Әһли Бејт -АБНА- хәбәр аҝентлијинин вердији хәбәрә әсасән: Бунлар хәрчәнҝ, диабет, үрәк чатышмазлығы вә ағҹијәр хәстәликләридир. Русија КИВ-нин вердији мәлумата ҝөрә, БМТ-нин мәрузәсиндә билдирилир ки, һазырда дүнјада дүнјасыны дәјишән инсанларын үчдә икиси мәһз бу хәстәликләрдән өлүр.
Һәр 4 хәстәлијин мигјасынын сүрәтлә артдығыны дејән БМТ експертләри нәтиҹәдә дүнја игтисадијјатына трилјон долларларла зијан дәјдијини билдирир. «Диггәт даһа чох ГИЧС, малјарија, вәрәм кими инфексион хәстәликләрлә мүбаризәјә јөнәлдилдијиндән гејд олунан гејри-инфексион хәстәликләр өн плана чыхыб вә глобал епидемијаја чеврилмәкдәдир», - дејә сәнәд мүәллифләри билдирир.
Һесабата ҝөрә, 2008-ҹи илдә дүнјада гејри-инфексион хәстәликләрдән 36 милјон инсан вәфат едиб. Бу, дүнјада өлүм һалларынын 63%-и демәкдир. Өлүм фактларынын тәхминән 80%-и инкишаф етмәкдә олан өлкәләрин пајына дүшүр. Онларын 9 милјону 60 јашына чатмамыш инсанлардыр.
Диггәт: Хәбәрдән истифадә етдикдә мәнбәјә истинад лазымдыр
