Әһли Бејт -АБНА- хәбәр аҝентлијинин вердији хәбәрә әсасән: Дүнја мүсәлманларынын дини лидери Ајәтуллаһ Имам Хаменеинин Әрдәбилдәки нүмајәндәси Сејид Һәсән Амилинин “Иран Азәрбајҹан чарпышмасынын пәрдәархасы” адлы бәјанаты әтрафында гызғын мүбаһисәләр давам едир. Бу бәјантдакы информасијаларын тәсдигләнмәси, Азәрбајҹан халгынын он илләр боју алдадылараг, Ирана гаршы дүшмәнчилик руһијјәсиндә көкләндијини тәсдиг едәҹәк.
Сејид Амилинин сөзләринә ҝөрә, Шушада һәрби әмәлијјатлар ҝедән заман Иран Азәрбајҹана машын карванлары илә силаһ-сурсат ҝөндәриб, һәтта мүштәрәк һәрби гәрәрҝаһ фәалијјәт ҝөстәриб. Иранлы сијасәтчиләр бу вахта гәдәр мүәјјән дипломатик ҝөзләнтиләрә ҝөрә бу јардымлар барәдә һеч заман, һәтта әввәлләр дә данышмајыблар.
Иранлы ајәтуллаһын бу ачыгламасына артыг Ермәнистан тәрәфи дә мөвгејини ачыглајыб. Бу өлкәнин мүдафиә назири Сејран Оһанјан парламентдәки чыхышы заманы Гарабағдакы мүһарибәдә Азәрбајҹан тәрәфдән әфганларын дөјүшдүјүнү сөјләјиб.
Сөзүҝедән дөврдә президент сәлаһијјәтләрини јеринә јетирән Али Советин кечмиш сәдри Јагуб Мәммәдов "Һәфтә ичи"нә дејиб: ”Мәним Иран рәһбәрлији илә апардығым данышыгларда силаһ мәсәләсини мүзакирә етмишик. Бунунла бағлы разылыг вар иди. Дөвләт хәттијлә јох, гејри-рәсми шәкилдә онлар бизә әввәл дә силаһ верирдиләр. Мүдафиә назирлији бу силаһлары алырды. Сонрадан һакимијјәтдән ҝетдијим үчүн бу разылығын сонракы агибәтинин неҹә олдуғуну билмирәм…”.Ј.Мәммәдов Дағлыг Гарабаға мүҹаһидләрин ҝәтирилмәси мәсәләсинә дә тохунду. Билдирди ки, бу ишләр онун һакимијјәтдән ҝетмәсиндән сонра баш вериб: "Лакин бу мәсәләләр әтрафында да данышыглар апарылыб. Әфганыстандан, Пакистандан, Чеченистандан вә с. ҝәләнләрин мәсәләси. Анҹаг бу данышыглар мәхфи сөһбәтләр иди. Хүсуси адамлар бу ишлә мәшғул олурду. Сонрадан өјрәндим ки, Пакистандан, Әфганыстандан ҝәләнләр вар. Лакин мәним вахтымда бу мәсәлә илә бағлы анҹаг данышыглар ҝедирди".
Диггәт: Хәбәрдән истифадә етдикдә мәнбәјә истинад лазымдыр
