Әһли Бејт -АБНА- хәбәр аҝентлијинин вердији хәбәрә әсасән: “Һиҹаба азадлыг” аксијасына ҝөрә 15 сутка инзибати һәбс ҹәзасы алан илаһијјатчы Талеһ Бағыров һаггында ҹинајәт ишинин башландығы билдирилиб. Ҹинајәт ишинин Ҹинајәт Мәҹәлләсинин һансы маддәси илә башландығы барәдә һәлә мәлумат јохдур.
Т.Бағыровун вәкили Дилгәм Ағајев ачыгламасында һазырда буну дәгигләшдирмәк имканына малик олмадығыны дејиб.
Дахили Ишләр Назирлијинин мәтбуат хидмәтиндән исә билдирибләр ки, бу типли мәсәләләр барәдә мәлуматы иҹтимаијјәтә истинтаг групу верә биләр: “Груп рәһбәри истинтагын ҝедишаты илә бағлы һансы мәлуматын өтүрүлүб-өтүрүлмәмәсини өзү мүәјјәнләшдирир”.
“Һиҹаб аксијасы” мајын 6-да Тәһсил Назирлији гаршысында кечирилиб. Гејри-рәсми мәлумата ҝөрә, индијә гәдәр 12 нәфәрә ҹинајәт иши галдырылыб. Бу аксија илә бағлы Бакы Шәһәр Прокурорлуғунда Ҹинајәт Мәҹәлләсинин 221.2.2. (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) вә 221.3. (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) маддәләри илә шәрләнәрәк иш ачылыб. Истинтаг групунун рәһбәри Бакы Шәһәр Баш Полис Идарәсинин истинтаг вә тәһгигат идарәсинин рәиси, истинтаг групунун рәһбәри Назим Исмајыловдур.
Аксија заманы һәбс олунан илаһијјатчы Т.Бағыров Нәриманов Рајон Мәһкәмәсинин гәрары илә 15 сутка һәбс ҹәзасы алыб. Мајын 21-дә онун бу ҹәзасынын мүддәти баша чатыр.
Мајын 18-дә Т.Бағыровун сахландығы Бинәгәди рајонундакы Инзибати Һәбс Олунанларын Сахланма Тәҹридханасындан Нәриманов Рајон Полис Идарәсинә, даһа сонра Бакы Шәһәр Баш Полис Идарәсинә апарылдығы хәбәри јајылмышды.
Мајын 20-дә онун инзибати гајдада һәбс олунмасындан верилән апеллјасија шикајәтинә бахылмалы иди. Вәкил Д.Ағајевин сөзләринә ҝөрә, просес мајын 24-дәк тәхирә салыныб. Сәбәб һаким Ҹамал Рамазановун ишә чыхмамасыдыр.
Һаҹы Тале Бағыровун јахынларынын исә Ислам-Азери.аз Интернет Гәзетинә вердији мәлумата ҝөрә, Һаҹы Тале Күрдәханыдакы тәҹридханаја апарылыб. Һәмчинин Һаҹы Тале илә бирликдә бир нәфәр диндарын да апарылдығы билдирилиб.
Диггәт: Хәбәрдән истифадә етдикдә мәнбәјә истинад лазымдыр
