Әһли Бејт (әлејһимус сәлам) -АБНА- Хәбәр Аҝентлији Әрбәин Зијарәтинә ҝедән зәвварлар бир сыра төвсијәләр верир.
1- Зәвварын зијарәт үчүн хәрҹләдији пул һалал олмалыдыр. Мурдар вә јахуд гәсби су илә дәстәмаз алмаг батил олдуғу кими гәсби мал илә зијарәтә ҝетмәк дә батилдир. Чүнки, зијарәтин кәмалынын гәбул олунмасы зијарәтә хәрҹләнилән пулун һалал олмасындан аслыдыр.
2- Зәввар сәфәрә чыхмамышдан өнҹә сәј етмәлидир ки, һагглары бојнунда оланлардан, хүсуси илә дә, борҹлу олдуғу шәхсләрдән һалаллыг алсын. Әкс тәгдирдә мәзлум инсанларын наразы галмалары зәвварын зијарәтинин гәбул олунмасына манеә јарада биләр, јахуд да ки, хүсуси бәрәкәтин назил олмасынын гаршысыны ала биләр.
3- Даһа јахшы олар ки, зәввар евиндән һәрәкәт етдији вахтдан зијарәтин сонунадәк өз әмәлләринә диггәт јетирсин, нәфсани истәкләрдән узаг олсун, ихласла һәрәкәт етсин, һарам вә бәјәнилмәјән ишләрдән узаглашсын. Чүнки бу ишләр онун иманынын артмасына сәбәб ола биләр.
4- Пијада зијарәтә ҝетмәк олдугҹа ҝөзәлдир. Хүсуси илә, әҝәр һүзури гәлблә ола. Зәввар һәрәмә ҝетмәк исдәдикдә елә бир јол илә ҝетмәлидир ки, јол үстүндә онун зеһнини мәшғул едән вә диггәтдән јајындыран амилләр аз олсун. Даһа јахшы олар ки, зәввар јол боју зикр илә мәшғул олсун.
5- Зијарәтин ҝөстәришләринә (зијарәт гүслу кими әмәлләрә) әмәл етмәкин чохлу фајдасы вардыр. Зијарәт гүсулну вердикдә онун зикирләрини демәк инсанын руһунун даһа да пакланмасына сәбәб олар.
6- Зијарәтин шәртләриндән бири дә, Ислам Пејғәмбәринин (с) вә Әһли Бејтин (ә) сүннәсинә ујғун олараг тәмиз палтарлар ҝејиниб хош гохулу әтирләр илә әтирләнмәкдир. Јахшы дејил зәввар чиркли бәдән вә либаслар илә ән пак инсанларын гәрар тапдыглары мүгәддәс мәканлара дахил олсун.
7- Даһа јахшы олар ки, инсан зијарәтә ҝетдикдә бу зијарәтин јүз ијирми дөрд мин Пејғәмбәрләр тәрәфиндән, Аллаһ Өвлијалары тәрәфиндән, гоһум вә әгрәбалары тәрәфиндән ҝетдијини нијјәт етсин. Чүн ки, бу иш шәхсин Имамлара, Пејғәбәрләрә вә јахынларына олан сәдагәтини ҝөстәрир. Тәбидир ки, Аллаһ Өвлијалары вә Пејғәмбәрләр бу һәдијјәнин бир нечә гатыны зәввара гајтараҹагдыр.
8- Зәввар даим бу фикирдә олмалыдыр ки, мүмкүндүр бу зијарәт онун сонунҹу зијарәти олсун. Белә бир дүшүнҹәнин фајдаларындан бири дә, инсан зијарәт заманы сүстлүкдән узаглашыр.
9- Һәрәмә дахил оларкән “Изни Духул”- (дахил олмаг үчүн иҹазә) дуасын охујун вә Имамдан иҹазә алмагын мәнасына диггәт јетирин. Иҹазә алмагыныза мүсбәт ҹаваб вермәјин нишанәләри вардыр, онлардан бири дә, зәвварын көврәлмәси вә ҝөз јашлары ахытмасыдыр.
10- Зәввар буна диггәт јетирмәлидир ки, гаршысында дајандығы шәхсијјәт онун сөзләрини ешидир вә саламынын ҹавабыны алыр. Она ҝөрә ки, динин Илаһи рәһбәрләри вә Мәсум Имамлар Шәһидләрдир. Гурани Кәрим исә Шәһидләр һаггында бујур ки, онлар диридирләр.
11- Зијарәт етдикдән сонра рәҹа (Аллаһ бу намазы гәбул едәр) нијјәти илә ики рәкәт намаз гылын. Бу намазда Һәмд сүрәсиндән сонра һәр һансы бир сүрәни охумаг олар лакин даһа јахшы олар ки, инсан биринҹи рүкәтдә Һәмд сүрәсиндән сонра Јасин сүрәсини охусун вә икинҹи рүкәтдә Һәмдән сонра Әл Рәһман сүрәсини охусун, сонра Аллаһ Тәаладан бүтүн истәкләрини диләсин.
12- Инсан сүфрә башында әјләшдији заман мүхтәлиф чешитли хөрәкләрдән истифадә етдији кими јахшы олар ки, зијарәт заманы да, мүхтәлиф дуалардан истифадә етсин. Буна ҝөрә дә Һәрәмә дахил олдугда мүстәһәбдир ки, зијарәт намазы гылсын, мүхтәлиф дуалар охусун, Гурани Кәрими тилавәт етсин вә с. јахшы ишлләр ҝөрсүн.
13- Һәмчинин Ҹүмә ҝүнләри һәзрәти Фатимәи Зәһраја (сәламуллаһи әлејһа) Истиғасә Намазы гылмаг, Имам Заман (Аллаһ зүһуруну тезләшдирсин) һәзрәтләринин намазын гылмаг вә һәзрәти Ҹәфәри Тәјјарын (әлејһи сәлам) намазын гылмаг ән јахшы әмәлләрдәндир.
14- Һәр бир шејдә олдуғу кими зијарәтдә дә кәмијјәт дејил кејфијјәтә үстүнлүк верилир. Она ҝөрә дә, һүзури гәлб илә гылынан ики рәкәт намаз һүзури гәлбсиз гылынан чохлу намазлардан вә ҝеҹәни биһудә ојаг галмагдан үстүндүр.
15- Даһа јахшыдыр ки, зәввар һәрәм дахилиндә Аллаһ Тәалаја чохлу шүкүр сәҹдәләри етсин. Хүсуси илә дә, әҝәр һәмин мәканларда өзүндә руһ јүксәклији һисс едәрсә.
16- Зәввар намазын илкин вахтында гылынмасына диггәт јетирмәлидир. Чүнки намазын әввәл вахтында зијарәтә ҝетмәк намазы јүнҝүл тутмагдыр вә бу бәјәнилмәјән ишдир. Имам Һүсејнин (әлејһи сәлам) Ашура ҝүнү дөјүшүн гызғын јериндә Зөһр вә Әср намазларыны өз вахтында гылмасы буна ачыг дәлилдир.
17- Имам Заман (Аллаһ онун зүһуруну тезләшдирсин) һәзрәтләринин ҝәлиши һагда дуалары артылмалыјыг. Хүсуси илә дә Аллаһ Тәалаја даһа јахын олдуғумузу гәлбән һисс етдикдә бу дуаны тәкидлә демәлијик. Мүмкүндүр Имам Заман һәзрәтләри һәмин дәгигә бизим кәнарымызда олсун бә бизим она дуа етдијимизи ҝөрүб О да, Амин десин... Һәгигәтән дә, Имам сәма илә јер арасында олан әлагә мәнбәјидир. Онун вүҹуду хатиринә ҝөјләр өз бәрәкәтини јерә назил едир, јер вә ҝөјләр сабит гајдада һәрәкәтдәдир.
18- Зәввар мүтләг Мәсумдан (әлејһи сәлам) истәмәлидир ки, јетимә диггәт јетирдији кими она да белә диггәт јетирсин. Чүнки бу Мәсум (ә) тәрәфиндән инсана верилә биләҹәк зијарәтин ән али һәдијјәси сајыла биләр. Доғрудан да инсан үчүн Мәсумун (ә) она гәјјумлуг етмәсиндән даһа ҝөзәл нә ола биләр?
19- Әҝәр зәввар зијарәт боју өзүндә гәлбигаралыг һисс едәрсә өзүнү зијарәт саһибинә тапшырмалыдыр. Она тәвәссүл едәрәк Аллаһ јанындакы мәгамына хатир Уҹа Аллаһдан јардым диләмәлидир. Һәгигәтән дә Мәсумлар ән чәтин вә пис дәрдләри ән ҝөзәл сүрәтдә дәрман едә билән тәбибләрдир...
20- Даһа јахшы олар ки, зәввар зијарәт заманы мадди вә мәнәви арзуларыны диләмәклә јанашы Аллаһ Тәаладан али мәнәви мәгамлара јүксәлмәсини дә тәләб етсин. Бир чох инсанлар олуб ки, бу јол илә дәрк олунмаз али мәгамлара вә кәрамәтләрә наил олублар.
21- Диггәтли олмалыјыг ки, бүтүн сәјләримизи анҹаг һаҹәтләримизин гәбул олунмасына доғру јөнәлтмәјәк. Ола билсин ки, бу рәфтар инсанда үмүдсүзлүк јаратсын. Чүнки мүмкүндүр ки, Аллаһ Тәала мәсләһәт үзүндән бәзи һаҹәтләримизи бу дүнјада бизә вермәсин. Лакин билмәлијик ки, бу дүнјада гәбул олунмајан һаҹәтләримизин әвәзиндә Аллаһ Тәала ахирәт евиндә инсана дүнјадакы һаҹәтләри илә мүгајисә олунмајан бөјүк бир һәдијјә верәҹәкдир.
22- Инсанын емосијаларыны вә дахили дујғуларыны ојада биләҹәк ән јахшы зијарәт биринҹи вә ахрынҹы зијарәтдир. Она ҝөрә ки, биринҹи зијарәтдә инсан бөјүк руһ јүксәклији илә, ахрынҹы зијарәтдә исә һиҹран гәми илә зијарәтә ҝедир. Буна ҝөрә дә бу ики зијарәтин гәдр вә гијмәтин билијик...
23- Зијарәт заманы зәвварлар зијарәт саһибинин јанында бир-бириләри илә рәфтар едәркән өвладларын валидејн һүзурунда рәфтар етдикләри кими диггәтли олмалыдырлар. Демәли диҝәр зәвварлар илә хош рәфтар етмәк әслиндә өзүмүзүн хејринәдир. Чүнки Атамыз ҝөрүр вә бизим бу ишимиздән хошу ҝәлир, биздән разылыг едир. Һабелә пис рәфтар етмәјимиз дә беләдир.
24- Гонаг ҝетдијимиз евдә тәмизликә риајәт етмәдикдә ев саһибини раһатсыз етдијимиз кими зәввар да, Али Мәгамлы Шәхсијјәтин зијарәтинә ҝетдији заман һәрәмдә тәмизлик вә сәлигә-саһмана диггәт јетирмәдикдә Мәсум Имамын (ә) нараһатчылығына сәбәб ола биләр. Елә буна ҝөрә дә, һәрәмин тәмизликинә ријајәт етмәлијик.
25- Зәввар зијарәт етдији мүддәт әрзиндә (зијарәтә ҝедиб евинә ҝери дөндүјү ҝүнә кими) бүтүн ҝүнаһлардан чәкинмәк нијјәтиндә олмалыдыр. Белә ки, ҝеријә, вәтәнә дөндүјү заман өзү вә диҝәрләри онун симасында јени бир нурун саҹдығыны һисс етмәлидир. Неҹә ки, Имам Әли (әлејһи сәлам) бујурур: “Дилиниз илә дејил әмәлиниз илә тәблиғ един.”
26- Зәввар чалышмалыдыр ки, диҝәр инсанлары мүгәддәс мәканлара ҝедиб зијарәт етмәјә тәшвиг етсин вә онлардан Мәсум (әлејһи сәлам) илә онун арасында шәфаәтчи ролун ифа етмәләрини истәсин.
27- Инсан әҝәр зијарәт етдији мүддәт әрзиндә ҝүнаһдан чәкиниб нәфсин истәкләриндән узаг олмасыны өмүрүнүн ахырына кими јеринә јетирә биләрсә әбәди сәадәтә говушар. Унутмамалыјыг ки, һәјат јалныз белә бир ҝөзәл анлардан ибарәтдир.
Диггәт: Хәбәрдән истифадә етдикдә мәнбәјә истинад лазымдыр
