Әһли Бејт -АБНА- хәбәр аҝентлијинин вердији хәбәрә әсасән: лһам Әлијевин март ајынын сонунда мүшавирә кечирәҹәји ҝөзләнилир. Шүбһә јохдур ки, бу мүшавирә баш тутарса, бәзи мәмурлар постларыны һәмин топлантыда итирмәли олаҹаглар. Чүнки өлкә башчысы назирләри тәнгид етмәклә кифајәтләнәрсә, бу һеч дә она мүсбәт дивидент ҝәтирмәјәҹәк. Үстәлик, Гәрб һәмин мүшавирәдән сонра Әлијевин сијаси һакимијјәти барәдә јекун рәјини билдирәҹәк. Чүнки артыг Гәрб Русијамејлли вә коррупсионер команданын вәзифәдән кәнарлашдырылмасыны ҝөзләјир.
Бәс, истефаја һансы јүксәк чинли мәмурларын ҝөндәрилмә еһтималы бөјүкдүр?
Истефаја ҝөндәриләнләрин башында мәһз баш назир Артур Рәсизадәнин олаҹағы ҝөзләниләндир. Игтисадијјатымыздакы проблемләрлә бағлы А.Рәсизадәни дә кифајәт гәдәр сучламаг олар. Азәрбајҹан дилини јахшы билмәјән бу шәхсин ҝүлүш објектинә чеврилмәси вә јашынын чохлуғу да Илһам Әлијевин Артур Рәсизадәни истираһәтә јоллајаҹағындан хәбәр верир.
Бир вахтлар саһибкарлара објектләринин фөвгәладә һаллара ҹаваб вермәдијини бәһанә едәрәк, онлара мин-бир әзаб-әзијјәт верән вә беләликлә дә ән чох шикајәт едилән мәмурлардан олан ФҺН рәһбәри Кәмаләддин Һејдәровун исә сон заманлар иҹтимаијјәтлә әлагәләрини интенсивләшдирмәси дә ҝөстәрир ки, бу шәхс нәјәсә һазырлашыр. Һәр һалда һеч бир мәмурла проблеминин олмадығыны сөјләмәси дә демәјә әсас верир ки, Кәмаләддин Һејдәров баш назир олмаг истәјир. О сәбәбдән дә, бүтүн назирләрин онун рәһбәрлији алтында ишләјәҹәји илә бағлы публика васитәси илә Илһам Әлијевә месаж ҝөндәрир. Јәни “дахилдә бир-биримизи гырсаг да, буну бүрузә вермәјәҹәјәм”, - сөјләјир.
Сон ҝүнләр она јахын мәтбуатын бәзи назирләрлә “дөјүшә” ара вермәләри дә ҝөстәрир ки, Кәмаләддин Һејдәров баш назирлик јолунда әлавә проблемлә мәшғул олмаг истәмир. Анҹаг истефаја тәкҹә баш назирин ҝөндәрилмәјәҹәји вурғуланыр. Гејд олунур ки, бу сијаһыја мүдафиә назири Сәфәр Әбијевин, тәһсил назири Мисир Мәрдановун, дахили ишләр назир Рамил Усубовун, әмәк вә әһалинин сосиал мүдафиә назири Фүзули Әләкбәров ады дүшә биләр.
Гејд едәк ки, Сәфәр Әбијев ләзҝиләрин нүмајәндәси кими һакимијјәтдә тәмсил олундуғундан бу ҝүнә гәдәр она тохунулмајыб. Амма И.Әлијевин узун мүддәтдир ордуда баш верәнләрә бирбаша ҝүнаһкар кими ҝөстәрилән “јорулмуш” ҝенералыны артыг әвәзләјәҹәји билдирилир. Икинҹи истефаја ҝөндәриләҹәк назир исә тәһсил назири Мисир Мәрданов олаҹаг. Онун сон вахтлар баш верән һиҹаб галмагалы илә өлкәдә сүни ҝәрҝинлик јаратмасы бу шәхсин истираһәтә ҝөндәрилмәси илә нәтиҹәләнәҹәк. Әмәк вә әһалинин сосиал мүдафиәси назири Фүзули Әләкбәров истефаја ҝедәҹәји хәбәри исә јени дејил. Фәгәт иҹтимаијјәт узун мүддәтдән бәри сөзүҝедән назирин постуну итирәҹәкләри хәбәрини АзТВ-дән ешитмәјә һазырлашса да, өлкә башчысы әлверишли мәгам ҝөзләдији үчүн назирә тохунмајыб. Инди исә бу вахта гәдәр постуну горумағы баҹаран Фүзули Әләкбәров үчүн вәзифәдә галмаг чәтиндир. Дахили ишләр назири Рамил Усубовун исә Илһам Әлијевин бүтүн дүнјада гынаг објектинә чеврилмәси сәбәбиндән вәзифәсиндән кәнарлашдыраҹағы вурғуланыр.
Бундан әлавә Хариҹдә Јашајан Азәрбајҹанлыларла Иш үзрә Дөвләт Комитәсинин сәдри Назим Ибраһимовун сон заманлар АТВ әтрафында баш верән галмагаллар вә диаспоралардакы јејинтиләрлә бағлы истефаја ҝөндәриләҹәји дә верилән мәлуматлар сырасындадыр.
Әдлијјә назири Фикрәт Мәммәдовун, Дини Гурумларла Иш үзрә Дөвләт комитәсинин сәдри Һидајәт Оруҹовун, Дөвләт Әмлак Комитәсинин сәдри Кәрәм Һәсәновун да ҹидди тәнгид олунаҹаглары, амма истефаја ҝөндәрилмә мәсәләләринин суал алтында галдығы билдирилир.
Анҹаг бәзи назирләрин постларыны горујаҹаглары да верилән хәбәрләр арасындадыр. Бу сијаһыда милли тәһлүкәсизлик назири Елдар Маһмудовун, хариҹи ишләр назири Елмар Мәммәдјаровун, Рабитә вә Информасија Технолоҝијалары назири Әли Аббасовун, Сәһијјә назири Огтај Ширәлијевин, Верҝиләр назири Фазил Мәммәдовун, Малијјә назири Самир Шәрифовун, Нәглијјат назири Зија Мәммәдовун, Кәнд тәсәррүфат назири Исмәт Аббасовун адыны чәкмәк олар.
Гејд едәк ки, һакимијјәтин бу ҹүр сәрт аддым атмасына Јахын Шәргдә баш верән просесләр сәбәб олуб. Рәһбәрлик һакимијјәтин бүтөвлүклә итирилмәсиндәнсә, халгын узун илләрдир наразы олдуғу бир груп мәмурун истефаја ҝөндәрилмәсини даһа мәгбул сајыб. Бурада ән мүәммалысы да одур ки, Илһам Әлијев ҝедәнләр сијаһысына һансы назирин адыны салараг, “гурбан” верәҹәји һәлә дә там олараг дәгигләшмәјиб. Бах, бу гејри-мүәјјәнлик дә чохларыны тәшвиш ичәрисиндә сахлајыр. Елә һәр һәфтә назирләрин коррупсија илә мүбаризә ады алтында кечирдији топлантылар да буну демәјә әсас верир ки, мәмурлар өзләрини Илһам Әлијевә севдирмәк јарышына ҝирибләр.
Диггәт: Хәбәрдән истифадә етдикдә мәбәјә истинад лазымдыр
