Әһли Бејт -АБНА- хәбәр аҝентлијинин вердији хәбәрә әсасән: Хүсуси тәјинатлы дәстә вә полис алајы Ҝүрҹүстан мүхалифәтинин пајтахт Тбилисидә кечирдији отураг митинги мајын 25-и ахшам саатларында дағыдыб. Минтингин дағыдылмасында полис вә хүсуси тәјинатлы дәстә ҝөз јашартыҹы газдан, резин ҝүлләләрдән, напор сулардан, резин дәјәнәкләрдән вә физики ҝүҹ ендирмәләрдән истифадә етмишләр. Хејли сајда јаралылар вә хәсарәт аланлар вардыр.
Мајын 21-дән Халг Мәҹлиси алјансынын чағырышы илә давамлы митингләр кечирән мүхалифләр дүнәндән Руставели проспектини тутараг мајын 26-на - Мүстәгиллик Ҝүнүнә нәзәрдә тутулан һәрби парада мане олмаг истәјирдиләр.
Русијанын “Интерфакс” аҝентлијинин јајдығы мәлумата ҝөрә, митинг дағыдыларкән ики полис әмәкдашы һәлак олуб. Ҝүрҹүстан Дахили Ишләр Назирлијинин рәсми нүмајәндәси Шоту Утиашвили дејиб ки, полис әмәкдашыны мүхалифәт лидерләрини олај јериндән узаглашдырмаға тәләсән машын вуруб. Онун сөзләринә ҝөрә, 19 митинг иштиракчысы хәсарәт алыб.
Ҝүрҹүстан медиасы полис әмәкдашыны вуран автомобили мүхалифәт лидери Нино Бурҹанадзенин әри Бадри Бичадзенин идарә етдијини хәбәр вериб. Нино Бурҹанадзе бу иддиалары тәкзиб едәрәк әринин һарада олдуғуну билмәдијини дејиб.
Башга бир мәлумата ҝөрә, Нино Бурҹанадзенин оғлу Анзор Бичадзе тутулуб. Онун анасы илә бирҝә хәстәханада - 25 аксијасында хәсарәт аланлара баш чәкәркән сахландығы билдирилир.
Диггәт: Хәбәрдән истифадә етдикдә мәнбәјә истинад лазымдыр 
