Әһли Бејт -АБНА- хәбәр аҝентлијинин вердији хәбәрә әсасән: Бакыда мајын 6-да кечирилмиш “Һиҹаба азадлыг” аксијасына ҝөрә һәбс олунанларын сајы 9 нәфәрә чатыб. Ҝүја Ҹинајәт Мәҹәлләсинин 221.2.2. (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) вә 221.3. (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) маддәси илә тәгсирли билинән вә һәмин маддәләрлә мәсулијјәтә ҹәлб едилән Телман Исмајыловун вәкили Дилгәм Ағајевин вердији мәлумата ҝөрә, онлардан 6-нын ад вә сојады мәлумдур.
Бунлардан бири Фүзули рајонундан мәҹбири көчкүн Ширхан Оруҹовдур. О, икинҹи груп әлилдир вә ејни заманда пневмонија хәстәлијиндән әзијјәт чәкир. Һимајәсиндә ики азјашлы ушағы вар.
Тәрлан Исмајылов Бакынын Биләҹәри гәсәбәсинин сакинидир. Субајдыр.
Талеһ Надир оғлу Әләкбәров Биләсувар рајонундандыр. Евлидир, 1 гызы вар.
Араз Исмајылов Бакы кәндләриндәндир.
Адлары гејд олунан 4 нәфәр вә адыны дәгигләдирмәк мүмкүн олмајан даһа бир шәхс мајын 6-да, аксија заманы һәбс олунублар.
Биләҹәри сакини, електрик Рәшад Ҹүмшүд оғлу Вәлигулијев мајын 9-да һәбс олунуб. Гардашы Елшад Вәлигулијевин “Медиа форум” сајтына вердији мәлумата ҝөрә, ону Бинәгәди Рајон Полис Идарәсинин әмәкдашлары евдән апарыблар: “Өјрәндик ки, Нәриманов Рајон Полис Идарәсиндәдир. Мүстәнтиглә әлагә сахласаг да, бизә иттиһамла бағлы һәр һансы ачыглама вермәди. Садәҹә ону өјрәндик ки, мајын 11-дә ону Бакы Истинтаг Тәҹридханасына көчүрүбләр”.
Елшад Вәлигулијев гардашынын “Һиҹаба азадлыг” аксијасында иштирак етдијини дејиб.
Аиләси Рәшад Вәлигулијевин һүгугларыны мүдафиә етмәк үчүн вәкиллә мүгавилә имзалајыб. Вәкил Заман Сәмәдов ачыгламасында билдириб ки, мајын 17-дә мүгавиләсини Бакы Шәһәр Баш Полис Идарәсинин истинтаг вә тәһгигат идарәсинин рәиси, истинтаг групунун рәһбәри Назим Исмајылова тәгдим едәҹәк, даһа сонра Бакы Истинтаг Тәҹридханасында Рәшад Вәлигулијевлә ҝөрүшәҹәк.
Аксијада иштиракына ҝөрә һәбс олунан Чинҝиз Новрузов исә Нәриманов Рајон Полис Идарәсинә мајын 13-ү, ҝүнорта саатларында ҝәтирилиб вә она иттиһам ирәли сүрүлүб.
Диҝәр ики нәфәрин исә кимлијини дәгигләшдирмәк мүмкүн олмајыб.
Дахили Ишләр Назирлији 6 мај аксијасы заманы һәбс олунанларын кимлији барәдә мәлумат вермәјиб.
Диггәт: Хәбәрдән истифадә етдикдә мәнбәјә истинад лазымдыр
