Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Украјнада Чернобыл Атом Електрик Стансијасында баш вермиш гәзанын 25-ҹи илдөнүмүнә һәср олунмуш тәдбирләр кечириләҹәк.
“УНИАН”нын мәлуматына ҝөрә, тәдбирләрдә Украјна президенти Виктор Јанукович, Русија президенти Дмитри Медведев, Москва вә Русија патриархы Кирилл иштирак едәҹәкләр.
Хатырладаг ки, 1986-ҹы ил апрелин 26-да Чернобыл АЕС-ин дөрдүнҹү енержи блокунда партлајыш баш вериб. Партлајыш нәтиҹәсиндә дөрдүнҹү блокун реактору тамамилә дағылыб. Гәзадан сонра атмосферә 190 тон радиоактив маддә јајылыб. Експертләрин мәлуматларына әсасән радиоактив туллантыларын үмуми мигдары 50 милјон Күри тәшкил едиб ки, бу да 1945-ҹи илдә Хиросимаја атылан атом бомбасындан 500 дәфә ҝүҹлүдүр. Украјна, Русија вә Беларусун 145 мин квадрат километрдән чох әразиси радиоактив тәсирә мәруз галыб. Гәзадан сонра АЕС әтрафындакы 30 километрлик зонада јашајан әһали - 115 миндән чох инсан көчүрүлүб. Үмумиликдә 586 мин нәфәр радиоактив тәсирә мәруз галыб. Онлардан 200 мини гәзанын нәтиҹәләринин арадан галдырылмасында иштирак едәнләр, 116 мини Чернобылда јашајанлар, 270 мини исә Украјна вә Беларусун радиасијаја мәруз галмыш рајонларында јашајанлардыр. Фәлакәтин илк ҝүнләриндә партлајыш, јанғын вә кәскин шүаланма нәтиҹәсиндә 50 нәфәр өлүб. Өләнләрин үмуми сајынын ҝәләҹәкдә 4 минә чата биләҹәји прогнозлашдырылыр.
Чернобыл АЕС 2000-ҹи ил декабрын 15-дә бағланыб.
Гејд едәк ки, бу ҝүн Бакы Кафедрал Лисләсиндә дә Чернобыл атом-електрик стансијасында баш верән фаҹиәли һадисәнин гурбанларынын хатирәсинә һәср олунмуш аным мәрасими кечирилир.
Диггәт: Хәбәрдән истифадә етдикдә мәнбәјә истинад лазымдыр
