Әһли Бејт -АБНА- хәбәр аҝентлијинин вердији хәбәрә әсасән: Бир мүддәт әввәл ишдән чыхарылан милли тәһлүкәсизлик назиринин сабиг биринҹи мүавини, ҝенерал-мајор Әли Нағыјевлә бағлы јени хәбәрләр јајылыб. Һәмин хәбәрләрдә әсас мәгам Ә.Нағыјевин јенидән јүксәк вәзифә саһиби олмаг истәји илә бу истигамәтдә фәалијјәтә кечмәси илә бағлыдыр.
Ә.Нағыјев вәзифәдән чыхарыланадәк һакимијјәтдә јүксәк вәзифә тутан шәхсләр арасында ән ҝүҹлүләрдән бири сајылырды. Индинин өзүндә дә онун хејли тәрәфдары вә јахынлары мүхтәлиф вәзифәләрдә чалышыр. Ҹәнаб Нағыјев мәрһум президент Һејдәр Әлијевин ән чох етимад бәсләдији хүсуси хидмәт әмәкдашларындан олуб. Бүтүн мәлумат вә әламәтләр ону ҝөстәрир ки, президент Илһам Әлијев дә ҝенерал Нағыјевә өнәм вериб. Әкс һалда, ҹидди рәгабәт вә гаршыдурмалар шәраитиндә онун узун мүддәт өлкәнин ән јүксәк вәзифәләриндә, өнәмли постларда мөвге тутмасы мүмкүнсүз оларды. Һәтта сон ајлара гәдәр онун вәзифә пирамидасында даһа да јүксәлдиләҹәји, назирликләрдән биринин башына ҝәтириләҹәји барәдә мөтәбәр мәлуматлар да ҝәлмәкдә иди.
Лакин бунларын әксинә олараг ону гәфилдән ишдән чыхардылар. Ә.Нағыјевин конкрет нијә вурулмасы барәдә рәсми ачыгламалар олмаса да мүәјјән даирәләр тәрәфиндән мәтбуата онун һакимијјәтин “кадр ислаһатлары” чәрчивәсиндә ишдән кәнарлашдырылдығы барәдә мәлуматлар өтүрүлдү. Гејд едәк ки, просесләрин сонракы ҝедишиндә бу версија тәсдигләнмәди. Гәзетимизә о да мәлум олуб ки, ишдән чыхарылмасындан аз сонра о, дөвләт рәһбәрлији тәрәфиндән гәбул олунуб, динләнилиб вә нормал илҝи ҝөрүб. Бу да ону ҝөстәрир ки, Ә.Нағыјевин гәләми гырылмајыб вә һакимијјәт рәһбәрлији онун үзәриндән хәтт чәкмәјиб. Мүхбиримиздә олан јени мәлумат да бу мүлаһизәни там тәсдигләјир.
Ону да дејәк ки, әслән Нахчывандан олан Ә.Нағыјев пешәкар чекист кими танынса да ады бир нечә дәфә галмагаллы бизнес мәсәләләриндә һалланыб. Әҝәр ону бундан белә дә “вурмаг” истәсәләр, мүтләг бу мәсәләләр габардылаҹаг. Јада салаг ки, Ә.Нағыјев милли тәһлүкәсизлик назиринин Ы мүавини вәзифәсинә Елдар Маһмудов назир тәјин олунандан - 2004-ҹү илдән сонра јүксәлмишди. Намиг Аббасовун дөврүндә исә о, МТН-ин игтисади ҹинајәткарлыға гаршы мүбаризә идарәсинә рәһбәрлик едиб. Ҝәлән мәлуматларын тәһлилиндән ајдын олур ки, онун назир Маһмудовла мүнасибәтләри сон вахтлар ҝәрҝин олуб. Ишин ән мараглы тәрәфи исә будур ки, онун сабиг назир Намиг Аббасовла да мүнасибәтләри јахшы олмајыб.
Амма онун һәр заман һакимијјәтин ән үст гатларындан ҹидди дәстәји олуб. Мәнбәмиз дејир ки, мәһз бу ҹидди дајаглары, бөјүк капиталы вә јүксәк пешәкарлыг габилијјәтинин олмасы она мүбаризәни давам етдирмәк үчүн ҝениш имканлар јарадыр. Әлдә етдијимиз билҝиләр ҝөстәрир ки, ҹәнаб Нағыјев бу имканларындан максимум истифадә етмәк гәрарындадыр. Ҝәлән хәбәрләрә ҝөрә, јахын заманларда Ә.Нағыјев јенидән һаким командаја гајтарылаҹаг. Она саһәси үзрә јүксәк постлардан бири верилә биләр. Һазырда әлимиздә олан билҝиләр ону демәјә әсас верир ки, јахын заманларда өлкәнин һәрби рәһбәрлијиндә ҹидди дәјишикликләр ҝөзләнилир. Мәһз бу дәјишикликләр фонунда да Ә.Нағыјев вәзифәјә ҝәтирилә биләр.
Гајнағымыз иддиа едир ки, мүдафиә назири Сәфәр Әбијев тезликлә постундан ҝөтүрүләҹәк. Хәбәрин мабәди бу мөвзу илә бағлы гәзетләрин јаздыглары илә үст-үстә дүшүр. Белә ки, хәбәрдә иддиа олунур ки, јахын вахтларда президентин һәрби мәсәләләр үзрә мүшавири Ваһид Әлијев мүдафиә назири постуна ҝәтириләҹәк. Диггәтли охуҹуларымыз хатырлајырса, бу барәдә өтән ај гәзетләр маншет хәбәрләри верибләр.
Гајнағымыз дејир ки, В.Әлијевин бошалаҹаг постуна да Ә.Нағыјевин ҝәтирилмәси ҝөзләнилир: “Әли Нағыјевин өзү дә бу поста тәјин олунмағы чох истәјир вә бу истигамәтдә бүтүн ҝүҹү илә чалышыр”...
Просесин мараглы ҹәһәти будур ки, бу мәсәләјә һәм администрасија рәһбәри Рамиз Меһдијев, һәм дә һакимијјәтдә кифајәт гәдәр ҹидди сөз саһиби олан ҝенерал Бәјләр Әјјубов исти бахыр. Лакин тәбии ки, әсас вә сон сөз президентин олаҹаг. Онун гәрары узун илләрдир һакимијјәтә гуллуг ҝөстәрмиш 3 ҝенералын - Әлијевин, Әбијевин вә Нағыјевин талејини мүәјјәнләшдирәҹәк. Истәнилән һалда јахын заманларда бу һакимијјәтин ҝенералларындан биринин гәләми там вә бирмәналы олараг гырылаҹаг.
Диггәт: Хәбәрдән истифадә етдикдә мәнбәјә истинад лазымдыр
