“Пакистанда бизи чох јүксәк сәвијјәдә гәбул етдиләр...Јадымдадыр, бөјүк нүмајәндә һејәти илә мәсҹидләрә ҝетдик, намаз гылдыг. Орада адәт беләдир. Мүсәлман дөвләтләриндән ҝәлән јүксәк нүмајәндә һејәти мәсҹиддә бирҝә намаз гылыр. Бизимлә бағлы мәсҹиддә траҝикомик вәзијјәт дә јаранмышды.. Совет вәтәндашлары олан бизләр намаз гылмағы да билмирдик. Јахшы ки, бизим јанымызда депутат Һаҹы Фәррух Зејналов вар иди. О гајда-ганунлары билирди... О дајанды јанымызда... Биз дә она баха-баха намаз гылдыг. Бәзиләри неҹә әјилиб-дурмаг гајдаларыны билмирди, бәзиләри бир тәһәр јолуна гојурду”.
Бу сөзләри Модерн.аз-а мүсаһибәсиндә милләт вәкили Ваһид Әһмәдов 1991-ҹи илдә мүстәгиллијини јенәҹә бәрпа едән Азәрбајҹан нүмајәндә һејәтинин Пакистана сәфәри барәдә данышаркән дејиб.
Бәли, о заманлар белә иди. Азәрбајҹанда мәсҹидләр вә намаз гыланлар бармагла сајылаҹаг гәдәр аз иди.
ССРИ-нин 70 ил әрзиндә Совет Азәрбајҹанында атеизми, динсизлији тәблиғ етмәсинә бахмајараг, азәрбајҹанлылар арасында Аллаһа инам сарсылмады. Дүздүр, бу тәблиғата ујуб ҹәмијјәтимиздә аллаһсызлашанлар да олду, амма үмумиликдә ҝөтүрәндә совет идеолоҝијасы әксәр азәрбајҹанлыларын гәлбиндән Аллаһ хофуну чыхара билмәди.
Мүстәгиллијимизин бәрпасындан сонра исә Азәрбајҹанда динә тапынанларын, Аллаһын ваҹиб бујурдуғу әмәлләри јеринә јетирәнләрин, мүгәддәс Һәҹҹ зијарәтинә ҝедиб-ҝәләнләрин сырасы сүрәтлә ҝенишләнди. Бу сырада садә вәтәндашларла јанашы, мүхтәлиф вәзифәләрдә чалышан мәмурлар, диҝәр постлар тутан инсанлар да аз дејил. О ҹүмләдән дә депутатлар.
Модерн.аз сајтынын мәлуматына ҝөрә, Милли Мәҹлисин һазырки үзвләри арасында Һәҹҹ зијарәтиндә олан депутатлар вар. Һәтта онлардан бәзиләри бу мүгәддәс јолу бир дәфә дејил, ики дәфә вә даһа чох ҝедиб-ҝәлибләр. Арашдырмаларымыза ҝөрә, депутатлар арасында Аллаһын ваҹиб бујурдуғу әмәлләри иҹра едәнләр дә вар. Намаз гылмаг, оруҹ тутмаг, хүмс вермәк, зәкат вермәк, Һәҹҹә ҝетмәк кими ваҹиб әмәлләрин һамысыны иҹра едән депутатлардан бири Фазил Мустафадыр.
Модерн.аз сајтынын әмәкдашы илә сөһбәти заманы Фазил Мустафа билдириб ки, намаз гылмаг инсанын бүтүн һәјатыны хүсуси бир системә салыр: “Намаз гылан шәхс мәнән сағлам олур, мәнәви раһтлыг тапыр. Намаз инсанын сағламлығына јахшы мәнада хүсуси тәсир ҝөстәрир”.
Ф.Мүстафа дејир ки, о, намазыны вахтында гылыр: “Амма бәзән ишлә әлагадар олараг вахт тапа билмирәм. Белә вахтларда гәза намазыны да гылырам”.
Депутат ҹүмә намазыны һәмишә мәсҹиддә гылдығыны дејир. Модерн.аз-ын “индијәдәк һансы милләт вәкили илә бир јердә намаз гылмысыныз” суалымыза Ф.Мустафа “һеч кимлә, һансыса диҝәр милләт вәкилинин намаз гылмасы барәдә мәлуматым јохдур” дејә ҹаваб вериб.
Модерн.аз-ын әмәкдашы ибадәтлә мәшғул олан бир нечә диҝәр милләт вәкили илә әлагә сахлајыб онлары мөвзу барәдә данышдырмаг истәсә дә, бу, мүмкүн олмајыб. Беләдә онларын адыны јазмаға да еһтијаҹ дујмадыг.
А.Горхмаз
