Бир дәфә Бәһлулдан сорушурлар "Сән ки бу гәдәр ағыллысан, нијә бәс вар-дөвләтин јохдур?" Бәһлул разылашмыр "Ону ким дејир ки, мәним вар-дөвләтим јохдур?! Вар, өзү дә лап чох. Һамысыны јухары евдә ҝизләтмишәм". Бәһлулун икимәртәбәли еви вармыш. Евдә адам олмајанда фүрсәт тапыб сохулурлар ичәри, галхырлар икинҹи гата, нә гәдәр ахтарырлар, көһнә һәсирдән савајы әлә кечәси бир шеј тапмырлар. Фикирләширләр ки, ја Бәһлул бизи долајырмыш, ја да гәлиз јердә ҝизләдиб, јахшы ахтармамышыг. Сөз алмаг мәгсәдилә далынҹа ҝедирләр вә ону бир мәҹлисдә тапырлар. Бахырлар ки, јенә вар-дөвләтдән дәм вурур "Мән бу дүнјада нә гәдәр јашајаҹағамса, она бәс едәҹәк сәрвәт топламышам. Амма о дүнја да вар. Орада да нә гәдәр јашајаҹағамса, индидән ора үчүн мал-дөвләт тәдарүк едирәм". Оғрулар башлајыр Бәһлулу лаға гојмаға ки, бу Диванәнин басыб-бағламағына бәнд олмајын. Индиҹә онун мәнзилиндән ҝәлирик. Дөшүнә дөјүрдү ки, бутүн мал-дөвләти јухары евиндәди. Јохламаг үчүн ҝетдик бахдыг, јыртыг һәсирдән башга һеч нәји јох иди. Инди дә сизин башынызы пијләјир ки, мал-дөвләт тәдарүк едирәм. Бәһлул башыны булајыр "А фәрсизләр, сиз мәним јухары евимә неҹә чыха биләрсиниз? Ора Аллаһын евидир. Еләдијин бүтүн тәдарүкү дә ҝәрәк һәмишә ора үчүн едәсән". Бәһлул Данәндә өлүмүндән сонракы һәјатынын дири јашајышындан мин-мин дәфәләрлә узун олдуғуну билдијиндән әбәди һәјаты, ҝәләҹәји үчүн елә түкәнмәз вә көһнәлмәз сәрвәт тәдарүк етмишди ки, бу ҝүн дә она рәһмәт охутдурур. Бу түкәнмәз, вахт совушдугҹа азалмајыб артан, үстүнә тәзә-тәзә сәрвәтләр ҝәтирән мирас онун солмаз сөзләри, ибрәтли дүшүнҹәләридир.
