Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасынын Хариҹи Ишләр Назирлији Азәрбајҹанын сабиг милли тәһлүкәсизлик назири Елдар Маһмудовун вәһабиләрлә әмәкдашлығына даир мәсәләни арашдыраҹаг.
Бу барәдә мәтбуат конфрансында ИИР Хариҹи Ишләр Назирлијинин рәсми нүмајәндәси Һүсејн Ҹабир Ансари ачыглама вериб.
Мәтбуат конфрансы заманы залда олан журналистләрдән бири гејд едиб ки, күтләви информасија васитәләриндә Азәрбајҹанын сабиг назиринин Гафгазда вәһабиләрин силаһланмасында ваҹиб рол ојнамасы, Сәудијјә Әрәбистаны вә Исраиллә сых әмәкдашлыг етмәси барәдә хәбәрләр јајылыб.
Журналист ХИН рәсмисинә бунун Иран Ислам Республикасынын марагларына зәрәр вериб-вермәмәси барәдә суал үнванлајыб.
Суала ҹаваб верән Һүсејн Ҹабир Ансари бу мәсәләнин арашдырылаҹағыны билдириб: “Мәсәлә арашдырылдыгдан сонра мүәјјән фактлар ашкар олунарса, мәлумат вериләҹәк”.
Хатырладаг ки, 2015, октјабр ајынын 17-дә Елдар Маһмудовун милли тәһлүкәсизлик назири вәзифәсиндән азад едилмәси һаггында сәрәнҹам имзалајыб.
Е.Маһмудов вәзифәсиндән азад едилдикдән сонра кечмиш Милли Тәһлүкәсизлик Назирлијиндә һәбсләр башлајыб. Апарылан арашдырмалар заманы мәлум олуб ки, јүксәк рүтбәли мәмурлар узун мүддәтдир ки, саһибкарлара гаршы ҹинајәт төрәдиб. Бу әмәлләринин нәтиҹәсиндә һәмин мәмурлар милјонлар әлдә едибләр.
Белә ки, Елдар Маһмудовун тапшырығы илә саһибкарларын телефон данышыгларына гулаг асылыб вә МТН ҝенераллары бунун көмәји илә Азәрбајҹанын бизнес елитасыны, ејни заманда орта сәвијјәли саһибкарлары да шантаж едәрәк күлли мигдарда пул мәнимсәјибләр.
Диггәт: Хәбәрдән истифадә етдикдә мәнбәјә истинад лазымдыр
