Хлор...
Сајмазлыг чыхмасын, 50 јашын һәниртиси ешидилән анларда кимлијимә, етигадыма, әхлагыма, јаздыгларыма әтрафын мүнасибәти демәк олар ки мараг даирәмдән чыхыр, Аллаһын разылығыны дүшүнүрәм. Гој Азәрбајҹан да, Иран да, Туран да бәјәнмәсин. Тәки мәни хошбәхт етмәк гүдрәтиндә олан Аллаһын һүзурунда үзүағ дајаным. Мән динә зорла итәләнмәдим, диндән јапышмыш әлләримә арматурла дөјүлдүјү бир шәраитдә ону бурахмадым. Мән Исламы 80-ҹи илләрин әјјаш тәләбә һәјатынын ләззәти дамағымдан ҝетмәмиш сечдим. Һәлә пианода “пајыз ҝәлди”ни чаланда, тәләбә јолдашларын ҝөзләри дилләр үстә ојнајанда Аллаһы дүшүнүрдүм. Бу ҝүн дини кәсимә јөнәлмиш иттиһамлар арасында мәни “көһнәпәрәст” иттиһамы гәдәр ҝүлдүрәни јохдур. Чүнки өзүнү мүасир, дини кәсими истиснасыз олараг “әнтиг” сајанларын иликләриндәки көһнәлији, ҹәһаләти 14 ҝеҹәлик ај кими ҝөрүрәм. Бу ҝириши вердим ки, мүәллифә јухарыдан бахмаг истәјән әбләһ гахылыб отурсун јериндә, желели сачынын битини тәмизләсин! “Дәвәдән бөјүк фил вар” галсын ашыглара – һәр нәдән бөјүк Аллаһдыр!
Аллаһ истәдијини Гази вә ја Шәһид, истәдијини Мүстәбид вә ја Леш едир. Бош јерә истәмир Аллаһ – һәр бир истәјиндә һикмәт!
Ај Халг!
Ај Халг! Сәнин башына дөнүм, үзүм ајагларынын алтына! Һәр аддымда тәһгир олунур, силләләнир, дамланырсан. Аллаһ инсана “сәни азад јаратдым, башгасына гул олма” – бујурур. Бәс нәдән горхурсан? Ҝүндә нечә јол өлмәк олар? Јухудан ајыландан јухуја ҝедәнә гәдәр һәр ҝөрүш сәнинчин бир коррида олуб. Һаггын барәдә дүшүнәндә горхурсан, онда галмыш ајаға галхыб тәләб едәсән. Демирәм, учан көшкүнү бағла, чых етираз ет. Билирәм ки, һәмин ҝөјәрти көшкүндән бир баталјон силаһ-сурсат чыхарыб атаны јандырар, балаларыны јетим гојарлар. Гәрәзим башгадыр: нә олар ки, үрәјиндә һагг тәрәфдары оласан, јаддан чыхмыш күмәндә, јорған алтында һаггы дејәсән? Дејәсән ки, бу өлкәнин башында дуранлар... Горхма, өзүмүзүк, ешидән јохдур. Дејәсән ки, һакимијјәтдә отуранлар ҹинајәткар, һәбсханадакылар халг фәдаиләридир! Мәни јандыран сәнин крал габағында рәгсин, сечкиләрә сүпүрҝә дәстәләри кими лафетдә ҝетмәјин, бир фәдаи һәбс олунанда режимин бөһтанларына инаныб, “әҹҹәб едибләр басыблар дама” демәјиндир. Сән һәлә дә билмирсән ки, бојнуна сарылмыш бу әфи, тәрпәнишини ҝөзләјир ки, истефа балаласын!
Мән диндарам!
Мән диндарам, өзү дә фундаменталистиндән. Јәни Һәзрәт Пејғәмбәр (с) нә бујурубса, она баш әјирәм – хошум ҝәлсә дә, ҝәлмәсә. Өз истәјини мәшугун истәјинә гурбан вермәјән ашиг јох, баздыр! Амма башгаларынын да агрессивликдән узаг бахышларыны намусум кими тохунулмаз сајырам – агрессив олмајан! Өзүм дә отурмушам Мәркәзи Кәшфијјат Идарәсиндә, МОССАД-да, нә билим, ҺЕЧЗАД-да аллерҝија јарадан Гумда. Дејирләр мәсҹид, һиҹаб, азан истәјәнләр Гумдан гызышдырылыр. Демирләр ки, ҹаммат 400 кв-метрлик евини, бағ-бағчасыны, ҹәннәт вәтәнини, гоһум-әгрәбасыны, дост-танышыны гојуб, әгрәб долу Гум сәһрасында нә ахтарыр? Бу Гуму ҹәннәтә дөндәрән бир Пејғәмбәр өвладынын нәши үзәриндә гурулмуш “һәрәм” дејилән зијарәтҝаһдыр. Јәни илаһи бир ешг руһијјәси сусуз сәһралары ҹәннәтә дөндәриб. Амма мәним буз булаглы ҹәннәт јурдум иблисләрин мәкрләри сајәсиндә ҹәһәннәмә чеврилиб вә тәрки-вәтән олмушуг. Јәни диндара иран-миран дамғасы вурулмасы бир шејә хидмәт едир: Халгын ганыны раһат сорсунлар! Диндар ҹинајәткар олсајды, ону өз адыјла тутар, Аллаһ адамларынын евинә силаһ-сурсат атыб шәрләмәздиләр.
Ај Мүхалифәт!
Бу ҝүн Сән Мүхалифәтин истибдаб зүјчүләринә гошулуб диндары “Иранын адамы” адландырмағын мәнә лап од гојур. Ахы ҝөрүрсән ки, дүнәнә гәдәр биз диндарлар Исраил гәдәр Түркијә илә дүшмән идик. Чүнки буҝүнкү Азәрбајҹан кими Аллаһын ганунларыны алмышды диз алтына. Түркијә дәјишди, бизим мүнасибәтимиз дә онунла ајаг-ајаға. Инди Әрдоғаны, сүннә әһлиндән олан бир инсаны биз шиәләр ҹанымыздан артыг севирик. Еләҹә дә Иран. Ирана исти мүнасибәтимиз дә Ислама хатирдир. Сабаһ Иран дөнүб лајик олса, биринҹи дүшмәни биз диндарлар олаҹағыг. Бүтүн бүнлары ҝөзәл анлајырсан. Тәкрарладым ки, сөзүмүн ҹанына кечим.
Истибдад, клан, нә билим јаплама... Бунлар ачыг-ашкар мүхалифләрини әзир, алчалдыр. Һәбсдә олан мүхалифләрин “улу өндәри” зијарәт етмәк шәрти илә азадлыға чыхмасыны јада салын. Инди бизим гардашлар шәрләниб, тутулуб. Тәсбеһ-мөһүрдән башга бир шеј тапылмајан евләрдән бир ордунун силаһ арсеналыны чыхарыблар. Һарда олдуглары билинмир. Тока верилирләр, бармаглары гырылыр, ја “улу өндәрин” зијарәтинә итәләнирләр... билмирик! Дејирәм, мәсәлән, сабаһ (Аллаһ еләмәмиш) бир диндар телевизијаја чыхыб “сәһв етмишик, бизи Иран өјрәдиб” десә вә ја һәбсханадан чыхыб Кишинин зијарәјтинә ҝетсә, шәхсән мән буну һәмин гардашларын гәтли кими дәјәрләндирәҹәјәм. Онларын ҹисмән өлдүрүлмәсиндән гүрур дујарамса, руһән өлдүрүлмәсиндән өләрәм. Биздә дејирләр ки, анамы сөј, азад бурах! Будур кимлијимизи алчалдан.
Кечәк мәтләбә! Мән Халг Ҹәбһәси һакимијјәтдә оланда да МТН-ә чағырылмышам. Амма баш үстүндә Аллаһ вар, буҝүнкү тәзјиг, шәр олмајыб. Чүнки Халг Ҹәбһәси һәр нә идисә халгын ичиндән чыхмышды, ону мави хоруз јумуртламамышды. Диндән кәнарда да халгын ичиндә һәгигәт вә әдаләт фәдаиләри олуб. Һәгиги, сәмими фәдиләрин әлиндән өпүр вә әл узадырам. Бу ҝүн бирлик ҝүнүдүр, бу ҝүн “Шариковун” Иса Гәмбәрә “бармағыны гырарам” демәси мәни мусаватчыдан аз јандырмыр. Чүнки мән бүтүн фәргли фикирләринә бахмајараг Иса Гәмбәри өз иддиаларында сәмими дәјәрләндирирәм. Мән Иса Гәмбәрлә јолдаш ола биләрәм, амма бир сүрү “Мүбариз”лә... Јох!
Еј Рәббим! Дүшүнҹәмизи ишыгландыр, һаггы ҝөрәк, батилин гуҹағындан чыхаг. Бизи тәнһа бурахма, Сәнсән ән үстүн Варис!
А. Ејвазов
