Түркијәдә президент вә парламент сечкиләри јахынлашдыгҹа һөкумәт башчысы постуна әсас иддиачыларын тәблиғат-тәшвигат кампанијалары һәр өтән ҝүн даһа да гызышыр.
Сечкиләрдә ики әсас рәгиб олан Милләт Иттифагынын намизәди Камал Кылычдароғлу вә Ҹүмһур Иттифагынын намизәди Рәҹәб Тајјиб Әрдоған чыхышларын сајында вә мүхтәлиф шәһәрләрдә олмагда да рәгабәт апарырлар.
О дәрәҹәдә ки, һазыркы президент вә сечки намизәди Әрдоғанын интенсив сечки програмлары онун ҹанлы јајымда һалынын писләшмәсинә вә верилишин гыса мүддәтлик кәсилмәсинә сәбәб олуб.
Рәҹәб Тајјыб Әрдоған бу һагда дејиб: "Дүнән вә бу ҝүн ҝәрҝин тәблиғат ишләри вар иди, мәдәмә ҹидди сојуг олуб. Һәтта бир мүддәт програмы ләғв етсәк, сәһв баша дүшүләҹәкми, дејә дүшүндүм. Дедим, артыг сөз вермишик, ҝедәрик. Тәбии ки, бу ҝәрҝин ишдә заман-заман белә һалларла растлашырыг. Сиздән вә тамашачыларымыздан һалаллыг истәјирәм".
Телевизија програмында өзүнү пис һисс етдикдән сонра Әрдоған бүтүн тәблиғат програмларыны вә чыхышларыны бир ҝүн мүддәтинә ләғв едиб.
Бүтүн рәј сорғуларынын нәтиҹәләри Түркијәдә мајын 24-дә кечириләҹәк сечкиләрдә "Милләт Иттифагы" илә "Ҹүмһур Иттифагы"нын намизәдләри арасында ҝәрҝин рәгабәтдән хәбәр верир.
Артыг сијаси даирәләр ики әсас намизәдин сәсләринин јахынлығына ҝөрә, Түркијәдә президент сечкиләринин икинҹи тура гәдәр узадылаҹағыны прогнозлашдырырлар.
342/
