Әһли Бејт -АБНА- хәбәр аҝентлијинин вердији хәбәрә әсасән: Дмитри Медведев Кремл сарајынын Ҝеорҝијев залында јахын перспектив үчүн дахили вә хариҹи сијасәтин әсас истигамәтләрини ачыглајыб.
Дөвләт башчысы бәјан едиб ки, бир сајлы вәзифә ҝәләҹәк нәслин гајғысына галмагдыр. Ушаглардан вә демографик вәзијјәтдән данышан Д. Медведев һесаб едир ки, үчүнҹү өвлады дүнјаја ҝәлән аиләләрә әвәзсиз олараг торпаг саһәси верилмәлидир: “Билдијимә ҝөрә, Ивановск вилајәтиндә үчүнҹү көрпә доғулдугдан сонра аиләјә јашајыш еви вә ја бағ евинин тикинтиси үчүн пулсуз торпаг саһәси ајрылыр. Бу, чох дүзҝүн аддымдыр вә диҝәр вилајәтләр үчүн нүмунәдир. Бу практиканы һәр јердә тәтбиг етмәји мәгсәдәујғун сајырам”. Бундан башга, үчүнҹүдән башлајараг һәр ушаға ајлыг мүавинәтләр 3 мин рубла гәдәр артырылаҹаг.
Д. Медведев ушагларла бағлы еффектив сијасәт апармағын ваҹиблијини вурғулајыб: “Биз демографик проблемлә чох ҹидди вә узунмүддәтли мәшғул олмаға ҝиришмишик. Лакин јахын 15 илдә 90-ҹы илләрдәки демографик тәнәззүлүн нәтиҹәләринин өзүнү ҝөстәрәҹәјини дә анламалыјыг”. Президентин сөзләринә ҝөрә, бу мүддәтдә репродуктив јашда гадынларын сајы ҹидди шәкилдә азалаҹаг вә бу, милләт үчүн чох ҹидди тәһлүкәдир. Онун фикринҹә, сонсузлуғун мүалиҹәси үчүн дөвләт дәстәјини артырмаг лазымдыр.
Д. Медведев коммерсија мәгсәдли әлә алма вә рүшвәт вермәк үчүн бу рүшвәтин јүз гаты һәҹминдә ҹинајәт мәсулијјәти тәтбиг олунмасыны да тәклиф едиб. О, коррупсија илә мүбаризәнин әсас вәзифәләрдән бири олараг галдығыны сөјләјиб: “Тәҹрүбә ҝөстәрир ки, һәтта 12 ил азадлыгдан мәһруметмә ҹәзасә да рүшвәтхорлары дајандырмыр”.
Диггәт: Хәбәрдән истифадә етдикдә мәнбәјә истинад лазымдыр
