Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Медиа Мәркәзиндә һәбс олунан исламчыларын һүгугларыны мүдафиәси илә әлагәдар мәтбуат конфрансы кечирилиб.
Конфранс Сүлһ вә Демократиа Институтунун рәһбәри Лејла Јунус тәрәфиндән тәшкил олунуб. Конфрансда Азәрбајҹан Ислам Партијасынын (АИП) сәдри Мөвсүм Сәмәдовун вәкили Анар Гасымов, партија вә медиа нүмајәндәләри иштирак едиб. Һазырда Сүлһ вә Демократија институнун сијаһысында 60-а јахын сијаһы мәһбусун олдуғуну дејән Лејла Јунус, барәләриндә ҹинајәт иши галдырылан 10 нәфәр исламчынын да һәбс олунаҹағы һалда бу сијаһыја салынаҹағыны билдирди. "Билдијиниз кими бу ил јанвар ајынын әввәлиндән башлајараг Азәрбајҹанда күтләви репресијјалар баш вериб. Бу һәбсләр чох тәәҹҹүблүдүр ки, АИП сәдринин партијанын баш мәҹлисиндәки чыхышындан сонра башлајыб. Һәбс олунанларын сијаһысы бунлардыр: 1) АИП сәдри Мөвсүм Сәмәдов. 2) АИП сәдринин мүавини Вагиф Абдуллајев. 3) Зүлфүгар Микајылзадә хәстә олдуғу үчүн һәлә ки, һәбси 4 ајлыг ев дустаглығы илә әвәз олунуб. Амма ҹинајәт иши гүввәдә галыр. Үзәриндән ҝөтүрүлмәјиб. 4) Дәјанәт Сәмәдов. Мөвсүм Сәмәдовун әмиси оғлу. 5) Фирдовси Мәммәдрзајев. Мөвсүм Сәмәдовун гајны 6) АИП Астара комитәсинин сәдри Руфуллаһ Ахундзадә 7) Масаллы руһаниси Фәрамиз Аббасов 8) АИП Ҝәнҹә комитәсинин сәдри Јусиф Әләкбәров. Һазырда Интерпола ахтарыша верилиб. 9) Ҝәнҹә руһаниси Азәр Ҹәбијев.10) Ҝәнҹә руһаниси Фәхри Илјасов. Әҝәр һәбс олунанлар һаггында галдырылан ҹинајәт маддәләри мәһкәмәдә тәсдиг олунса онлар сијаси дустаг һесаб олунаҹаглар. Һазырда биз онлары потенсиал сијаси дустаг һесаб едирик.
Мараглысы будур ки, мәһбусларын хүсусилә АИП сәдринин үзәринә гојулмајан ҹинајәт иши галмајыб. Демәк олар ки, 2000-ҹи илдән бу ҝүнә гәдәр бир нечә иҹтимаијјәт нүмајәндәләри бу маддәләрлә һәбс олунублар. Мән артыг бу гәнаәтә ҝәлмишәм ки, ким бу маддәләрлә һәбс олунурса, һәмин һәбс сијаси характер дашыјыр. Әҝәр Мөвсүм Сәмәдов галдырылан маддәләрлә һәбс олунса, ону 10-15 илә гәдәр һәбс ҹәзасы ҝөзләјир. Һәбс олунанларын ҹинајәтләри сүбута јетирилмәмәсинә бахмајараг, онлар ганунсуз олараг һәбсдә сахланылыр"-дејә Лејла Јунус әлавә едиб.
Гејд едәк ки, конфранс заманы Конфранс Сүлһ вә Демократиа Институтунун рәһбәри бәзи һакимләрин адларынын бејнәлхалг мәһкәмәләрә вериләҹәјини ачыглады: "Биз онлар һаггында һәбс гәрары чыхардан һакимләрин адыны мај ајында ачыглајаҹағыг. Һәмин һакимләр Авропа һүгуг консепсијасынын 5 мадәсинин 1-ҹи бәндини позублар. Биз һәмин һакимләр барәсиндә Бејнәлхалг тәшкилатлара мүраҹиәт едәҹәјик. Һазырда һәбс олунан Исламчы мәһбуслар ики јерә бөлүнүрләр. АИП-лә әлагәси олан вә мүстәгил нүфузлу руһаниләр. Биз Сүлһ вә Демократија Институту олараг илк ҝүндән демишик вә инди дә дејирик ки, АИП сәдри вә онун тимсалында тутулан шәхсләр сөз азадлығына ҝөрә һәбс олунублар. Әҝәр АИП сәдринин чыхышына һәбс дүшүрсә онда Бакыда истефа сәсләндирән бүтүн мүхалифәтчиләр ҝәрәк һәбс олунсунлар. АИП сәдринин һәбси әслиндә сијаси характер дашыјыр. Диҝәр руһаниләр исә ҹәмијјәтдәки нүфузларыны вә Мөвсүм Сәмәдову дәстәкләдикләринә ҝөрә һәбс олунублар.
Азәрбајҹан һакимијјәти АИП сәдринин симасында руһаниләрин сөз азадлығындан горхду вә она ҝөрә дә бу һәбсләри һәјата кечирди. Онун сөзү азәрбајҹанлыларын гәлбинин сөзү иди. Биз бу ганун позунтулары илә әлагәдар бејнәлхалг тәшкилатлара мүраҹиәт едәрәк, пресс-релиз һазырлајаҹағыг. Азәрбајҹан режими диҝәр авторитар режимләрдән фәргли олараг, истәјир ки, бүтүн вәтәндашлары гојун кими идарә етсин. Бурада һәр кәси тутурлар. Һәм АБШ-да охујаны һәбс едирләр, һәм дә, Иранда. Бу һакимијјәт һеч кәсә фәрг гојмур.Биз АИП сәдринин чыхышыны хариҹи дилләрдә тәрҹүмә едәрәк, аидијјаты тәшкилатлара ҝөндәрәҹәјик".
Диггәт: Хәбәрдән истифадә етдикдә мәнбәјә истинад лазымдыр
