Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Елдар Маһмудов вәзифәсиндән алындыгдан сонра вахтыјла рәһбәрлик етдији назирликлә бағлы һәр ҝүн илҝинҹ мәлуматлар ортаја чыхыр. МТН-ин сабиг башчысы Елдар Маһмудовун назирлијә рәһбәрлик етдији дөнәмдә бир чох ганун позунтуларына јол вермәклә јанашы, һәтта Азәрбајҹанын милли тәһлүкәсизлијинә реал тәһдидләри дә шәхс марагларына гурбан вериб. Бу барәдә мәтбуатда јајылан мәлуматлардан даһа долғун билҝи алмаг елә дә чәтин иш дејил.
Мәлумата ҝөрә, Маһмудовун бүтүн ишләриндә бу мәсәләнин архасында да күлли мигдарда пул газанмаг истәји дајаныб. Мәтбуатын мәлуматларындан белә ајдын олур ки, Елдар Маһмудов вә дәстәсинин әсас ҝәлир мәнбәләриндән бири дә радикал дини ҹәрәјанларын өлкәдә шәбәкәләшмәсинә ҝөз јуммаг, конкрет олараг радикал тәмајүлли вәһһабиләрдән хәраҹ алмаг, онлара фактики олараг «кришалыг» етмәкдән ибарәт олуб.
Мәнбә билдирир: “Диггәти чәкән әсас мәгамлардан бири дә Елдар Маһмудовун ишдән азад едилмәсиндән сонра МТН-ин кечирдији әмәлијјат заманы радикал вәһһабиләрә гаршы кечирилән әмәлијјатда Гамәт Сүлејмановун «сағ әли» бу груплашманын «кассири» кими танынан Адил Рәҹәбовун һәбс едилмәсидир. Әлдә олунан мәлуматларда бунун тәсадүф олмадығы ајдын мәсәләдир”.
Даһа сонра вурғуланыр ки, әлдә етдији мәлумата ҝөрә, МТН-дәки ҹинајәткар групун бу истигамәтдә бөјүк ҝәлир ҝәтирән саһәләрдән бири дә «гајнар нөгтәләрдә» террорчулуг фәалијјәти илә мәшғул олан тәшкилатлара, даһа дәгиги исә ИШИД кими дәстәләрә дөјүшчүләрин ҹәлб олунмасына шәраитин јарадылмасыдыр. “Хариҹи мәтбуат, бир чох өлкәләрин хүсуси хидмәт органларына истинадән хәбәр верирләр ки, ИШИД сыраларына ҹәлб олунан һәр бир террорчу үчүн бејнәлхалг террорчуларын спонсорлары 50 мин доллар вәсаит ајырырлар. Бу мәбләғин аз бир һиссәси радикал исламчынын өзүнә вә ҝеридә бурахдығы аиләсинә, галаны исә дөүшчүләрин сағ-саламат мәнзил башына чатдырылмасына шәраит јараданлара, бу ахына «ҝөз јуманлара» хәрҹләнир. Илкин һесабламалара ҝөрә, ән чох хәрҹ јарандығы тәгдирдә бир террорчунун Суријаја ҝедиб чатмасына 5 мин доллара бәрабәр олур. Јердә галан 45000 доллар исә «патронларын» гәнимәтидир”.
Мәнбә билдирир ки, Јахын Шәргдәки «гајнар нөгтәләрә» Азәрбајҹандан индијә гәдәр 1000-дән артыг инсан ҝедиб. “О заман һавадарларын газанҹыны һесабламаг елә дә чәтин мәсәлә дејил. Јәни, бу ишләрдән 45 милјон доллара гәдәр пул газанылыб”.
Суал олунур ки, бәс, бу әмәлијјатлар неҹә өрт-басдыр едилиб? “Гәрибәдир, неҹә олур ки, өлкәдәки радикал вә екстремист, ИШИД тәрәфдары гүввәләр, ИШИД үчүн дөјүшчү јығынлар һаггда һәтта мәтбуат хәбәр тутур, сосиал шәбәкәләрдә еланлар верилир, амма МТН бир дәфә дә олсун бунларын гаршысыны алмыр? Сәбәб јенә дә пулун үзәринә ҝәлиб чыхыр. Елдар Маһмудов МТН-и «ОБХСС»ә чевирдикдән сонра орада чалышан пешәкарлары узаглашдырмагла әслиндә, өзүнә бөјүк ҝәлир мәнбәләри јаратмаға башламышды. Кечирилән әмәлијјатларын исә гаршысында гырмызы ишыг јандырылыб. Вә бу әмәлијјатларын әксәријјәти ИШИД хәттиндә «өзфәалијәт»лә мәшғул олан маржинал дәстәләрә истигамәтләниб. Јәни, сөзүҝедән дәстәнин мәгсәди маржиналлары сырадан чыхарыб, каналы өз нәзарәтиндә, бир нөв монополијасында сахламаг олуб. Бунун ган баһасы исә террорчуларла савашда јараланан, һәтта һәлак олан виҹданлы заибтләр олуб”.
Иддиа едилир ки, назирлик маржиналлары сырадан чыхарыб, «кришалы» вәһһабиләрин мөвгеләрини мөһкәмләндирмәк үчүн һәтта онларын өз араларындакы «разборкалара» шәраит јарадылыб. “Мәсәлән, 2013-ҹү илин декабр ајында Сумгајытдакы «Солтан» кафесиндә баш вермиш 2 вәһһаби дәстәси арасында ганлы атышмада да мәһз бу «разборка»нын тәзаһүрләриндәдир. Һәлә һәмин вахт мәсәләни арашдырмаға ҹәһд етдијимиздә полис органларындан белә бир мәлумат сыздырылмышды ки, атышманы төрәдән груп һаггында әввәлҹәдән мәлумат олса да, просесә мүдахилә етмәмәк ҝөстәриши мәһз МТН-дән ҝәлибмиш”.
Гајнаг билдирир ки, бу фактлары узун мүддәт ҝизләтмәк вә ја өрт-басдыр етмәк мүмкүн дејилди. “Чүнки хариҹи мәтбуат органлары артыг Сурија вә Ирагда јүзләрлә Азәрбајҹан вәтәндашынын дөјүшдүјүнә даир мәлуматлар јајырдылар. Белә олан тәгдирдә, ҹаваб «әмәлијаты» кими о вахткы МТН рәһбәрлији «ҝөздән пәрдәасма» илә мәшғул олмаға башлајырды. Јәни, һәбс олунанларын һамысы артыг ҝери дөнәнләр иди. Даһа дәгиг ифадә едәрсәк мәнзәрә белә алыныр ки, онларын пулу артыг «хәрҹләнилмишди».
Хатырладаг ки, бунунла әлагәдар «Шәрг-Гәрб» Арашдырмалар Мәркәзинин директору, политолог Әрәстун Оруҹлу мараглы бир ачыглама вермишди. О дејирди ки, бу һәбсләрин әксәријјәти МТН-ин өз хидмәтләри дејил. Онун сөзләринә ҝөрә, хариҹи хүсуси хидмәт органлары тәрәфиндән һагларында Азәрбајҹан МТН-ә арајыш вә мәлуматлар ҝөндәрилмиш, она ҝөрә дә, ҝизләдилмәси мүмкүн олмајан һаллар иди. Бу һәбсләр һәм дә ҝери дөнмәк истәјәнләрә бир хәбәрдарлыг иди. «Әслә! Ҝери дөнсәниз- һәбс олунаҹагсыныз. Сизи ора буна ҝөрә бурахмадыг ки!».
Вурғуланир ки, бу фәалијјәт кечмиш МТН шефи вә онун башбиләнләринин ҝөзүндә нә гәдәр ағыллы стратеҝија кими ҝөрүнсә дә, фактики бу әмәл нәтиҹәсиндә һәр ҝүн Сурија вә Ирагда Азәрбајҹанын варлығына нифрәт едән, ону «Ислам Хилафәтинин бир парчасы кими» ҝөрән, «кафир» азәрбајҹанлыларын башыны кәсмәјә һазыр олан, кифајәт гәдәр дөјүш тәҹрүбәси топламыш вә дүнја радикал дини ҹәрәјанларын шәбәкәси илә ҝениш әлагәләр јаратмыш јүзләрлә потенсиал камикадзени өз әлләри илә јетишдирибләр. “Ҝөрәсән, онлар һеч дүшүнүбләрми ки, Азәрбајҹанда террор актлары төрәтмәк истәјән хариҹи гүввәләр ҝүнүн бириндә онлары елә өлкәмизә ҝөндәрәҹәкләр? Бу арашдырмалар заманы ортаја даһа бир дәһшәтли факт чыхыб. Мәлум олуб ки, Азәрбајҹаны «кафирләр дијары» һесаб едән ән радикал дини груплардан биринә елә сабиг МТН шефи Елдар Маһмудовун јахын гоһуму башчылыг едиб. Бу дәгиг фактдыр ки, радикал дини груплашмаларын әсас мәскәни Сумгајыт шәһәридир. Мәһз бу шәһәрдән Сурија вә Ирага дөјүшмәк үчүн ҝедәнләр үстүнлүк тәшкил едибләр. Һәтта Суријада «Сумгајыт баталјону» белә вар. Бу радикал дини груплашмалар арасында ән мәшһуру исә «Сумгајыт ҹамааты» адланыр. Дәфәләрлә баш вермиш ағыр ҹинајәтләрдә, һабелә Суријаја дөјүшчүләрин апарылмасында бу груплашманын ады хүсуси олараг чәкилиб. Мараглыдыр ки, онларын фәалијјәти һаггында МТН-дә, һәтта полисдә кифајәт гәдәр мәлумат олуб. Лакин һеч бир тәдбир ҝөрүлмәјиб. ДИН тәрәфиндән ҝәлән ачыгламада вурғуланыр ки, «Сумгајыт ҹамааты»на гаршы әмәлијјатларын кечирилмәмәсини МТН онлардан истәјиб. Вә һәр шејин нәзарәт алтында олдуғуну билдириб”.
Даһа сонра билдирилир ки, «Сумгајыт ҹамааты»нын сәрбәст һәрәкәт етмәси, дәстәләр формалашдырараг Сурија вә Ирага јола салмасына ҝөз јумулмасы тәсадүфи олмајыб. “Буну тәсдиг едән факт кими исә ДИН тәрәфиндән өтән ил кечирилмиш әмәлијјаты ҝөстәрмәк олар. Белә ки, һәмин вахт ДИН-ин кечирдији әмәлијјат заманы «Сумгајыт ҹамааты»нын лидери, шәһәрин баш вәһһабиси Зөһраб Шыхәлијевин јахыны, мәһз сабиг мили тәһлүкәсизлик назири Елдар Маһмудовун әмиси нәвәси Јалчын Маһмудов һәбс олунур. Јалчын Маһмудов Сумгајытда вәһһабилијин ҝениш тәшәккүл тапмасы, онларын сәрбәст һәрәкәт етмәси, онларын «мүвафиг гурумларла» олан проблемләринин «чөзүлмәсинә» васитәчилик едиб. Бир сөзлә, «Сумгајыт ҹамааты»нын гејри-рәсми «әмири» мәһз Елдар Маһмудовун әмиси нәвәси имиш”.
Мәнбә Сумгајытдакы «Солтан» кафесиндә баш вермиш ганлы «разборка»нын архасында башга мәтләбләрин дурдуғуну да гејд едир. “Һәмин ҝизли мәтләбләр исә ондан ибарәт олуб ки, Сумгајытдакы бәзи радикал груплар назирин әмиси нәвәсинә «бијәт» етмирмишләр вә бу сәбәбдән дә онлары ҹәзаландырыблар. Һәмчинин МТН-ин о вахткы рәһбәрлији бунунла диҝәр ипә-сапа јатмајан груплара да ҝөздағы вериб ки, онларын да башына аналожи ојуну ача биләрләр. Әлдә олунан мәлуматлара ҝөрә, хүсусән Сумгајытдакы вәһһабиләр тохунулмаз кастаја чеврилмишдиләр. Мәһз бу сәбәбдәндир ки, бу барәдә мәлумат әлдә едән ДИН әмәлијјатлар кечирәрәк, өлкәнин тәһлүкәсизлијинә тәһдид олан груплашма үзвләрини һәбс етсә дә, сонрадан МТН-ин дәстәји илә онлар азадлыға бурахылырмышлар. Бу мөҹүзәли «хилас»ын ән бариз нүмунәси исә евиндә ҝизли топланты кечирән, силаһ-сурсат ашкарланан, һүгуг мүһафизә органлары тәрәфиндән һәбс олунан Зөһраб Шыхәлијевин 6 ајдан сонра азадлыға бурахылмасы иди. Онун нә гәдәр тәһлүкәли бир фигур олдуғуну Сумгајыт ҹамааты да јахшы билирди. Бу һәмин Шыхәлијев иди ки, «радикалларын гуш учурмасына да нәзарәт едирик» дејә, һәр кәсәи тәһдид едирди. Ејни заманда, о, МТН-ин ҝөз гаршысында Сумгајытда өзүнә вилла адыјла гејри-гануни мәсҹид инша етдирирди. Ишин үстү ачылдыгдан сонра «Сумгајыт ҹамааты»нын лидеринин еви шәһәр Иҹра Һакимијјәтинин ишчиләри тәрәфиндән сөкүлмүшдү. Вә мәлум олмушду ки, битмәкдә олан тикилинин өзүлү вә һасарлары о гәдәр мөһкәм бетонланыбмыш ки, евдән вә мәсҹиддән даһа чох һәрби истеһкамы хатырладырды. Вә һәмин бүнөврәнин сөкүлмәси исә дүз бир һәфтәјә мүмкүн олмушду. Ди ҝәл, бу заман һәбс олунан Зөһраб Шыхәлијев сонрадан МТН-ин башбиләнләринин сајәсиндә азадлыға чыха билди”.
Гејд едәк ки, бу мәлуматлар кифајәт гәдәр ҹидди иттиһамлардан ибарәтдир. МТН-ин саһибкарлары сојмагдан, таламагдан башга ИШИД әлијлә дә пул газанмасы сөзүн һәгиги мәнасында биабрчылыгдыр.
Ријад Әлијев
Диггәт: Хәбәрдән истифадә етдикдә мәнбәјә истинад лазымдыр
