Пиа јазыр: Салјан рајонундакы мәнбәләримиздән алдығымыз мәлумата ҝөрә, рајонда ишләјән мүәллимләрин өтән ајкы маашындан 10 манатла 110 манат арасында пул кәсилиб. Апрел ајына олан маашларыны алмаг үчүн банкоматлара јахынлашан рајон мүәллимләри маашларындан пул чыхылдығыны өјрәнибләр. Мәнбәмиз дејир ки, бәзи кәндләрдә мүәллимләрин маашындан 10 манат бәзиләриндә исә максимал олараг, 110 манат чыхан Рајон Тәһсил Шөбәсинин мүдири мүәллимләрә бу барәдә һеч нә демәјиб. “Тәһсил шөбәсинин мүдири чох әзазил адамды. Рајонда һеч кими веҹинә алан дејил. Рајонда ишләјән бүтүн мүәллимләрин маашындан 10-110 манат арасы пул тутуб вә бу барәдә һеч кимә һеч нә демәјиб. Банкоматдан маашларыны чыхармаг истәјән мүәллимләр ҝөрүбләр ки, пул чыхылыб.” дејә мәнбәмиз билдирир.
Мәнбәмиз дејир ки, Рајон Тәһсил Шөбәсинин мүдири мүәллимләрин маашындан чыхдығы бу пулу рајонун дашгындан әзијјәт чәкән бөлҝәләриндә јашајан әһалијә јардым үчүн топладығыны билдириб. “О, һеч бир ҝөстәриш олмадан, өзјанындан бу ҹүр иш ҝөрүб. Рајонда јашајан әһалинин вәзијјәтинин онсуз да критик олдуғу бир вахтда мүәллимләрин маашларындан пул тутулмасы биабырчылығын сон һәддидир. Мәҝәр дөвләтин пулу јохду рајон ҹамаатына јардым етмәјә? Бу бојда дөвләт мүәллимләрин маашына ҝөз тикиб?” дејә сорушан маашындан 110 манат тутулмуш мүәллимләрдән бири Фөвгәладә Һаллар назири Кәмаләддин Һејдәровун һеч кимдән јардым алынмамасы барәдә сөзләрини хатырладыр.
