Бу суала бир дин алими суалла ҹаваб верди. “Мәләкләр нә үчүн јарадылыб?” соран мүсаһибиндән “чичәкләр нә үчүн јарадылыб?” сорушду. Бәли, Ислам тәлимләриндә һеч бир суал јасагланмаса да фајдалы вә ҝөзәл бир шејин нә үчүн јарадылмасы барәдә сорушмамаг мүмкүн сајылыр. Фајдалы вә ҝөзәл шејләр она ҝөрә јарадылыб ки, инсанлар дүшүнәрәк зөвг алсын. Амма “шејтан нә үчүн јарадылыб?” сорушмаг даһа мәнтигидир.
Мәләкләр "нур"дан јарадылмыш, ләтиф мәхлуглардыр. Илаһи әмрләрә итаәт едәр, даим хејир ишләр ҝөрәрләр – јазыр Суалларлаислам сајты.
Каинатдакы мадди, мәнәви бүтүн ишләрдә вәзифәлидирләр. Етдикләри ишләрин әһәмијјәтинә ҝөрә дәрәҹәләри дә бир-бириндән фәрглидир. Ән бөјүкләри Һәзрәти Ҹәбрајыл, Микајыл, Исрафил вә Әзраилдир. (ә)
Даим инсанла бирликдә олан мәләкләр вардыр. Бунларын бир гисми, инсанларын савабларыны вә ҝүнаһларыны јазарлар. Бунлара "кирамән катибин" дејилир. Инсан һеч заман тәк дејил, бу мәләкләрлә бирликдәдир. Бу мүбарәк јолдашларын варлығыны иман илә һисс едән адам әсла тәклик чәкмәз.
Әзраил дүнја һәјатында икән, өлүм анында ҝөрә биләҹәјимиз тәк мәләкдир. Ән гијмәтли варлығымыз олан руһумузу әманәт алар, ахирәт аләминә апарар.
Гәбир аләминдә бизи ики мәләк гаршылајар: Мүнкәр вә Нәкир. Имана вә ибадәтә даир суаллар сорушарлар. Вериләҹәк ҹаваба ҝөрә гәбир әзабы вә ја сәадәти башлар.
Ҹәбрајыл әлејһиссалам исә, Ҹәнабы Һаггын, гулларына әмр вә гадағанларыны билдирәр; хәбәрләр ҝәтирәр.
Исрафил әлејһиссалам, "јенидән һәјат вермә" һәрәкәтиндә вәзифәлидир. Рәббимизин "һәјат вермә" илә әлагәдар әмр вә ирадәсини тәтбиг едәр. Хүсусилә баһар ајларында ҝөрүлән дирилишдә "Муһји" адынын тәҹәллисинә вәсилә олар. Өлүмдән сонракы дирилишимиздә дә јенә бу мәләк вәзифәлидир.
Микајыл әлејһиссалам исә, рузиләрин јетишдирилмәсиндә вә пајланмасында илаһи әмрләри тәтбиг едән бөјүк мәләкдир.
