Әһл Бејт-АБНА-хәбәр аҝентлијинин хәбәринә әсасән АБШ-ын Ҹәнуби Гафгаз вә Јахын Шәрг сијасәти үзрә аналитик, Ҹорҹтаун Университетинин профессору Ширин Һантерин (Сһиреен Һунтер) АПА-нын Вашингтон мүхбиринә мүсаһибә вериб. Мүсаһибәдә ”Ҹәнуби Гафгазда мүнагишәли әразиләрдә јени ҝәрҝинлик рискләри һансылардыр?” суалынын ҹавабында Һантерин дејиб:
- Ермәнистан-Азәрбајҹан мүнагишәси јенидән аловланараг һәрби гаршыдурмаја чеврилә биләр. Лакин мән бунун јахын ҝәләҹәкдә баш вермәси рискини ҝөрмүрәм, чүнки әсас бејнәлхалг гүввәләр, јәни АБШ, Русија, Авропа вә реҝионал ҝүҹләр - Иран, Түркијә бунун әлејһинәдир…
- Азәрбајҹан вә АБШ арасындакы әлагәләрин һазыркы мәрһәләси барәдә нә дүшүнүрсүнүз?
- АБШ һазырда Азәрбајҹана Әфганыстан вә Иранла бағлы сијасәтиндә истифадә едәҹәји гијмәтли актив кими бахыр. Ола билсин ки, Әфганыстан мүһарибәсинин баша чатаҹағы вә ја АБШ-Иран мүнасибәтләриндә ирәлиләјиш әлдә олунаҹағы тәгдирдә, бәлкә дә Иранда режим дәјишиклији нәтиҹәсиндә, бу јанашма да дәјишә биләр. Әҝәр АБШ-Түркијә мүнасибәтләри писләшсә, бу еһтимал истисна дејил, бу, АБШ-Азәрбајҹан мүнасибәтләринә дә тәсир едә биләр. Чүнки бәзи гүввәләрин ермәни картындан истифадә едәҹәји мүмкүндүр…
- Азәрбајҹана сон сәфәри заманы АБШ-ын мүдафиә назири Роберт Гејтс билдирди ки, јахын заманда Һиллари Клинтонун бу өлкәјә сәфәр едәҹәји ҝөзләнилир. АБШ-ын јүксәк рүтбәли рәсмиләринин бу өлкәјә сәфәрләриндән нә ҝөзләмәк олар?
- Мән бу сәфәрдән гејри-ади нәсә ҝөзләмирәм. Дөвләт катиби Һиллари Клинтон АБШ-ын Азәрбајҹанын досту олдуғуну сөјләјәҹәк. Чох ҝүман ки, о, Азәрбајҹандан АБШ-ын Иранла бағлы сијасәтиндә ону дәстәкләмәји дә хаһиш едәҹәк…
