Ҝүрҹүстанда “Мүсәлманлар Идарәси” адлы бир гејри-һөкумәт гуруму јарадыблар, Аллаһшүкүр Пашазадә бундан наразы галыбдыр
Ҝүрҹүстанда “Мүсәлманлар Идарәси” адлы бир гејри-һөкумәт гуруму јарадыблар, Азәрбајҹанын шејхүлисламы Аллаһшүкүр Пашазадә бундан наразы галыбдыр. Дејир, бу биртәрәфли јанашмадыр, узун мүддәтдир давам едир: “Ҝүрҹүстан үзәриндә дөрд хач олан бајрағы гәбул едәндән белә мүнасибәт јараныб”. Шејхин Ҝүрҹүстан нүмајәндәси исә лап кәскин етираз едиб, дејиб ҜМИ-ни (Ҝүрҹүстан Мүсәлманлар Идарәси) јараданларын һеч бириси руһани дејил, “дүнјәви шәхсләрдир” - ситат һәмин зата мәхсусдур - ҝәрәк онлар буну јаратмасын вә саирә.
Доғрудур, Аллаһшүкүр бәј мүмкүн гәдәр дипломатик етираз едиб, ҝөрдүјүнүз кими, онун ачыгламасындан һеч бир нәтиҹәјә ҝәлмәк олмур. Јәгин үмид едир ки, ордакы “дүканы” ҝери гајтармаг мүмкүндүр. “Бәлкә дә гајтардылар” - классикимиз демишкән. Анҹаг ҝүрҹүләрин бајрағында хач тәсвирини хүсуси вурғуламағын мәнасы нәдир? Ҝүрҹүләр дә гајыдыб бизә “нијә сизин бајрагда ај-улдуз, јашыл рәнҝ вар” десәләр нә олаҹаг? Башга өлкәләрин бајрағына гарышмаг гәтијјән шејхин иши дејил.
Башга јөндән, шејх бирдәфәлик анламалыдыр: даһа онун гатары ҝедиб, һеч ким онун дин адына ачдығы дүканлар шәбәкәсиндә гуллугчу олмаг фикриндә дејил. Сахта, рус империјасындан галма “Гафгаз Мүсәлманлары Идарәси” дә ифласа мәһкумдур. Ахы һеч ислам дининдә идарә анлајышы да јохдур! Бурада һансыса дини идарә јарадыб “Рома папасы” кими о идарәнин рәһбәринә тәзим еләмәк анлајышы јохдур. Мүсәлманларын дини китабы “Гуран”да онлары дини идарәдә бирләшдириб рәһбәрлијә шејх гојмаг кими мүддәа јазылмајыбдыр.
Аллаһшүкүр бәјин Ҝүрҹүстан мүсәлманларынын гајғысына галмасы бурдан баханда чох ҝүлмәлидир. Чүнки Азәрбајҹанда сон илләр мүсәлманларын һаггларынын тапданмасы, әгидә азадлығынын позулмасы фактлары сајсыз-һесабсыздыр. Анҹаг Пашазадә ҹәнаблары бу фактларын бириндә дә габаға дурмајыб, ағрымајан башына буз бағламајыб. “Мәнә дәјмәјән һөкумәт мин јашасын” - шејхин һәјат принсипи будур. Инди онун бурдан Ҝүрҹүстанын дахили ишләринә бармаг узатмасына еһтијаҹ вармы? Адама демәзләрми ки, сән ҝет өз өлкәнин дәрдини чәк?
Шејхин Ҝүрҹүстан нүмајәндәси Һаҹы Әли Әлијевин “онлар дүнјәви инсанлардыр” ачыгламасынын да шәрһә еһтијаҹы вар. Мәнтиглә, ким руһанидирсә демәли дүнјәви инсан дејил. Мәсәлән, Аллаһшүкүр бәј өзү дүнјәви дејилмиш... Әҹәбдир. Сиз һеч руһани һалын бу ҹүр мадди тәрәгги тапмасына шаһид олмусунуз? Әсл диалектик материализмдир. Даһа бу мөвзуја аид сөзүм јохдур.
Руһдан сөһбәт дүшмүшкән, буҝүнләрдә башыма әҹаиб олај ҝәлмишдир - өзүмдән мәктуб алмышам. Тәәҹҹүбләнмәјин, електрон почтума шәхси үнваныма һәрфбәһәрф бәнзәјән бир адресдән мәктуб ҝәлмишди. Бахырам ки, өзүнү “Һаҹы Замин” адландыран бу јолдаш јазыр: “Салам, сизи нараһат едән сиз өзүнүзсүнүз. Биз бир кәнддәник. Бу һакимијјәти аз биабыр елә. Метронун һаваландырма системинин тутулмасындан јаздығын кими инкишафдан да јаз. Һәр шеји гысгандыныз бәс еләмәди, инди дә Тағы мүәллимә гара јахырсан. Гардаш, сән һардан биләсән ахы метронун һаваландырмасыны нијә бағлајырлар, бу иш Тағы мүәллимин өлкәмиздә јени иш јерләринин ачылмасына вердији төһфәдир. Метро шахталары үзәриндә тиҹарәт мәркәзләри тикилир, тунелә һава ҝетмир. Нәтиҹәдә метрода ҝетмәк истәјән адамлара һава балонлары лазым олур. Стансијаларда оксиҝен балону сатан көшкләр ачылыр, ора АзТВ-дә фәргләнән зәһмәткешләр ишә алыныр. Балонлар ҝенәлликлә Гәбәлә дағларында долдурулур ки, халгымыз кеф еләсин. Дағ һавасы удараг мәнзил башына чатмағын ајры ләззәти вар. Анладынмы? Та буну бурҹутмағын нә јери вар? Шәртим будур ки, сәһәрки көшәндә Тағы мүәллими тәрифлә, әкс һалда, АзТВ-јә чыхыб сәнин адындан көшә јазарлығындан истефа верәҹәјәм, ”Сәс", ја да “Јени Азәрбајҹан” гәзетинә кечдијими дејәҹәјәм. Охшајырыг да, јалныз бир ејнәјим чатмыр, ону да Сәдәрәк јармаркасындан аларам".
Һөрмәтли охуҹулар, јалныз бу јерә чатанда үрәјим јеринә ҝәлиб, диггәтлә бахмышам ки, мәктубу јазан Замин Бабајев адлы бир шәхсдир, садәҹә, гардаш адаш олмағымыздан суи-истифадә етмишдир. Јохса елә билирдим мәндә шәхсијјәтин икиләшмәси баш верир, бир нөв һаваланмаға башламышам.
Шејхдән хаһиш едирәм ҝүрҹү мәсәләсиндән габаг өз вәтәндашларымыза ағыл дуасы јазсын.
Замин ҺАҸЫ
