кечирмәклә чатдырмаға чалышаҹағыг.
Диггәт: Хәбәрдән истифадә етдикдә мәнбәјә истинад лазымдыр
