Бу ҝүн бир нечә ил өнҹә маҝистрал јоллары бағлајан, аксијалар кечирән Бакы кәндләриндә сакитлик һөкм сүрүр. Кәнардан бахана елә ҝәлир ки, бакылыларын артыг бүтүн проблемләри јолуна гојулуб. Амма әсл вәзијјәт неҹәдир? Доғруданмы, истәр Абшерон, истәрсә дә Бакынын бу кәндләри әһатә едән рајонларында проблем јохдур? Бәлкә бу өзләрини һакимијјәтдә һисс едән Бакы әһлинин мараглы хүсусијјәтидир? Јәни, һакимијјәтдә башга бөлҝәдән бири оланда проблемләри габардыр, бу ҝүн Илһам Әлијеви өзләрининки сајдыгларындан сәсләрини чыхармаг истәмирләр. Амма һәгигәт будур ки, Абшерон јарымадасында јерләшән кәндләрин проблемләри битиб-түкәнмәздир.
Бәзи кәндләрин сакинләри илә етдијимиз сөһбәтләр дә буну тәсдигләјир. Онлар билдирдиләр ки, һазырда Абшерон кәнд вә гәсәбәләриндә чыхан тәбии сулар зијанлыдыр. Чүнки бу сулар Бакы шәһәриндә чәкилән метро тунелләринин јералты сухурлары тутмасы, јералты суларын мәҹрасыны дәјишмәси, бундан башга Тағыјев, Сураханы вә Балаханы нефтинин јаратмыш олдуғу фәсадлар бирбаша Абшерон јарымадасында јашајанларын һәјатларыны дөзүлмәз һала ҝәтириб. Вахты илә әл гујуларындан ичмәк үчүн чыхарылан сулар, бу ҝүн ичилмәз вәзијјәтдәдир. Һәмин сулар шорлашмыш, тәркиби дәјишмиш вә инсан организми үчүн тәһлүкә мәнбәјинә чеврилиб.
“Бәс нијә Бакы кәндләри бу проблемләрлә бағлы сәсләрини чыхармыр” суалына ҹаваблары исә белә олду: “Бу проблемләр талејин ахарына тапшырылыб. Нә гәдәр мәмурлар вәзифәни халга дејил, өзләринә хидмәт үчүн олдуғуну дүшүнәҹәкләр, биз бу вәзијјәтдә јашајаҹаг. Һәм дә бу елә мәсәләдир ки, ҝәрәк бүтүн кәндләр шикајәт етсинләр. Кәндләр исә бир-бири илә әдавәтдәдирләр. Әслиндә, Бакы кәндләринин әксәријјәти мүхалифәтдән ҝүҹлү бир мүхалифәтдир. Ҹамаатын дахилиндә мәмурлара гаршы барышмаз бир мөвге вар. Мәмурлар бу кәндләрдә мүхалифәт үчүн сосиал база јарадырлар. О шәраит ки, мүхалифәтә лазымдыр вә јарада билмир, ону елә мәмурларын өзләри јарадыр. Һәјасызлыглары, әдаләтсизликләри, виҹдансыз һәрәкәтләри илә әввәл-ахыр халгы өзләринә гаршы ајаға галдыраҹаглар”.
Сакинләр Абшерон бағларында виллалар тикдирән мәмурларын да әһалинин әсас наразылыг објектләри олдугларыны билдирир: “Онлар милјон долларлара баша ҝәлән делфинариләр јарадыблар. Һәмин назирләр өз бағларында сахламыш олдуглары итләринә һәр бир Азәрбајҹан вәтәндашынын ҝүндәлик гида расионуна дүшән гидадан артыг јемәк једирдирләр”.
Бакы вә әтраф кәндләрдә торпаг проблеминин јашанмасы да сакинләрин наразылыг етдији саһәләрдәндир: “Бу ҝүн Абшерон вә Бакыда олан торпагларын, бурада гејдијјаты олмајан адамлара пајланмасы, сатылмасы индидән ҹидди мүнагишәләрә сәбәб олаҹағынын ҝөстәриҹисидир. Јүксәк чинли мәмурларын Маштаға-Бузовна јолунда торпаг саһәләри алыблар. Бузовна гәсәбәсинин торпаг фонду демәк олар ки, артыг јохдур.
Абшерон рајону Азәрбајҹанын бәдәниндә хәрчәнҝ хәстәлијини јајан микробдур. Бу рајонун инзибати бөлҝүсү Хырдалан гәсәбәсиндә јерләшсә дә, онун тәсәррүфат саһәләри Бузовнаја, Сураханыја, Раманыја, Зирәјә, Көһнә Галаја, Түркан јолуна, Маштағада вә Бакынын диҝәр кәндләрә аиддир. Мәмурлар Мүлки Мәҹәлләни, дөвләт башчысынын сәрәнҹамларыны бир тәрәфә атыб, садәҹә, ҹинајәтлә мәшғул олурлар.
Бакы кәндләриндә вилла тикән мәмурлар арасында ФҺН рәһбәри Кәмаләддин Һејдәров, дахили ишләр назири Рамил Усубов, верҝиләр назири Фазил Мәммәдов, дөвләт әмлак комитәсинин сәдри Кәрәм Һәсәнов, нәглијјат назири Зија Мәммәдов вә јүзләрлә јүксәк чинли мәмурун ады һалландырылыр. Дәниз гырағындан тутмуш, бүтүн Бузовна, Маштаға јолунун үстүндәки виллаларла мараглансаныз, көкү ҝедиб јухары чыхар. Елә виллаларын өзү ҹинајәт ишидир, әшјаји дәлилдир. Амма рәсмијјәтә ҝәлинҹә, мәлум олур ки, ҝуја бу вилланы һансыса гачгын тикдириб. Вә ја Бузовна гәсәбәсинин мәркәзиндә ағдамлы гачгынларын адындан тиҹарәт мәркәзи ачыблар. Гачгынын пулу вар, вилла, маркет тикдирсин?! Бу вилланы тикән халгы сојан, дөвләтин бүдҹәсини мәнимсәјән, коррупсијаја вә рүшвәтә уғрамыш адамлардыр. Билҝәһдә, Бузовнада, Нардаранда, Шүвәланда, Новханы кәндинин бағларында бүтүн мәмурларын виллалары вар. Бунун көкүндә исә бу ҝүн дә Азәрбајҹанда мәмурларын ҝәлирләринин арашдырылмамасы дурур. Һеч кәс арашдырмыр ки, филан назир филан вилланы һансы пулла тикиб, онун оғлу 200 минлик машыны һансы пулла алыб.”
