“Франҹе 2” телевизијасына мүсаһибәсиндә Макрон иддиа едиб ки, Москва Бакы вә Ирәван арасында ҝәрҝинлији Азәрбајҹанын хејринә гызышдырыр:
“Сон ики илдә сәрһәддә нә баш верир? Хәбәрләрдән мәлум олур ки, 5 мин Русија һәрбчиси орада сәрһәдин тәһлүкәсизлијини тәмин етмәк үчүн јерләшдирилиб. Амма руслар чохәсрлик мүнагишәдән Түркијәнин иштиракы илә Азәрбајҹанын хејринә ојнамагла сых әлагәләри олан Ермәнистаны зәифләтмәјә чалышыр”, - дејә Франсанын дөвләт башчысы вурғулајыб.
Русија Хариҹи Ишләр Назирлијинин сөзчүсү Марија Захарованын исә бәјанатында дејилир ки, Парисин Москванын Бакы вә Ирәванла мүнасибәтләринә зәрбә вурмаг ҹәһдләри уғурсузлуға мәһкумдур вә бу, јалныз Франсанын бөлҝәдәки нүфузунун даһа да ашағы дүшмәсинә ҝәтириб чыхараҹаг.
Өз нөвбәсиндә Астанада МДБ дөвләт башчыларынын саммитиндәки чыхышында президент Илһам Әлијев билдириб ки, Азәрбајҹанын бөлҝәдә сүлһ, сабитлик вә инкишафы тәмин етмәк, бејнәлхалг һүгуг принсипләринә һөрмәт әсасында мүнасибәтләри нормаллашдырмаг ҹәһдләри гаршылығында Франсанын биртәрәфли мөвгеји вә әсассыз иттиһамлары бу өлкәнин васитәчилик сәјләринин бир даһа нәзәрдән кечирилмәсини лабүд едир.
Онун сөзләринә ҝөрә, АТӘТ-ин Минск Групу вастиәчи ролуну итирмиш олса да, Азәрбајҹан Прагада Франса президенти Макронун иштиракы илә дөрдтәрәфли ҝөрүшә разылыг вериб. Амма тәхминән бир һәфтә сонра Франса президенти Азәрбајҹанын үнванына тәһгиредиҹи, гәбуледилмәз, јалан вә тәхрибат характерли бәјанатларла чыхыш едиб.
Мараглыдыр ки, Макрон өтән һәфтә Прагада Азәрбајҹан, Ермәнистан вә Авропа Иттифагы лидерләри илә дөрдтәрәфли данышыгларда иштирак етмишди. Бу данышыгларын нәтиҹәси олараг Авропа Иттифагынын Ермәнистана мүшаһидә миссијасы ҝәндәрилмәсинә даир гәрар гәбул олунуб. Һазырда исә Франса президентинин ермәнипәрәст мөвге сәрҝиләмәси илә Азәрбајҹанын сүлһ просесиндә Гәрбдән мәсафә сахлајаҹағы шүбһә доғурмур. Нәтиҹә етибары илә Илһам Әлијевә даһа чох Русијаја етибар етмәкдән башга јол галмыр вә онун һөкумәти бундан сонра Путинин васитәчилији илә имзаланмыш үчтәрәфли бәјанат әсасында Кремлин тәлиматына ујғун давранмаға мәҹбурдур. Ола билсин ки, Азәрбајҹан бу јолла бөјүк дивидентләр газанаҹаг вә Ермәнистанын мараглары јетәринҹә тәмин олунмајаҹаг.
342/
