Әһли Бејт -АБНА- хәбәр аҝентлијинин вердији хәбәрә әсасән: Диктатор Һүснү наМүбарәкин истефасындан сонра вәзијјәтин гаранлыг галдығы вахтда Мисирдә өлкәнин фактики идарәчилијини һәјата кечирән орду ҝөзләнилмәз аддым атыб. Мүбарәкдән һакимијјәти алан орду команданлары 30 иллик режими јыхан үсјанын архасындакы интернет активистләријлә ҝөрүшәрәк өлкәнин ҝәләҹәјини мүзакирә едиб.
Ҝенераллар фәал ҝәнҹләрлә ҝөрүшдү
“АФП” аҝентлијинин вердији хәбәрә ҝөрә, Ҝооҝле сајтынын Јахын Шәрг үзрә идарәчиси Ваил Гоним вә Мисирин танынмыш блоҝҝери Әмр Саламанын да араларында олдуғу 8 фәал Али Һәрби Шура үзвү 2 ҝенералла ҝөрүшүб.
Гоним вә Салама Мүбарәк әлејһинә үсјанын башланмасында тәсири олан бир интернет сајты васитәсилә јајдыглары ачыгламада билдирилир ки, ҝенералларла ҝөрүшдә һәм ордунун мөвгејини анламаг, һәм дә ҝәнҹ фәалларын өз истәкләрини сәсләндирмәси фүрсәти олуб. Активистләр ордунун Мисири идарә етмәк нијјәти олмадығыны вә ҝәләҹәкдә тәк јолун сивил бир дөвләтин бәргәрар олдуғуну сөјләјиб.
Мүвәгәти идарәчилији әлинә алан Мисир ордусу өлкәнин үзәринә ҝөтүрдүјү бејнләхалг өһдәликләрә әмәл едиләҹәјини дә билдириб.
“Дахили ишләр назири бизә горхаглыг өјрәтди”
Мүбарәк әлејһинә митингләрин сәнҝидији Тәһрир мејданы бу дәфә полисләрин етираз мејданына чеврилиб. Јүзләрлә униформалы вә мүлки ҝејимли полис ингилаба дәстәк вермәк үчүн Тәһрир мејданына доғру јүрүш едиб. Шаһидләрин сөзләринә ҝөрә, әлләриндә Мисир бајраглары дашыјан полисләр “Биз вә халг бирик” шүарлары сәсләндириб. Онлар әмәкһаггларынын артырылмасыны тәләб едибләр.
Етираз аксијасынын тәшкилатчыларындан бири “12 илдир полис ишләмәјимә бахмајараг ајлыг әмәкһаггым 115 доллардыр. Кечмиш дахили ишләр назири Һәбиб Әл Әдли бизә горхаглығы өјрәтди. Нејнијәк, мәҹбур олуб халгдан рүшвәт алырдыг”,-дејә сөјләјиб.
Банкирләр дә ајаға галхды
Мисирин икинҹи шәһәри Исҝәндәријјәдә исә банк ишчиләри етираз аксијасы кечириб. Банкирләр маашларынын артырылмасыны тәләб едибләр. Нүмајишчиләрдән бири кечмиш Мисир диктаторуна јахын адамларын банклардан бирини үмуми дәјәринин 10 фаизи мәбләғиндә өзәлләшдирдијини билдириб.
Диктаторун аиләсиндә галмагал
Бундан башга Мисир медиасы деврилмиш лидер Һүснү Мүбарәкин оғуллары Ҹамал илә Ала арасында әлбәјаха даваја чевриләҹәк шәкилдә мүбаһисә етдикләри барәдә хәбәр јајыб. “Әл Јоум” гәзетинин јаздығына ҝөрә, Мүбарәкин кичик оғлу Ала һадисәләрин бу һәддә чатмасында Ҹамал Мүбарәки ҝүнаһландырараг гардашыјла мүбаһисә едиб.
Мүбарәк депрессија кечирир
АБШ-ын “НБҸ” телевизијасында јајымланан “Тодај” програмына гатылан Мисирин Вашингтондакы сәфири Семиһ Шүкрү 82 јашлы Һүснү Мүбарәкин сәһһәтиндә ҹидди проблемләрин олмасыјла бағлы кәшфијјат хәбәри алдығыны сөјләјиб. Лакин дипломат бу һагда шәхси мәлуматынын олмадығыны да билдириб.
Мисирдә јајымланан ики гәзетин дүнәнки сајларында мүхалифәтин күтләви аксијаларындан сонра ҹүма ҝүнү истефа вермәк мәҹбуријјәтиндә галан Мүбарәкин дәрман гәбулуну рәдд едтијини, депрессија кечирдијини вә Шарм Әл Шејх шәһәриндәки резиденсијасында дәфәләрлә һушуну итирдијини јазыб.
Хатырладаг ки, Фәләстинин “Ма’ан” хәбәр аҝентији дә Һүснү Мүбарәкин сәһһәтиндә ҹидди проблемләрин олдуғуну вә Мисир халгына үнванладығы сон мүраҹиәтиндән өнҹә һушуну итирдијини вә комаја дүшдүјүнү јајмышды. Мәлуматда билдирилирди ки, Мисир ордусу сағламлығынын пис олмасы сәбәбијлә Мүбарәкә игтидарынын сон ҝүнләриндә тәзјиг ҝөстәрмәкдән јајыныб.
Авропа Мүбарәки мүфлис едәҹәк
Исвечрә һөкумәти Һүснү Мүбарәкин бу өлкәдәки банк һесабларыны дондурдугдан сонра нөвбәти ачыглама Инҝилтәрәдән ҝәлиб. Инҝилтәрә һөкумәтинин үзвү Мүбарәкин хариҹи өлкәләрдәки варидатыјла бағлы бејнәлхалг иҹтимаијјәти бирликдә һәрәкәт етмәјә чағырыб. Тиҹарәт назири Винс Кејбл Мүбарәкин ганунсуз јолларла хариҹи өлкәләрә пул чыхармасына јардым едән Инҝилис банкларына гаршы һәрәкәтә кечәҹәкләрини дә сөјләјиб.
Фанса һөкумәти исә рәсми Гаһирәнин сорғусуна әсасән кечмиш президентин Франсадакы активләрини јохламаға һазыр олдуғуну билдириб. Бу барәдә хәбәри “Франҹе Пресс” аҝентлији Франсанын игтисадијјат назири Кристин Лагарда истинадән јајыб.
“Биз там сәмимијјәтлә Мисир ганунвериҹилијиндә ҝөстәриләнләрин јеринә јетирилмәси үчүн Гаһирәдән ҝәләҹәк соруғулара ҹаваб верә вә арашдырмалар апара биләрик”,-дејә назир сөјләјиб. Онун сөзләринә ҝөрә, бу барәдә Авропа Бирлији илә дә мәсләһәтләшмәләр апарылаҹаг.
Диггәт: Хәбәрдән истифадә етдикдә мәбәјә истинад лазымдыр
