Әһли Бејт -АБНА- хәбәр аҝентлијинин вердији хәбәрә әсасән: Исламчылар барәдә галдырылмыш ҹинајәт иши јекунлашмаг үзрәдир. Һазырда мүдафиә тәрәфинин иш материаллары илә таныш олма мәрһәләси ҝедир. Мәлуматы Азәрбајҹан Ислам Партијасынын лидери Мөвсүм Сәмәдовун вәкили Анар Гасымов вериб.
Бу ил јанварын 7-дән Азәрбајҹан Ислам Партијасы үзвләринин вә бәзи диндарларын һәбси башлајыб. Мөвсүм Сәмәдовла јанашы онун сүрүҹүсү Мирһүсејн Казымову, АИП тәшкилат шөбәсинин мүдири Вагиф Абдуллајеви вә партија функсионери Елчин Һәсәнову ахшам саат 7 радәләриндә партијанын офисиндән чыхаркән тутублар.
Јанварын 8-дә Нәриманов Рајон Мәһкәмәси Вагиф Абдуллајевә 15, Мөвсүм Сәмәдова вә Елчин Һәсәнова 13, Мирһүсејн Казымова исә 11 сутка иш вериб. Онлар полисә табе олмамагда тәгсирли билинибләр.
Һәмин ҝүн Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәси Мөвсүм Сәмәдовун Губа рајонунда јашајан әмиси оғлу Дәјанәт Сәмәдовун ишләдији дүканда әмәлијјат-ахтарыш тәдбирләри кечириб. Мөвсүм Сәмәдовун атасы Мәрдан Сәмәдова мәхсус електрик маллары мағазасына бахыш заманы орадакы сејфин алтындан 3 әдәд әл гумбарасы, һабелә јашадығы евдән 7 әдәд автомат патрону вә ичәрисиндә дини радиклазми тәблиғ едән мәлуматларын олдуғу електрон дашыјыҹылар ашкарланыб ҝөтүрүлүб. Дәјанәт Сәмәдов һәбс олунуб.
Јанварын 11-дә Мөвсүм Сәмәдовун гајыны Фирдовси Мәммәдрзајевин евиндә ахтарыш апарылыб вә рәсми мәлумата ҝөрә, 10 әдәд “Ф-1” әл гумбарасы вә онлар үчүн алышдырыҹылар, 40 әдәд автомат патрону вә автомат силаһы үчүн 1 әдәд дараг ашкар едилиб. Фирдовси Мәммәдрзајев јанварын 13-дән һәбсдәдир.
Јанварын 18-дә АИП тәшкилат шөбәсинин мүдири Вагиф Абдуллајевә, ајын 20-дә исә Мөвсүм Сәмәдова иттиһам ирәли сүрүлүб.
Һәмин ај партијанын Астара рајон тәшкилатынын сәдри Руфулла Ахундзадәјә, Масаллынын Хыл кәндинин ахунду Фәрамиз Аббасова мәхсус евләрдә әмәлијјат-ахтарыш тәдбирләри һәјата кечирилиб вә силаһ-сурсат ашкар едилдикдән сонра онлар да һәбс олунублар.
Исламчылар Ҹинајәт Мәҹәлләсинин 28, 214.2.1-ҹи (габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг), 228.3-ҹү (Ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә), 278-ҹи (һакимијјәти зорла әлә кечирмә вә ја ону зорла сахлама) маддәләри илә иттиһам олунурлар.
Јалныз Руфулла Ахундзадәјә Ҹинајәт Мәҹәлләсинин 283.1. (Милли, ирги, сосиал вә ја дини нифрәт вә дүшмәнчилијин салынмасына, милли ләјагәтин алчалдылмасына, һабелә милли, ирги вә ја дини мәнсубијјәтиндән асылы олараг вәтәндашларын һүгугларынын мәһдудлашдырылмасына вә ја үстүнлүкләринин мүәјјән едилмәсинә јөнәлән һәрәкәтләр, ашкар сурәтдә вә ја күтләви информасија васитәләриндән истифадә олунмагла төрәдилдикдә) маддәси илә јени иттиһам ирәли сүрүлүб.
Исламчилари мүдафиә едәнләр һесаб едир ки, бу һәбсләр сијаси характерлидир вә әсасән јанварын 2-дә партијанын Баш Мәҹлисиндә Мөвсүм Сәмәдовун чыхышы илә бағлыдыр.
2007-ҹи илдә партија сәдри сечилән Мөвсүм Сәмәдов јанварын 2-дә Азәрбајҹан Ислам Партијасы Баш Мәҹлисинин иҹласында чыхыш едәрәк өлкәдә баш алмыш коррупсијаны, мәмур өзбашыналығыны, мәктәбләрдә һиҹаба гадаға гојулмасыны, дөвләтин антиислам һәрәкәтләрини, позғунлуғун јајылмасыны вә јәһудиләрин Азәрбајҹанын башына нәләр ҝәтирмәк истәмәләрини кәскин писләјиб. Мәһәммәд Пејғәмбәрдән “динә тәрәф бәла ҝәлсә, ҹанынызы верин, дининизи гуртарын” дејә ситат ҝәтирән АИП лидери Азәрбајҹан халгыны “ајаға галхмаға вә залым режимә сон гојмаға” чағырыб.
Диггәт: Хәбәрдән истифадә етдикдә мәнбәјә истинад лазымдыр
