Әһли Бејт -АБНА- хәбәр аҝентлијинин вердији хәбәрә әсасән: Бакыда сијаси кулуарларда ҝәзән сөһбәтләрдә һазырда Бөјүк Британијада јашајан Севил Әлијеваја “Баронесса” задәҝан титулунун верилдији билдирилир. Мәлумат о гәдәр ҝениш јајылыб ки, һәтта орта мәмур тәбәгәси дә бу хәбәри баш вермиш факт кими тәсдигләјир. Дүнән “Азадлыг”ын әмәкдашына бу барәдә мәлуматы да һәмин рангда олан бир дөвләт мәмуру чатдырыб, амма тәбии ки, “мәним адым олмасын” “мәхфи грифи” илә.
Тәбии, Севил Әлијеванын Инҝилтәрәдә сијаси истеблишментлә сых әлагәләринин олдуғу һеч кимә сирр дејил. Узун мүддәтдир ки, орада јашајан, Азәрбајҹанла, демәк олар ки, бүтүн әлагәләрини кәсмиш кими ҝөрүнән Севил ханым Әлијеванын белә бир титулла мүкафатландырылмасы үчүн онун мәһз, һансы хидмәтләринин әсас ҝөтүрүлдүјүнү дејә билмәрик. Бахмајараг ки, бу категоријадан олан мәсәләләр һәм дә вә бир чох һалларда шәхси мүнасибәтләрлә һәлл едилир.
Инди мүасир Авропада көһнә задәҝан титулларынын верилмәси тәҹрүбәси мөвҹуддур. Мәсәлән, Белчика вә Испанија краллары, Лихтенштејн кнјазы, Ватикан суверени бу ҹүр титулларын верилмәси тәҹрүбәсини сахлајырлар. Авропада феодаллары ајрыҹа сосиал синиф кими таныјан, ејни заманда, өзүнү Республика елан едән Сан-Маринода да бу практика сахланылыр. Бөјүк Британијада исә көһнә задәҝан титулларынын верилмәси 2004-ҹү илин нојабр ајынын 28-дән етибарән краличанын тәсдиг етдији Парламент акты илә ләғв едилмә сәвијјәсиндә мәһдудлашдырылыб. Һазырда Шотландијада “Барон” титулу о адамлар үчүн һүгуги сајылыр ки, онлар бу титулу 28 нојабр 2004-ҹү илә гәдәр алыблар. (Хатырланан Парламент Актынын 63-ҹү маддәсинә әсасән).
Севил ханым Әлијеванын “баронесса” титулу илә мүкафатландырылмасы јухарыда садаланан һаллары нәзәрә алмагла мүмкүндүр. Амма хәбәрин, үмумијјәтлә, нә гәдәр дәгиг олдуғуну мүәјјән етмәк чәтиндир. Башлыҹасы будур ки, Бакыда бу хәбәр кифајәт гәдәр ҝениш чеврәләрдә мүзакирә едилир вә санки, кимләрсә бу олај барәдә мүзакирәләрин ҝенишләнмәсиндә мараглыдыр.
Хатырладаг ки, сон заманлар үчүн бу хәбәрин јајылмасы бир гәдәр гејри-мүтәнасиб дә ҝөрүнүр. Белә ки, Инҝилтәрә мәтбуаты Краличанын аиләсини, өзәлликлә шаһзадә Чарлзы Илһам Әлијевлә хүсуси јахын мүнасибәтләринә ҝөрә давамлы олараг сәрт тәнгид едир. Бу тәнгидин мәнтигинә ҝөрә, Крал аиләси ады коррупсијада һалланан авторитар сијаси лидерлә достлуг едирсә, бурада Инҝилтәрә ганунларына ҝөрә тәмиз сајыла билмәјәҹәк һансыса елементләр вар.
Диггәт: Хәбәрдән истифадә етдикдә мәнбәјә истинад лазымдыр
