Әһли Бејт -АБНА- хәбәр аҝентлијинин вердији хәбәрә әсасән: Бакы Истинтаг Тәҹридханасында сахланылан Азәрбајҹан Ислам Партијасынын (АИП) сәдри Мөвсүм Сәмәдов аилә үзвләри илә ҝөрүшүб. М.Сәмәдовун дуруму вә үмумијјәтлә бу ҝөрүш барәдә әтрафлы мәлумат алмаг үчүн АИП сәдринин һәјат јолдашы Меһпарә Сәмәдоваја мүраҹиәт етдик.
Меһпарә ханым деди ки, Һаҹы Мөвсүмлә гајынатасы, гызы Зәһра, оғлу Зејналабидинлә бирҝә ҝөрүшүбләр. Онлар М.Сәмәдовла шүшә архасындан телефонла даншыблар. Ҝөрүшә тәхминән 30-35 дәгигә иҹазә верилиб.
Беш ајлыг һәсрәтдән сонра нәһајәт, шәффаф шүшә архасындан олса да, Һаҹы Мөвсүмлә ҝөрүшдүкләрини, сәсини ешитдикләрини сөјләјән Меһпарә ханым чох шад олдугларыны дилә ҝәтирди:
Бисмиллаһир Рәһманир Рәһим
“Һаҹынын һәбсинә, үстәлик, ону узун мүддәт ҝөрмәдијимизә ҝөрә психоложи дурумумуз чох ҝәрҝинләшмишди. Бу ҝөрүшдән сонра исә санки үзүмүзә ишыглы бир сабаһ ачылыб, үрәјимиз арамлыг тапыб. Амма әлбәттә, Һаҹыны һәбсхана диварлары арасында ҝөрмәјимиздән чох тәсирләндик. Һамымыз көврәлдик. Тәсәллини онда тапдыг ки, Һаҹы Мөвсүмүн сәһһәти нормал, әһвал-руһијјәси исә јахшы иди. Анҹаг үзү бир гәдәр солғунлашмыш, вүҹуду хејли зәифләмишди. Сәбәбини сорушанда деди ки, оруҹ сахлајыр. Һаҹы һәбсхана нәзарәтчиләринин, мүстәнтигин она еһтирам ҝөстәрдикләрини, ҝүнүн чох һиссәсини Гурани-Кәрими охумаға, мүталиәјә, бәзән дә идмана сәрф етдијини вурғулады. Һаҹы һәр јердә олдуғу кими, һәбсхана диварлары арасында да өзүнә низамлы, сәлигәли һәјат шәраити јарадыб”.
АИП сәдри ханымы илә сөһбәтдә бир ај әрзиндә мәһкәмә просесинин башлаја биләҹәјини дејиб. Һаҹыханым вахт мәһдудијјәти олдуғу үчүн бу вә диҝәр мәсәләләр барәдә әтрафлы даныша билмәдикләрини ифадә етди.
“Һаҹы Мөвсүм илк нөвбәдә ушаглара дәрсләрилә ҹидди мәшғул олмағы, намазларыны вахтында гылмағы, ҝүндәлик дуалары охумағы төвсијә етди” - дејә М.Сәмәдова вурғулады: “Һаҹы ејни заманда бизә мөһкәм олмағы тапшырды. Вә билдирди ки, онлар һагг јолдадырлар, һеч бир ҝүнаһлары јохдур вә иншааллаһ, Аллаһын фәрәҹини ҝөзләјирләр. О, һәр бир кишинин зиндана дүшә биләҹәјини вә бунун, белә демәк мүмкүнсә, киши иши олдуғуну дилә ҝәтирди. Һаҹынын ән бөјүк нараһатлығы партијанын диҝәр рәһбәр шәхсләринин, гардашым Фирдовси Мәммәдрзајевин, әмиси оғлу Дәјанәт Сәмәдовун һәбсилә бағлыдыр”.
Меһпарә ханым да истәр јолдашынын, истәрсә дә диҝәрләринин шәрләнәрәк һәбс олунмасындан әндишәләндијини, сарсылдығыны диггәтә чатдырды: “Әлагәдар шәхсләрә суал верирәм, нә үчүн ҝүнаһсыз инсанлары зинданда сахлајырсыз? Нә үчүн онларын һәјат јолдашларыны, ушагларыны, аһыл, хәстә ата вә аналарыны ҝөзүјашлы гојмусуз. Гәддар әмәлләринизә ҝөрә Ахирәтдә Аллаһа һансы ҹавабы верәҹәксиз? Ахы һамыја бәллидир ки, бу пак, иманлы, һәгиги Аллаһ бәндәләринин јери һәбсхана дејил. Онлар мәнәвијјаты зәдәләнән ҹәмијјәтимизә бир дәрман, һава вә су кими лазымдыр. Бу инсанларын һеч бири өз евиндә силаһ ҝизләтмәјиб. Силаһы гардашымын да, Д.Сәмәдовун да евинә полисин өзү атыб. Амма буну сүбут етмәк чох чәтиндир. Буна һеч имкан да вермирләр. Истинтаг да шәффаф апарылмады. Сөзүмүзү, тәләбләримизи динләјән белә олмады”.
Сөһбәт әснасында Меһпарә ханым ҹәмијјәтин биҝанәлијиндән дә шикајәтләнди: “Мүсәлман кими бир-биримизин дәрдинә шәрик олмалыјыг, бир-биримизә дәстәк вермәлијик. Лакин бу дәстәји ҝөрмүрүк. Ҹәмијјәт тамамилә биҝанәләшиб. Она ҝөрә дә үмидимиз јалныз Аллаһ, пәнаһымыз исә Гурани-Кәрим, Һәзрәт Мәһәммәд Пејғәмбәр (с), Имамларын (ә) кәламларыдыр”.
Сон олараг гејд едәк ки, М.Сәмәдовла бағлы сонунҹу истинтаг һәрәкәти ијунун 2-дә апарылыб. Бу барәдә мәтбуата ачыглама верән вәкил Анар Гасымов билдириб ки, АИП сәдриндән сонунҹу дәфә ифадә алыныб, истинтагын кечирдији мүхтәлиф експертизаларын рәји ачыгланыб. А.Гасымовун сөзләринә ҝөрә, рәјләр тутуланларын ифадәләри, партијанын офисиндән ҝөтүрүлән дискләр вә сәнәдләрлә бағлыдыр. Јекун олараг диндирилән М.Сәмәдов билдириб ки, әввәлки ифадәләрини тәсдиг едир. Она јекун иттиһам елан олунуб вә әввәлки маддәләрдә һеч бир дәјишиклик едилмәјиб.
Хатырладаг ки, М.Сәмәдов Азәрбајҹан Республикасы Ҹинајәт Мәҹәлләсинин 228.3 (ганунсуз олараг одлу силаһ, онун комплект һиссәләрини, дөјүш сурсаты, партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ҝәздирмә – мүтәшәккил дәстә тәрәфиндән төрәдилдикдә) вә 278-ҹи (һакимијјәти зорла әлә кечирмә) маддәләри илә иттиһам олунур. / "Нәбз" гәзети
Диггәт: Хәбәрдән истифадә етдикдә мәнбәјә истинад лазымдыр
